Վիքիպեդիայից՝ ազատ հանրագիտարանից
Լերդախոտ սխտորային (լատին․ ՝ Teucrium scordioides ), խուլեղինջազգիների ընտանիքին պատկանող դեղաբույս ։
20-30 սմ բարձրությամբ սողացող կոճղարմատով , փափկաթավ, ճյուղավոր, մեղրատու գեղազարդային բազմամյա խոտաբույս է։ Հերթադիր դասավորված, նստադիր, երկարավուն-ձվաձև տերևները աղեղնաեզր են։ 2-4-ական զույգերով վարդագույն ծաղիկները աճում են տերևանութներում։ Զանգակաձև բաժակն ունի 5 եռանկյունաձև ատամիկներով խողովակ։ Ձվաձև պտուղները կնճռոտ էրեմներ են[1] ։
Աճում է ստորին լեռնային գոտու խոնավ մարգագետիններում , գետափերին, աղակալած ճահիճներում ։ Տարածված է Տավուշի , Սյունիքի , Արմավիրի , Արարատի , Վայոց ձորի մարզերում [1] ։
Բուժական նպատակներով օգտագործում են ամբողջ բույսը ծաղկման փուլում։ Որպես համեմունք ձկնային կերակուրների համար կիրառում են բույսի տերևներն ու երիտասարդ ընձյուղները [1] ։
↑ 1,0 1,1 1,2 Ծատուրյան, Թամարա; Գևորգյան, Մարգարիտա (2014). Պողոսյան, Ա․; Զաքարյան, Ն․ (eds.). Հայաստանի վայրի դեղաբույսեր . Երևան: Լուսակն. էջ 315. ISBN 9789939834689 .