Գարիկ Պապոյան

Վիքիպեդիայից՝ ազատ հանրագիտարանից
Գարիկ Յուրիի Պապոյան
Ծնվել է սեպտեմբերի 20, 1984 (32 տարեկան)
Ծննդավայր Գյումրի, Հայաստան
Քաղաքացիություն Հայաստան Հայաստան
Ազգություն հայ
Մասնագիտություն հաղորդավար, երաժիշտ,հումորիստ
Աշխատանք սկսած 2007 թվականից

Գարիկ Յուրիի Պապոյան (սեպտեմբերի 20, 1984, Գյումրի), հայ հաղորդավար, հումորիստ, նաև երաժիշտ։

Կենսագրություն[խմբագրել | խմբագրել կոդը]

Գարիկ Պապոյանը ծնվել է Գյումրիում 1984 թվականի սեպտեմբերի 20-ին։ Միջնակարգ կրթությունն ստացել է Երևանի թիվ 196 միջնակարգ դպրոցում։ 2001 թվականին ընդունվել է Երևանի հայ-ռուսական (Սլավոնական) պետական համալսարանի զբոսաշրջության և գովազդի ֆակուլտետը, որն ավարտել է 2008 թվականին։ 2004-2006 թվականներին ծառայել է Հայաստանի Հանրապետության զինված ուժերում։

Գործունեություն[խմբագրել | խմբագրել կոդը]

2007-2010 թվականներին եղել է Շանթ հեռուստաընկերության «32 ատամ ակումբ» հումորային ժամանցային հաղորդման սցենարիստ և դերասան, իսկ 2009-2010 թվականներին Արմենիա TV հեռուստաընկերությունում վարել է «3 պատ» շոու-ծրագիրը։ 2009-2010 թվականներին Դար 21 հեռուստաընկերությունում վարել է «Ալո Գարիկ» երաժշտական շոուն։ Խաղացել է «Մեր բակը» հումորային հեռուստասերիալում։

2010 թվականից աշխատում է «Վիտամին» պրոդյուսերական կենտրոնում, որտեղ մինչ 2015 թվականը եղել է «Վիտամին ակումբ» հումորային շոուի վարողը, դերասան և սցենարիստ: Հեռուստատեսությունում այլ աշխատանքներն են՝ «Հարց չկա» շոու-ծրագրի հեղինակ, համասցենարիստ և վարող, «Իքս Ֆակտոր» երաժշտական նախագծում որպես ժյուրիի անդամ, «Հայսուպերսթար» նախագծում որպես երաժշտական պրոդյուսեր և ժյուրիի անդամ, «Շանթ» հեռուստաընկերության «Կանխիկ հումոր» հեռուստանախագծին որպես ժյուրիի անդամ։

2009 թվականին թողարկել է իր առաջին «Inquam» ձայնասկավառակը: 2011 թվականին ստեղծել է «Ռոք-սերունդ» շարժում-գաղափարախոսությունը[1]։ Բազմաթիվ երգերի, երգերի գործիքավորումների և խոսքերի, ինչպես նաև «Վիտամին ակումբ» շոու-ծրագրի երգի հեղինակն է: 2012 թվականին օգոստոս ամսին ամուսնացել է «Mars-On» խմբի անդամ Մարիաննա Վարդանյանի հետ, ում հետ ծանոթացել էր Իքս Ֆակտոր նախագծի ժամանակ

2014 թվականին Գարիկ Պապոյանի հեղինակած Not Alone երգը՝ երգիչ Արամ Mp3-ի կատարմամբ, ներկայացվել է Եվրատեսիլ 2014 երգի մրցույթում և զբաղեցրել է 4-րդ հորիզոնականը։ Գարիկ Պապոյանը 2014 թվականին կարահանվել է «Սուպեր մամա», 2015 թվականին «Սիրո գործակից» ֆիլմերում:

Արտաքին հղումներ[խմբագրել | խմբագրել կոդը]

Ծանոթագրություններ[խմբագրել | խմբագրել կոդը]