Արարատ Ղուկասյան

Ստեղծել հղումը
Վիքիպեդիայից՝ ազատ հանրագիտարանից
Վիքիպեդիայում կան հոդվածներ Ղուկասյան ազգանունով այլ մարդկանց մասին։
Արարատ Ղուկասյան
Դիմանկար
Ծնվել էմարտի 26, 1974(1974-03-26) (50 տարեկան)
ԾննդավայրՀրազդան, Հայկական ԽՍՀ, ԽՍՀՄ
ԿրթությունԵրևանի պետական համալսարան
Մասնագիտությունհասարակական գործիչ, գրող և լրագրող

Արարատ Նարիմանի Ղուկասյան (մարտի 26, 1974(1974-03-26), Հրազդան, Հայկական ԽՍՀ, ԽՍՀՄ), հասարակական գործիչ, գրող, լրագրող, «Արարատ» հայկական միության նախագահ[1], «Հայրենիք» շաբաթաթերթի հիմնադիր խմբագիր։

Կենսագրություն[խմբագրել | խմբագրել կոդը]

Արարատ Ղուկասյանը ծնվել է 1974 թվականի մարտի 26-ին, ՀԽՍՀ Հրազդան քաղաքում։ Նախնական կրթությունը ստացել է տեղի Ավետիք Իսահակյանի անվան թիվ 9 միջնակարգ դպրոցում, որն ավարտել է 1991 թվականին։ Ուսման տարիներին հաճախել է Հրազդանի մականախաղի ակումբ, որի կազմում նվաճել է ԽՍՀՄ, ՀԽՍՀ և ՀՀ երիտասարդական առաջնության տիտղոսներ։ Զուգահեռաբար խաղացել է նաև Հրազդանի Դրամատիկական թատրոնում` մարմնավորելով բազմաթիվ գլխավոր դերեր։ Դպրոցն ավարտելուց հետո 1991 թվականին ընդունվել է Երևանի պետական համալսարանի պատմության ֆակուլտետը, որն ավարտել է 1996 թվականին՝ պատմաբանի և պատմության ուսուցչի մասնագիտությամբ։ Համալսարանական տարիներից դասավանդել է Հրազդանի թիվ 9 դպրոցում և Հովսեփ Օրբելու անվան կրթահամալիրում, որտեղ եղել է նաև Արտադպրոցական միջոցառումների կազմակերպիչ։ Զուգահեռաբար աշխատել է Հրազդանի հեռուստատեսությունում, որտեղ կարճատև ժամանակաշրջանում հիմնել է «Աստղեր» հաղորդաշարը և համագործակցել «Հրազդան» և «Համալսարանական» թերթերի հետ, որտեղ տպագրվել են Ղուկասյանի հոդվածները, ակնարկներն ու ստեղծագործությունները։ Համալսարանն ավարտելուց հետո զինվորական ծառայության է անցել Ճամբարակի ստորաբաժանումում՝ լեյտենանտի կոչումով և վաշտի հրամանատարի տեղակալի պաշտոնով։ Ծառայությունն ավարտել է 1998 թվականին և դարձյալ աշխատանքի անցել Հրազդանի Հովսեփ Օրբելու անվան կրթահամալիրում։

1999 թվականից բնակվում է Իսպանիայում։ Եղել է Մադրիդում, Բարսելոնայում, Սարագոսայում և վերջնականապես հաստատվել Վալենսիայում։ Այստեղ 2004 թվականին հիմնել է երկրում առաջին հայկական կազմակերպությունը՝ Արարատ հայկական միությունը և կազմակերպության հովանու ներքո գործող առաջին հայկական դպրոցը։ Միության հիմնադրման օրվանից Ղուկասյանն ու նրա թիմակիցները լծվել են հայապահպանության և հայ ինքնության պահպանման գործին՝ իրականացնելով բազմաթիվ և բազմաբնույթ միջոցառումներ[2][3]։ Դրանց շարքին են պատկանում բազմաթիվ բեմականացումներ, շնորհանդեսներ, ցուցահանդեսներ, դպրոցական հանդեսներ և այլն։

2008 թվականի հոկտեմբերի 26-ից Ղուկասյանը հիմնադրել ու խմբագրում է Իսպանիայում առաջին և 2021 թվականի տվյալներով միակ հայատառ թերթը՝ «Հայրենիք» շաբաթաթերթը[4][5]։ 2010 թվականի մայիսի 28-ին նրա ջանքերով Միսլատայում (Վալենսիա) տեղադրվել է Հայոց Ցեղասպանության զոհերի հիշատակը հավերժացնող երկրում առաջին հուշարձանը՝ Ջիվան Միրզոյանի «Կենաց Խաչ» կոթողը։

Հայոց ցեղասպանության հուշարձան Միսլատայում, Վալենսիա

«Արարատ» միության միջոցով Իսպանիայի հայ համայնքը սերտ հարաբերություններ է հաստատել Հայրենիքի և Սփյուռքի հետ, ակտիվորեն մասնակցել է համահայկական բազմաբնույթ միջոցառումներին։ Դրանցից առանձնապես հիշատակության են արժանի Լրագրողների 5-րդ, 6-րդ[6] և 7-րդ Համահայկական համաժողովները (2010, 2012, 2014), Սփյուռքի հայկական կազմակերպությունների ղեկավարների և ներկայացուցիչների Համահայկական համաժողովը (2011), Հայաստան-Սփյուռք 5-րդ համաժողովը (2014) և այլ նախաձեռնություններ։ Արարատ Ղուկասյանի հեղինակությամբ ներկայացրած բանաձևով և հայկական միության ջանքերով՝ Իսպանիայի 28 քաղաք ճանաչել է Հայոց ցեղասպանությունը[7][8]։

Մասնակցել և նախագահել է բազմաթիվ խորհրդաժողովներ ու հարցազրույցներ՝ Հայոց ցեղասպանության և ներկայիս ցեղասպանությունների վերաբերյալ, որոնցից հիշատակության են արժանի Իսպանիայի 1-ին և 2-րդ պետական հեռուստաընկերություններում տված դեբատները, Սան Սեբաստյանի Ֆիլմերի փառատոնում ներկայացված «Սպի» ֆիլմի ներկայացումն ու խորհրդաժողովը, ազգային և իսպանախոս պարբերականներում տված հարցազրույցները։

2014 թվականին Մոսկվայում և Երևանում տպագրվել և 2018 թվականին ու 2020 թվականին վերահրատարակվել է Ղուկասյանի անդրանիկ գիրքը՝ «Փնտրտուքների ճանապարհին»[9][10] բանաստեղծությունների ժողովածուն, որի շնորհանդեսները մինչ օրս տեղի են ունեցել ավելի քան 50 քաղաքներում, այդ թվում` Վալենսիայում, Բարսելոնայում, Մադրիդում, Մոսկվայում, Երևանում, Լյուքսեմբուրգում, Վարշավայում, Պրահայում, Բրյուսելում, Հելսինկիում, Փարիզում և այլուր։

Հեղինակ է բազմաթիվ հոդվածների, թարգմանությունների և գիտական աշխատությունների, որոնք հրատարակվել են հայկական և օտար աղբյուրներում և առկա են համացանցում։

Ընտանիք[խմբագրել | խմբագրել կոդը]

Արարատ Ղուկասյանը լրագրող, գրող, հրապարակախոս, Իսպանիայի և Սփյուռքի այլ հայ համայնքներում ակտիվ գործունեություն ծավալած Արթուր Ղուկասյանի և ազատամարտիկ Ռոբերտ Ղուկասյանի կրտսեր եղբայրն է։

Ամուսնացած է, ունի մեկ որդի և մեկ դուստր։

Պարգևներ, մրցանակներ[խմբագրել | խմբագրել կոդը]

Արարատ Ղուկասյանը պարգևատրվել է Սփյուռքի նախարարության և Համաշխարհային հայկական կոնգրեսի դիպլոմներով, շնորհակալագրերով և հուշամեդալներով։

Ծանոթագրություններ[խմբագրել | խմբագրել կոդը]

  1. ↑ «Արարատ Հայկական Միությունը 10 տարեկան է». SLAQ. Արխիվացված է օրիգինալից 2021 թ․ դեկտեմբերի 27-ին. Վերցված է 2021 թ․ դեկտեմբերի 27-ին.
  2. ↑ Daily, A. Z. G. «ՀԱՅԿԱԿԱՆ «ՍՈՒՏԱՍԱՆԸ»ՙ ԻՍՊԱՆԱԿԱՆ ԱՌՈԳԱՆՈՒԹՅԱՄԲ». AZG Daily. Վերցված է 2021 թ․ դեկտեմբերի 27-ին.
  3. ↑ «Presentación de "El libro de los susurros" - Cultura - Ajuntament de Mislata». www.mislata.es. Արխիվացված է օրիգինալից 2021 թ․ դեկտեմբերի 27-ին. Վերցված է 2021 թ․ դեկտեմբերի 27-ին.
  4. ↑ ՀԱՅԱԽՈՍ «ՀԱՅՐԵՆԻՔԸ» ԻՍՊԱՆԻԱՅՈՒՄ
  5. ↑ La asociación Ararat de Mislata publica el primer periódico armenio de España
  6. ↑ Հայաստանի սփյուռքի նախարարությունը ներկայացնում է Լրագրողների համահայկական 6-րդ համաժողովի միջոցառոււմների ծրագիրը
  7. ↑ Հայոց ցեղասպանության ճանաչման միջնորդագիր` Վալենսիայի խորհրդարանի նախագահին
  8. ↑ Իսպանիայի 36-րդ քաղաքը ճանաչեց Հայոց ցեղասպանությունը
  9. ↑ Փնտրտուքների ճանապարհին
  10. ↑ ««Փնտրտուքների ճանապարհը» տարավ դեպի Երևան». Hayern Aysor. 2014 թ․ դեկտեմբերի 25. Վերցված է 2021 թ․ դեկտեմբերի 27-ին.

Արտաքին հղումներ[խմբագրել | խմբագրել կոդը]

Ստացված է «https://hy.wikipedia.org/w/index.php?title=Արարատ_Ղուկասյան&oldid=9510398» էջից