Գևորգ Հովհաննիսյան (մանկավարժ)
Անվան այլ կիրառումների համար տե՛ս՝ Գևորգ Հովհաննիսյան (այլ կիրառումներ)
| Գևորգ Հովհաննիսյան | |
|---|---|
| Ծնվել է | 1910 |
| Ծննդավայր | Վաղարշապատ, Երևանի նահանգ, Կովկասի փոխարքայություն, Ռուսական կայսրություն |
| Մահացել է | անհայտ |
| Քաղաքացիություն |  Ռուսական կայսրություն և  ԽՍՀՄ |
| Կրթություն | Կրուպսկայայի անվան կոմունիստական դաստիարակության ակադեմիա |
| Մասնագիտություն | մանկավարժ |
| Կուսակցություն | ԽՄԿԿ |
| Պարգևներ և մրցանակներ | |
Գևորգ Հովհաննեսի Հովհաննիսյան (1910, Վաղարշապատ, Երևանի նահանգ, Կովկասի փոխարքայություն, Ռուսական կայսրություն - անհայտ), հայ մանկավարժ։ ՀԽՍՀ վաստակավոր մանկավարժ։ Հայրենական մեծ պատերազմի մասնակից։ ԽՄԿԿ անդամ (1940):
Կենսագրություն
[խմբագրել | խմբագրել կոդը]Գևորգ Հովհաննիսյանը ծնվել է 1910 թվականին, Էջմիածնում։ 1929 թվականին ավարտել է հայրենի գյուղի միջնակարգ դպրոցը, Հոկտեմբերյանի շրջանում զբաղվել ուսուցչական աշխատանքով, Մրգաշատ, ապա Մեծ Շահրիրար գյուղերի դպրոցներում եղել տնօրեն, դասավանդել պատմություն։ Ընտրվել է շրջանի լուսավորության աշխատողների արհմիության շրջկոմի նախագահ։ 1939 թվականին Լենինգրադի Ն. Կ. Կրուպսկայայի անվան կոմունիստական համալսարանն ավարտելուց հետո նշանակվել է Հայաստանի լուսավորության նախարարությունում դասախոսական և էքսկուրսիոն բյուրոյի նախագահ[1]։
1939 թվականին զորակոչվել է կարմիր բանակ, ծառայել միջինասիական զինվորական օկրուգում։ Սովորել է Թերմեզ քաղաքի հրետանային դպրոցում, ավարտելուց հետո նշանակվել է 83-րդ լեռնահրաձգային թուրքմենական դիվիզիայի 67-րդ հրետանային գնդի առաջին մարտկոցի հրամանատար։ 1940 թվականին Հովհաննիսյանը ընդունվել է ԽՄԿԿ շարքերը։
1942 թվականի նոյեմբերի 18-ին 83-րդ դիվիզիայում Հովհաննիսյանը մարտեր է մղել Տուապսեից հյուսիս արևելք, մասնակցել է Մոզդոկ, Կերչի, Սևաստոպոլի ազատագրման մարտերին։ 1944 թվականի սեպտեմբերին ավագ լեյտենանտ Հովհաննիսյանը նշանակվել է գնդի հրամանատարի տեղակալ։ Կռվել է 1-ին, 3-րդ ուկրաինական ռազմաճակատներում, մասնակցել է Լեհաստանի և Չեխոսլովակիայի ազատագրման մարտերին։ Հովհաննիսյանը պարգևատրվել է Հայրենական պատերազմի երկրորդ աստիճանի և Կարմիր աստղի շքանշաններով ու մի շարք մեդալներով։
1946 թվականին Հովհաննիսյանը զորացրվել է բանակից, աշխատանքի անցել Երևանի Փանոս Թերլեմեզյանի անվան նկարչական ուսումնարանում՝ որպես տնօրեն և պատմության ուսուցիչ[1]։
1962 թվականին Հովհաննիսյանն արժանացել է ՀԽՍՀ վաստակավոր ուսուցչի կոչման, պարգևատրվել է մեդալներով և գովասանագրերով[1]։
Պարգևներ
[խմբագրել | խմբագրել կոդը]- «Կարմիր աստղի» շքանշան
- ՀԽՍՀ վաստակավոր մանկավարժ
- Հայրենական պատերազմի երկրորդ աստիճանի շքանշան