1-2 մ բարձրությամբ հոտավետ, կարճ, հաստ կոճղարմատով, ուղիղ, ամուր, բարձր, կողավոր, վերին մասում ճյուղավոր ցողունով, քամու և ջրի միջոցով տարածվող սերմերով, կոճղարմատի միջոցով բազմացող բազմամյա խոտաբույս է։ Ստորին հատվածը սպիտակ թավով ծածկված փետրաձև տերևների փոքր սղոցաեզր տերևիկները երկարավուն-ձվաձև են, մուգ կանաչ և մերկ։ 3-5-բլթակավոր, վերջին ծայրային տերևը խոշոր է։ Խիտ հուրանաձև ծաղկաբույլերում հավաքված են մանր, բազմաթիվ, սպիտակ, հոտավետ, հնգանդամ ծաղիկները։ Պսակաթերթիկները երկար եղունգներով են, իսկ բազմաթիվ առէջները երկար են պսակաթերթիկներից։ Չբացվող միասերմ, մերկ տերևապտուղը պարուրաձև ոլորված է[1]։
Բուժական նպատակներով օգտագործում են բույսի վերգետնյա մասը կամ ծաղկաբույլերը։ Չոր կամ թարմ ծաղիկներից պատրաստում են հատուկ հաճելի հոտավետ թեյ, որն օգնում է հազի, անգինայի, գլխացավերի, ստամոքսի, աղիքների ցավերի և խոցերի բուժման համար[1]։