Նժդեհյան Ցեղակրոն կուսակցություն

Վիքիպեդիայից՝ ազատ հանրագիտարանից
(Վերահղված է Նժդեհյան Ցեղակրոնից)

Նժդեհյան Ցեղակրոն, ՆՑԿ, նոր հայ հեթանոսական ազգայնական կուսակցություն Հայաստանում։ Կուսակցության ղեկավարն է Գևորգ Հովսեփյանը։

Պատմություն[խմբագրել | խմբագրել կոդը]

1989 թվականի հունվարի 14-ին Գևորգ Հովսեփյանի, Գագիկ Մկրտչյանի և Աշոտ Աբրահամյանի նախաձեռնությամբ տեղի ունեցավ «Նժդեհյան Ցեղակրոն» կուսակցության Հիմնադիր Ժողովը՝ 47 ներկայացուցիչ-անդամների մասնակցությամբ։ Կուսակցության գաղափարական հիմքն է Գարեգին Նժդեհի կողմից մշակված ցեղակրոնություն գաղափարախոսությունը։ Հիմնադիր Ժողովում քննարկվեց ստեղծվելիք կուսակցության «Հռչակագիրը, կանոնադրական սկզբունքները և ծրագիրը» գրքույկը, որն ընդունվեց որպես հիմք՝ առաջիկայում վերամշակելու և լրացնելու պայմանով։ Ընտրվեց կուսակցության խորհուրդ, որն էլ ընտրեց կազմակերպության նախագահին։ «Նժդեհյան Ցեղակրոն» կուսակցության նախագահն առ այսօր Գևորգ Հովսեփյանն է։ Հիմնադիր ժողովը հաստատեց նաև կուսակցության դրոշն ու խորհրդանշանը[1]։

1991 թվականի հուլիսի 15-ին ՀՀ Արդարադատության նախարարության կոլեգիայի թիվ 40/3 որոշմամբ «Նժդեհյան Ցեղակրոն» կուսակցությունը գրանցվեց որպես հասարակական-քաղաքական կազմակերպություն։ 1992 թվականի հունվարին հիմնվեց կազմակերպության «Խոսք Արիական» պաշտոնաթերթը, որը սակայն շուտով արգելվեց ՀՀ Արդարադատության նախարարության 1992 թվականի մարտի 19-ի ե-916 հրամանով։ Պատճառաբանությունը հետևյալն էր, որ հասարակական գիտակցության մեջ «Արիական» տերմինն ընկալվում է որպես իր մեջ ռասայական խտրականության տարրեր պարունակող հասկացություն։

1991 թվականին կուսակցության ՆՑԿ ստեղծվեց «Ցեղային արթնություն» կազմակերպությունը, որտեղ հաճախում էին տարբեր ազգայնական կազմակերպությունների ներկայացուցիչներ։

1998 թվականի ապրիլի 10-ին կուսակցությունը «Ազգայնական ակումբ»-ի և Հայ Արիական-Ցեղապաշտական կուսակցության (այժմ՝ Հայ Արիական Միաբանություն) հետ միասին հիմնադրեցին Հայ Ազգայնական Դաշինք քաղաքական-գաղափարական միավորումը, որը հրատարակեց «Մեր հավատամքը և անելիքները» գրքույկը՝ համատեղ ընդունված ազգայնական գաղափարախոսության ու ազգայնական հիմնախնդիրների լուսաբանման վերաբերյալ։ Կուսակցությունն առանձին և համատեղ (ՀԱԴ-ի, «Արորդիների Ուխտ»-ի և այլն) հրատարակել է մի շարք աշխատություններ, այդ թվում՝ «Ցեղակերտում» և «Արարատյան դրցաբանություն» գրքերը։

1997 թվականին ՆՑԿ-ն Հայ Արիական Միաբանության, «Հայ Դատ» կազմակերպություն և այլ ազգայնական կազմակերպությունների հետ նպաստեց «Ազգայնական ակումբ»-ի ստեղծմանը, որն այնուհետև պետականորեն գրանցվեց ու դարձավ հասարակական կազմակերպություն։ «Ազգայնական ակումբ»-ի նպատակն է ամբողջացնել և հզորացնել ազգայնական դաշտը Հայաստանում։ Այս կառույցի միջոցով հրատարակվեց «Ազգայնական միտք» մատենաշարը, որը ներկայացրեց Գարեգին Նժդեհի, Հայկ Ասատրյանի ազգայնական ուսմունքները և հայ դասական ազգայնականության այլ գործեր։

2000 թվականի հունվարին ՆՑԿ-ի նախաձեռնությամբ ստեղծվեց «Հայկական դիմադրական շարժում» կազմակերպությունը։ Կուսակցությունը համագործակցում է Հայ արիական միաբանության հետ։

Մասնակցությունը Արցախյան ազատամարտում[խմբագրել | խմբագրել կոդը]

Կուսակցությունն իր հնարավորության սահմաններում մասնակցություն ունեցավ Արցախյան ազատամարտին։ 1994 թվականի մայիսին Արցախում զոհվեց կուսակցության փոխնախագահ Աշոտ Աբրահամյանը։

Անդամակցություն[խմբագրել | խմբագրել կոդը]

Կուսակցության անդամ կարող են դառնալ 18 տարին լրացած այն անձինք, որոնք ծագումով հայ են և ճանաչում են իրենց տոհմը։ Կուսակցության անդամներն իրենց համարում են Արորդի և անդամագրվելու ժամանակ երդում են տալիս Գառնու Միհրի տաճարում։

Տես նաև[խմբագրել | խմբագրել կոդը]

Արտաքին հղումներ[խմբագրել | խմբագրել կոդը]

Ծանոթագրություններ[խմբագրել | խմբագրել կոդը]