Գագիկ Եղիազարյան
- Վիքիպեդիայում կան հոդվածներ Եղիազարյան ազգանունով այլ մարդկանց մասին։
| Գագիկ Եղիազարյան | |
|---|---|
| Ծնվել է | 1925 |
| Ծննդավայր | Դդմաշեն, Նոր Բայազետի գավառ, Հայկական ԽՍՀ, ԱԽՖՍՀ, ԽՍՀՄ |
| Քաղաքացիություն |  ԽՍՀՄ |
| Կրթություն | Հայկական պետական մանկավարժական համալսարան |
| Մասնագիտություն | մանկավարժ |
| Պարգևներ և մրցանակներ |  և  |
Գագիկ Բալաբեկի Եղիազարյան (1925, Դդմաշեն, Նոր Բայազետի գավառ, Հայկական ԽՍՀ, ԱԽՖՍՀ, ԽՍՀՄ), հայ մանկավարժ, Երկրորդ համաշխարհային պատերազմի Արևելյան ռազմաճակատի («Հայրենական մեծ պատերազմ», 1941-1945) գործողությունների մասնակից։
Կենսագրություն[խմբագրել | խմբագրել կոդը]
Գագիկ Եղիազարյանը ծնվել է 1925 թվականին Սևանի շրջանի Դդմաշեն գյուղում։ Դպրոցը դեռ չավարտած, Գագիկն իր խնդրանքով զորակոչվել է կարմիր բանակ[1]։
Ծառայել է 336-րդ հրաձգային գնդում, ստացել է սերժանտի կոչում և 1943 թվականին մեկնել է ռազմաճակատ։ Կռվել է Կուրսկի ճակատամարտում։ 1-ին Բելոռուսական ռազմաճակատի 15-րդ դիվիզիայի 47-րդ հրաձգային գնդի կազմում ջոկի հրամանատար Եղիազարյանը 1943 թվականի հոկտեմբերի 14-ին մասնակցել է Դնեպր գետի անցմանը Գոմելի մարզում։ Մարտում վիրավորվել է, բայց չի հեռացել առաջավոր գծից։ Դնեպրի աջ ափում գրաված դիրքերն ամրապնդելու համար Եղիազարյանը պարգևատրվել է «Հայրենական պատերազմի» 2-րդ աստիճանի շքանշանով։ Մասնակցել է Օսիպովիչ, Սլուցկ, Բարանովիչ և մի շարք քաղաքների ու բնակավայրերի ազատագրման մարտերին, պարգևատրվել Փառքի երրորդ աստիճանի շքանշանով և մեդալներով։ Մարտերից մեկում Եղիազարյանը ծանր վիրավորվել է և 1945 թվականին զորացրվել է բանակից[1]։
Զորացրվելուց հետո 1946-1951 թվականներին Եղիազարյանը մանկավարժական աշխատանք է կատարել Սևանի շրջանի դպրոցներում։ 1951-1955 թվականներին սովորել է Երևանի Խաչատուր Աբովյանի անվան պետական մանկավարժական ինստիտուտի աշխարհագրական ֆակուլտետում, որն ավարտելուց հետո նշանակվել է հայրենի գյուղի դպրոցի աշխարհագրության ուսուցիչ։ 1958 թվականին տեղափոխվել է նորաստեղծ Գագարինավանի դպրոցը։ Եղել է Հայաստանի աշխարհագրական ընկերության Սևանի բաժանմունքի նախագահը։ Պարգևատրվել է ՀԽՍՀ լուսավորության նախարարության և արհմիության հանրապետական կոմիտեի պատվոգրերով[1]։
Պարգևներ[խմբագրել | խմբագրել կոդը]
- Հայրենական պատերազմի 2-րդ աստիճանի շքանշան
- Փառքի երրորդ աստիճանի շքանշան