Բոգդան Վերդյան

Բոգդան Հակոբի Վերդյան
Ծնվել է	սեպտեմբերի 20, 1919(1919-09-20)
Ծննդավայր	Բեգում Սարով, Ելիզավետպոլի գավառ, Ադրբեջանի ժողովրդավարական հանրապետություն
Վախճանվել է	դեկտեմբերի 1, 1992 (73 տարեկան)
Վախճանի վայր	Երևան, Հայաստան
Մասնագիտություն	գրող և դասախոս
Ազգություն	հայ
Քաղաքացիություն	ԽՍՀՄ, Հայաստան
Կրթություն	Հայկական պետական մանկավարժական համալսարան (1941)
Գիտական աստիճան	բանասիրական գիտությունների դոկտոր (1970)
Անդամակցություն	ԽՍՀՄ Գրողների միություն
Կուսակցություն	ԽՄԿԿ
Աշխատավայր	Հայկական պետական մանկավարժական համալսարան
Բոգդան Վերդյան Վիքիդարանում

Բոգդան Հակոբի Վերդյան (սեպտեմբերի 20, 1919, Բեգում Սարով, Ելիզավետպոլի գավառ, Ադրբեջանի ժողովրդավարական հանրապետություն - դեկտեմբերի 1, 1992, Երևան, Հայաստան), խորհրդային և հայ գրող, բանասիրական գիտությունների դոկտոր, պրոֆեսոր (1973 թ.-ից), ԽՍՀՄ գրողների միության անդամ (1957 թ.-ից), ԽՄԿԿ անդամ (1945 թ.-ից), Հայրենական մեծ պատերազմի մասնակից։

Կենսագրություն

Բոգդան Վերդյանը ծնվել է 1919 թ. սեպտեմբերի 20-ին Ելիզավետպոլի նահանգի Բեգում Սարով գյուղում։ 1941 թ.-ին ավարտել է Երևանի պետական մանկավարժական ինստիտուտի բանասիրական ֆակուլտետը, որտեղ և դասախոսել է 1948 թ.-ից, եղել է ֆակուլտետի դեկան (1964 թ. և 1978 թ.), պրոռեկտոր (1965-1969), 1973 թ.-ից՝ հայոց լեզվի ամբիոնի պրոֆեսոր։ Վերդյանը մասնակցել է Հայրենական մեծ պատերազմին, վիրավորվել և զորացրվել 1943 թվականին։ 1943-1944 թթ.-ին ուսուցչություն է արել Լեռնային Ղարաբաղի Ինքնավար Մարզում։ 1944 թ. ընդունվել է Երևանի Խաչատուր Աբովյանի անվան հայկական մանկավարժական ինստիտուտի ասպիրանտուրան։ 1952 թ. «Ձևաբանության հարցերը Մանուկ Աբեղյանի քերականական համակարգում» թեմայով դիսերտացիա է պաշտպանել և ստացել բանասիրական գիտությունների թեկնածուի աստիճան։ 1970 թ. «Բարդ ստորադասական նախադասության շարահյուսություն» թեմայով ատենախոսություն է պաշտպանել և ստացել բանասիրական գիտությունների դոկտորի աստիճան։

Բոգդան Վերդյանը մահացել է 1992 թ. դեկտեմբերի 1-ին Երևանում 73 տարեկան հասակում։

Ստեղծագործությունը

Գրել է պատերազմական թեմայով «Քեզ համար, Լենինգրադ» (1951) և ետպատերազմյան տարիների աշխատավոր մարդու ներաշխարհն արտացոլող «Ինչպես է գալիս երջանկությունը» (1957) վեպերը։ Մարդու անձնական և հասարակական հետաքրքրությունների փոխհարաբերության մասին է «Լեռների որդին» (1962) վեպը։ Լայն ընդունելություն է գտել «Ծաղիկներս մնացին հեռվում» (1969) վեպը, որն արտացոլում է հայ ժողովրդի ազատագրական պայքարը 1915-1920 թթ. և ժողովրդական վրիժառու Սողոմոն Թեհլիրյանի կյանքն ու գործը 1915-1921 թթ.-ին՝ ընդհուպ մինչև երիտթուրքական պարագլուխ, մեծ ոճրագործ Թալեաթի սպանությունն ու Բեռլինյան դատավարությունը։ Վերդյանն իր եռերգության առաջին («Այրվող ալիքներ», 1977) և երկրորդ («Երկխոսություն», 1980) գրքերում պատկերել է հայ ժողովրդի ազգային վերածնունդն ու սփյուռքահայերի («այրվող ալիքների») ձգտումը դեպի Խորհրդային Հայաստան։ Ուսանողության կյանքը, նոր մարդու ձևավորման պրոցեսն է արտացոլված նրա «Երրորդ կուրսը» (1975) վիպակում։ Վերդյանը հեղինակ է նաև «Բարդ ստորադասական նախադասության շարահյուսություն» (1970) մենագրության և լեզվաբանական այլ աշխատությունների։ Ռուսերեն լույս է տեսել Վերդյանի «Լեռների որդին» (Մոսկվա, 1965) գիրքը։

Երկեր

• Քեզ համար, Լենինգրադ, Երևան, 1951, 392 էջ։
• Ինչպես է գալիս երջանկությունը, Երևան, 1958, 419 էջ։
• Լեռների որդին, Երևան, 1962, 472 էջ։
• Ծաղիկներս մնացին հեռվում, Երևան, 1969, 460 էջ։
• Բարդ ստորադասական նախադասության շարահյուսություն, Երևան, 1970, 376 էջ։
• Երրորդ կուրսը, Երևան, 1975, 164 էջ։
• Այրվող ալիքներ, Երևան, 1977, 415 էջ։
• Երկխոսություն, Երևան, 1980, 432 էջ։
• Արտակարգ դեսպաններ, Երևան, 1985, 416 էջ։
• Ծաղիկներս մնացին հեռվում, Երևան, 1990, 416 էջ։

Գրականություն

• Հայկ Խաչատրյան, Գրական տեղեկատու, Երևան, 1986։
• Հայկական համառոտ հանրագիտարան, հատ. 4, Երևան, 2003։
• Ով ով է /Հայեր։ Կենսագրական հանրագիտարան/, հատ. 2, Երևան, 2007։

Ծանոթագրություններ

Վիքիդարանն ունի նյութեր, որոնք վերաբերում են «Բոգդան Վերդյան» հոդվածին։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 11, էջ 399)։