Ավետիս Բերբերյան (կոմպոզիտոր)

Ավետիս Բերբերյան
Ի ծնե անուն	Ավետիս Անդրանիկի Բերբերյան
Ծնվել է	նոյեմբերի 21, 1966 (58 տարեկան); Երևան, Հայկական ԽՍՀ, ԽՍՀՄ
Մասնագիտություն	Կոմպոզիտոր
Աշխատավայր	Հայաստանի ազգային ֆիլհարմոնիկ նվագախումբ, Գալա Արտ և Հայաստանի կոմպոզիտորների միություն
Կրթություն	Երևանի միջնակարգ մասնագիտական երաժշտական դպրոց Չայկովսկու անվան և Երևանի Կոմիտասի անվան պետական կոնսերվատորիա
Ամուսին	Նուշիկ Միքայելյան

Ավետիս Անդրանիկի Բերբերյան (նոյեմբերի 21, 1966(1966-11-21), Երևան, Հայկական ԽՍՀ, ԽՍՀՄ), հայ կոմպոզիտոր։

Բանաստեղծուհի, հրապարակախոս Նուշիկ Միքայելյանի ամուսինն է։

Կենսագրություն

Ավարտել է Երևանի Չայկովսկու անվան երաժշտական մասնագիտական դպրոցի թավջութակի դասարանը, ապա՝ Երևանի Կոմիտասի անվան պետական կոնսերվատորիայի կոմպոզիտորական բաժինը՝ Էդգար Հովհաննիսյանի դասարանը։ Եղել է «Մետրո» թատրոնի երաժշտական ղեկավարը, որտեղ ստեղծել է մի քանի երաժշտական ներկայացում՝ «Տերն ու ծառան», «Կախարդված արքայազնը» և այլն։ 1988 թվականին հրավիրվել է Մոսկվա` աշխատելու ռուս ռեժիսոր Վիշնևսկու հետ` ստեղծելով «Տեր փրկյա նրանց» դոկումենտալ ֆիլմի երաժշտությունը՝ նվիրված 1988 թվականի երկրաշարժի զոհերի հիշատակին։ 1989 թվականին աշխատել է Երևանի Արվեստի կենտրոնում, որտեղ հիմնադրել է «Երիտասարդ տաղանդների կամերային նվագախումբն» ու «Մանկական ջազային երգչախումբը»։ Խմբերը մասնակցել են բազմաթիվ երաժշտական փառատոների Խորհրդային Միությունում՝ ստանալով մի քանի մրցանակներ։ 1991 թվականին մանկական ջազային նվագախումբը Թբիլիսիում շահել է գլխավոր մրցանակ՝ որպես «Կովկասի լավագույն մանկական երգչախումբ»։ 1993-2000 թվականներին աշխատել է Հայաստանի պետական ֆիլհարմոնիկ նվագախմբում` որպես համերգա-հյուրախաղային բաժնի տնօրեն^[1]։ 2012 թվականից հանդիսանում է «Գալա Արտ» ցուցասրահի հիմնադիր տնօրենը։ 2014 թվականից Հայաստանի կոմպոզիտորների միության փոխնախագահն է^[2]։

Ստեղծագործական գործունեություն

Ավետիս Բերբերյանն ստեղծել է բազմաթիվ երաժշտական գործեր սիմֆոնիկ նվագախմբի և երգչախմբի համար, հեղինակել է երկու օրհներգեր՝ Շուշիի հիմնը (2012) և Արտաշատ քաղաքի հիմնը (2012)։ 2011 թվականին, ԱՄՆ Օքլանդ Իսթ Բեյ Սիմֆոնիկ նվագախմբի և երգչախմբի կատարմամբ աշխարհահռչակ Paramount Theater դահլիճում, հնչել են Ավետիս Բերբերյանի ստեղծագործությունները։

Ստեղծագործություններ

«Մայրամուտ» – Նվիրված Առնո Բաբաջանյանի հիշատակին։ Դաշնամուրի և սիմֆոնիկ նվագախմբի համար
«Ճակատամարտ» - Սիմֆոնիկ պատկեր – Սիմֆոնիկ նվագախմբի համար
«Ճանապարհը» – Սիմֆոնիկ պատկեր – Սիմֆոնիկ նվագախմբի համար
«Հետապնդում» – Սիմֆոնիկ պատկեր Սիմֆոնիկ նվագախմբի համար
«Արաբական արշավանքներ» – Սիմֆոնիկ պատկեր – Սիմֆոնիկ նվագախմբի համար
«Անձրևոտ օր» – դաշնամուրի և սիմֆոնիկ նվագախմբի համար
«Կարոտ» - շեփորի և սիմֆոնիկ նվագախմբի համար
«Վերադարձ» – վոկալի և սիմֆոնիկ նվագախմբի համար
«Աղոթքս քեզ, Երևան» – Բալլադ- Մեներգիչների, սիմֆոնիկ նվագախմբի և երգչախմբի համար։
«Միայնություն» Պիես – Թավջութակի և դաշնամուրի համար
«Աշնանային մտորումներ» – Սաքսոֆոնի և կամերային նվագախմբի համար
«Կապրիչչիո» – Սիմֆոնիկ նվագախմբի համար
«Գրոսսո» – Սիմֆոնիկ պատկեր -Սիմֆոնիկ նվագախմբի համար
«Քամիներից այն կողմ» – դաշնամուրի և սիմֆոնիկ նվագախմբի համար
«Տերն ու ծառան» – մյուզիքլ
«Կախարդված արքայազնը» - մյուզիքլ
«Իմ մայր» – բալլադ – վոկալի, երգչախմբի և սիմֆոնիկ նվագախմբի համար
«Ելիր, ով հայ» - բալլադ – Սոպրանոյի, տենորի, երգչախմբի և սիմֆ. նվագախմբի համար
«Ադաջիո» – սիմֆոնիկ նվագախմբի համար
«Պոեմ» – ջութակի և սիմֆոնիկ նվագախմբի համար
«Կալիգուլա» – թատերական ներկայացում
«Ռապսոդիա» - դաշնամուրի և սիմֆոնիկ նվագախմբի համար
Արտաշատի օրհներգը – Մեներգիչների և սիմֆոնիկ նվագախմբի համար
Շուշիի օրհներգը – երգչախմբի և սիմֆոնիկ նվագախմբի համար
Ադաջիետտո – թավջութակի և սիմֆոնիկ նվագախմբի համար
«Կյանքն այս» – վոկալի և էստրադային սիմֆոնիկ նվագախմբի համար

Մրցանակներ

«Երիտասարդ Կոմպոզիտորներ» մրցույթի գլխավոր մրցանակ, Չեխոսլովակիա, իր հեղինակած «Հայաստանի երեխաների հիմնը» երգի համար, 1985
«ԱՅՈ» ամենամյա երգի մրցանակաբաշխության երկրորդ մրցանակ՝ «Իմ մայր» երգի համար, 1998
«Սայաթ Նովա» համահայկական ամենամյա երգի մրցանակաբաշխության գլխավոր մրցանակ՝ «Ելի՛ր, ով հայ» բալլադի համար, 2000
Սաքսոֆոնահարների հանրապետական մրցույթի երրորդ մրցանակ՝ «Աշնանային մտորումներ» պիեսի համար, 2008

Ծանոթագրություններ

Արտաքին հղումներ

[1] «Ավետիս Բերբերյանի կենսագրությունը zarkfoundation.com կայքում».

[2] Ավետիս Բերբերյան

[1]

[2]