Երկար, հանգույցավոր կոճղարմատներով բազմամյա խոտաբույս է։ Հակադիր երկարավուն-նշտարաձև սղոցաեզր տերևները աճում են 30-60 սմ բարձրությամբ ճյուղավոր ցողունի վրա։ Ցողունի ստորին և միջին մասում աճող տերևները կոթունավոր են, իսկ վերինները՝ նստադիր։ Տերևածոցերում խմբված են երկշուրթ հնգանդամ ծիրանագույն կամ վարդագույն-մանուշակագույն ծաղիկները, որոնք առաջացնում են երկարավուն հասկանման ծաղկաբույլեր։ Զանգականման խողովակաձև բաժակը կրկնակի անգամ կարճ է պսակից։ Չորս առէջները երկուժ են, իսկ պտուղը կազմված է 4 փոքր, մուգ դարչնագույն պտղիկներից[1]։
Բուժական նպատակներով օգտագործում են բույսի վերգետնյա մասը, որը հավաքում են ծաղկման շրջանում։ Չորացած և մանրացած արմատներից պատրաստում են ալյուր, որն օգտագործում են հաց թխելու համար, իսկ վերգետնյա մասից ստանում են կանաչ ներկանյութ[1]։
