Արշավիր Խոնդկարյան

Արշավիր Խոնդկարյան (1889, մարտի 1 - 1957, ապրիլի 15) - հայ թարգմանիչ, ԽՍՀՄ գրողների միության անդամ 1934-ից։ Կրել է Անվեհեր, Շեշտ, Պսպոր ծածկանունները։

Ծնվել է Սուրմալուի գավառի Հախվերիս գյուղում։ Միջնակարգ կրթություն ստացել է Իգդիրի ռուսական դպրոցում։ 1909-15-ին ուսուցչություն է արել Կոշ (այժմ` Արագածոտնի մարզում), Մոլլա-Գյոկչա (Սուրմալուի գավառում), Մեծ Շահրիար (այժմ` Արմավիրի մարզում), Ճաթղռան (այժմ` Կոտայքի մարզի Գեղաշեն), Առաքյուլ (Լեռնային Ղարաբաղի Հադրութի շրջան) գյուղերում։ 1915-18-ին ծառայել է բանակում։ 1918-21-ին որպես թարգմանիչ աշխատել է «Նոր աշխատավոր» թերթի խմբագրությունում, միաժամանակ սովորել Անդրկովկասյան համալսարանի (Թիֆլիս) պատմագրական ֆակուլտետում։ 1921-23-ին եղել է ՀԽՍՀ լուսժողկոմատի գլխքաղլուսի հրահանգիչ-դասախոս, բաժնի վարիչ, 1923-26-ին` թարգմանիչ «Խորհրդային Հայաստան» օրաթերթում, 1926-27-ին` Արմենտայի (Արմենպրես) պատասխանատու խմբագիր, 1927-32-ին` «Խորհրդային Հայաստան» թերթի թարգմանիչ և ոճաբան, 1932-33-ին` «Հայկինո»-ի սցենարիստ, 1934-38-ին` «Խորհրդային Հայաստան» թերթի բաժնի վարիչ, թարգմանիչ, 1938-57-ին` Հայպետհրատում թարգմանիչ։ Մահացել է Երևանում։