Հայաստանի նախագահի նստավայր

Հայաստանի նախագահի նստավայր
Տեսակ	պաշտոնական նստավայր և շենք
Երկիր	Հայաստան
Տեղագրություն	Երևան
Փողոց	Մարշալ Բաղրամյան պողոտա (26)
Բնակիչ	Հայաստանի Նախագահ
Օգտագործվում է	պաշտոնական նստավայր
Հիմնադրված է	1951
Ճարտարապետ	Մարկ Գրիգորյան
Պաշտոնական կայք

Հայաստանի Հանրապետության նախագահի նստավայրը հանդիսանում է Հայաստանի Հանրապետության նախագահի աշխատանքային վայրը, տեղակայված է Երևանում` Մարշալ Բաղրամյան պողոտա 26 հասցեով։

Պատմություն

Նստավայրի շենքը նախագծվել է 1951 թ-ին որպես Հայաստանի ԽՍՀ Մինիստրների Խորհրդի տուն,, հետագայում ծառայել է որպես Հայաստանի ԽՍՀ Գերագույն Խորհրդի նախագահության շենք։ Նախագծի հեղինակը Մարկ Գրիգորյանն է։ Շենքը եղել է երկհարկանի, ենթարկվել է վերակառուցման, և մակերեսը կազմել է 2720 քմ։ Առաջին հարկի 338 քմ մակերեսով 10մ բարձրությամբ տարածքը նախատեսված է ընդունելությունների համար՝ առանձին սրահներով։

1987 թվականին շենքը վերակառուցվել է «Հայարդնախագիծ» ինստիտուտի նախագծի հիման վրա։ Շենքի երկու կողմերում ավելացվել է 10մ լայնությամբ և 6մ երկարությամբ երկու եռահարկ շենք։ Վերակառուցման արդյունքում շենքի ընդհանուր մակերեսը կազմել է 4470 քմ։

1992 թ-ից ծառայում է որպես Հայաստանի Հանրապետության նախագահի նստավայր։

2009-2010 թթ. Հայաստանի Հանրապետության վաստակավոր ճարտարապետ Նարեկ Սարգսյանի նախագծով շենքի առանցքով ետնամասում կառուցվել է քառահարկ շինություն, որպես վարչական մասնաշենք 3150.0 քմ ընդհանուր մակերեսով։ Շենքի արտաքին պատերը երեսապատված են բաց դեղնավուն ֆելզիտով և տրավերտինով։

Կառուցվածք

Առաջին հարկը և երրորդ հարկի մի հատվածը նախատեսված են ընդունելությունների համար՝ առանձին սրահներով։ Շենքի մնացած հատվածը ծառայում է որպես վարչական մաս։ Շենքի արտաքին պատերը կառուցված են դեղնավուն տուֆով։

Գեղանկարների հավաքածու

ՀՀ նախագահի նստավայրի տարբեր սրահներում են պահվում Հովհաննես Այվազովսկու, Փանոս Թերլեմեզյանի, Մարտիրոս Սարյանի, Գևորգ Բաշինջաղյանի, Հակոբ Հակոբյանի և մի շարք այլ նշանավոր նկարիչների գեղանկարները, որոնք ի պահ են տրվել նախագահի աշխատակազմին Հայաստանի ազգային պատկերասրահի կողմից։

Հետաքրքրական

• 1960 թվականին Մարկ Գրիգորյանը, որպես շենքի նախագծի հեղինակ, պարգևատրվել է Հայկական ԽՍՀ Գերագույն Խորհրդի պատվոգրով։
• Բաղրամյան 26 վարչական շենքը ՀՀ կառավարության որոշմամբ 2004 թվականին ընդգրկվել է Երևան քաղաքի պատմության և մշակույթի անշարժ հուշարձանների պետական ցուցակում՝ որպես հանրապետական նշանակության հուշարձան։

Հղումներ

• Նախագահի նստավայրը - Պատմություն