Հայ բժշկության թանգարան

Հայ բժշկության թանգարան
Տեսակ	թանգարան
Երկիր	Հայաստան
Տեղագրություն	Երևան
Հասցե	Երևան, Արշակունյաց պողոտա 44/1, մուտք 4, հարկ 4, բնակարան 43 և Yerevan, Arshakunyats Avenue, 44/1, entrance 4, floor 4, apart. 43
Հիմնադրվել է	1999
Տնօրեն	Հարություն Մինասյան
Կայք	medicalmuseum.am(հայ.)

Հայ բժշկության թանգարան (Հարություն Մինասյանի անհատական հավաքածու), Հայ բժշկության թանգարան Երևանում, բացվել է 1999 թվականի մայիսի 18-ին։

Պատմություն

1999 թվականին թանգարանը գրանցվել է ՀՀ մշակույթի նախարարության մասնավոր թանգարանների ցուցակում և Ռիգայի Պաուլ Ստրադինի անվան բժշկության պատմության թանգարան-ինստիտուտում։
Թանգարանի նպատակն է հավաքել, պահպանել, ցուցադրել և սերունդներին փոխանցել հայ ժողովրդի դարավոր բժշկական մշակութային ժառանգությունը հանդիսացող նյութական և հոգևոր արժեքները, ինչպես նաև հայ բժշկության բազմադարյա հարուստ ավանդույթները պրոպագանդել Հայաստանի բնակչության, Սփյուռքի հայության և օտարերկրացիների շրջանում^[1]։

Ցուցադրություն

Թանգարանում ցուցադրված են Հարություն Մինասյանի հավաքածուի շուրջ 30 000 ցուցանմուշներից ընդամենը 10000։ Ցուցադրությունը կարելի է պայմանականորեն բաժանել մի քանի բաժինների՝

պեղածո-հնագիտական
երկրագիտական-ազգագրական
կենցաղային
բժշկության հետ առնչվող նյութեր
բուն բժշկական նյութեր
գրադարան
արխիվ
ֆոտոարխիվ

Թանգարանում ցուցադրված են պղնձե, կավե, հախճապակյա, ապակյա ամաններ, կժեր, սափորներ, սկահակներ, սրվակներ, մետաղյա, փայտե իրեր, բրոնզե, քարե, փայտե հավանգներ, բժշկական գործիքներ և սարքեր, երաժշտական գործիքներ, գրքեր, փաստաթղթեր, լուսանկարներ, կահույք, կահկարասի, պեղածո նյութեր, այդ թվում՝ մարդկային մասունքներ և այլն։ Թանգարանի արժեքավոր ցուցանմուշներից են Մեծամորից բերված 5000-ամյա սափորը, Գորիսից բերված կավե սրվակները, Արտաշատի Ջրահովիտ գյուղի պեղումներից հայտնաբերված մարդու 5000-ամյա կմախքը՝ գանգոսկրի ախտաբանությամբ, 100-200 տարի առաջ աշխարհի տարբեր քաղաքներում տպագրված հայկական բժշկական գրքեր՝ Պետրոս Քալանթարյանի 1793 թվականին Նոր Նախիջևանում տպագրված «Բժշկարան համառոտ» գիրքը, Մխիթար Հերացու՝ 12-րդ դարում գրված և 1832 թվականին Վենետիկում տպագրված «Ջերմանց մխիթարութիւն» գիրքը, հայ, ռուս և օտարազգի անվանի բժիշկների գրքեր, հաճախ ինքնագրերով, ընծայագրերով, մակագրություններով ու անձնական կնիքներով կնքված հրատարակություններ, 19-20-րդ դդ. նշանավոր բժիշկների ձեռագիր գրքեր և ուսանողական տետրեր, աշխարհի տարբեր քաղաքներում հրատարակված 100-150 տարվա հնության հայկական բժշկական պարբերականներ, հայ բժիշկների լուսանկարներ ու փաստաթղթեր, Երևանի բժշկական ինստիտուտի առաջին և հետագա տարիների շրջանավարտների խմբանկարներ, սփյուռքահայ բժիշկներին վերաբերող նյութեր, հարյուրավոր հայ բժիշկների կենսագրական նյութեր և այլն։ Այստեղ կարելի է տեսնել հայ բժիշկներին պատկանած կահույք, անձնական և կենցաղային իրեր՝ գրասեղաններ, գրապահարաններ, փայտե սառնարան, աթոռներ, սնդուկներ, կարասներ, երկանքներ, գուռ, քանդակներ, գեղանկարներ, խորհրդային և արտասահմանյան արտադրության պատեֆոններ, ռադիոընդունիչներ, հեռուստացույց, հեռախոսներ, ժամացույցներ, գյուղատնտեսական և խոհանոցային պարագաներ և այլն^[2]։

Հասցե

Հայ բժշկության թանգարանի նոր հասցեն. Երևան, Շենգավիթ, Արշակունյաց պող. տ. 44/1, մուտք 4, բն. 43: Հեռ. 093-30-92-37: Մուտքն անվճար է։ Անհրաժեշտ է նախօրոք զանգահարել ու պայմանավորվել օրն ու ժամը։
Նախկինում տեղակայվախ է եղել Երևանի Հրաչյա Քոչարի 21 հասցեում` «Նոր Արաբկիր» առողջության կենտրոնի 6-րդ հարկի 608 սենյակում։