Սասուն Մկրտչյան

Սասուն Ֆահրադի Մկրտչյան
հունիսի 10, 1989 - ապրիլի 3, 2016
Ծննդավայր	Հայաստան, Երևան
Մահվան վայր	Արցախ, Թալիշ
Գերեզման	Եռաբլուր
Քաղաքացիություն	Հայաստան
Ծառայության տարիներ	2011 - 2016
Կոչում	շարքային
Պաշտոն	հետախույզ-գնդացրորդ
Մարտեր/ պատերազմներ	Արցախա-ադրբեջանական «քառօրյա պատերազմ»
Պարգևներ	«Մարտական խաչ» 1-ին աստիճանի շքանշան «Մարտական ծառայություն» մեդալ

Սասուն Ֆահրադի Մկրտչյան (հունիսի 10, 1989(1989-06-10), Երևան, Հայկական ԽՍՀ, ԽՍՀՄ - ապրիլի 3, 2016(2016-04-03), Թալիշ, Թարթառի շրջան, Ադրբեջան), Հայաստանի Հանրապետության Զինված ուժերի պայմանագրային զինծառայող, հետախույզ-գնդացրորդ, շարքային։

Կենսագրություն

Կյանք և ուսում

Սասուն Մկրտչյանը ծնվել է 1989 թ. հունիսի 10-ին Երևանում՝ սասունցիների ընտանիքում։ Ունի հայր, մայր և քույր։

1996-2006 թթ սովորել է Հ. Հայրապետյանի անվան №78 դպրոցում։

10 տարեկանից զբաղվել է Մուայ թայ սպորտաձևով։ Մասնակցել է բազմաթիվ մրցույթների և պարգևատրվել տարբեր մեդալներով ու պատվոգրերով։ Վերջին տարիներին Սասունը հանդիսանում էր ֆեդերացիայի անդամ, ինչպես նաև մրցավար և մեկնաբան։

2009-2014 թթ սովորել է Երևանի դատական փորձագիտության և հոգեբանության ինստիտուտում։

2009-2011 թթ աշխատել է ՀՀ վերաքննիչ դատարանում՝ որպես կարգադրիչ։

Զինվորական ծառայություն

2007-2009 թթ անցել է պարտադիր ժամկետային ծառայության Շամշադինի զորամասում։

2011-2014 թթ ծառայել է Խաղաղապահ զորքերում։

2014 թվականից ծառայության է անցել ՀՀ Պաշտպանության նախարարության հատուկ նշանակության բրիգադում և 4-րդ հատուկ նշանակության ջոկատում՝ որպես հետախույզ-գնդացրորդ։ Մասնակցել է օպերատիվ ուղղության ուսումնասիրմանը, մարտական հերթապահությանը և հատուկ միջոցառումների կատարմանը։ Պարբերաբար մեկնում էր Արցախ՝ ծառայություն իրականացնելու։

Սասուն Մկրտչյանին նվիրված անկյուն

Քառօրյա պատերազմ

Սասուն Մկրտչյանը մասնակցել է 2016 թ. ապրիլյան քառօրյա պատերազմին Արցախի Մարտակերտի ՊԲ 33651 պահպանման տակ գտնվող մարտական դիրքերում։

Ապրիլի 1-ին հերթական անգամ ծառայությունն իրականացնելուց հետո վերադարձել է Արցախից։ Սակայն սահմանից թշնամու ակտիվության մասին լուրերը ստանալուն պես ապրիլի 2-ի առավոտյան Սասունին ևս կանչեցին առաջնագիծ։

Թալիշի դիրքը հետ գրավելիս Սասունի գնդացիրը փչացել է։ Զինակցից զենք է խնդրել, սակայն հրամանատարը չի թույլատրել։ Սասունը խնդրել է զինակցին վառել կրակայրիչը և սկսել է քանդել գնդացիրը։ Այդ ընթացքում հասցրել է վիրավոր ընկերներին հանել առաջնագծից և կրկին շտապել վերադարձնել կորցրած դիրքերը։

Ապրիլի 2-ի լույս 3-ի գիշերը Թալիշի դիրքերը հետ գրավելու ժամանակ որովայնի շրջանում ստացել է ծանր հրազենային վիրավորում։ Զինակից ընկերները նրան իջեցրել են դիրքերից և հանձնել շտապօգնությանը, սակայն Սասունի կյանքը փրկել չի հաջողվել։

Հուղարկավորություն

Սասուն Մկրտչյանի հոգեհանգիստը տեղի է ունեցել 2016 թ. ապրիլի 4-ին՝ Կոնդի Սբ. Հովհաննես եկեղեցում։

Մարտական խաչ առաջին աստիճանի շքանշան

Հուղարկավորությունը տեղի է ունեցել 2016 թ. ապրիլի 5-ին Եռաբլուր զինվորական պանթեոնում՝ զինվորական արարողակարգով։ Հուղարկավորությանը ներկա է գտնվել Հայաստանի Հանրապետության նախագահ Սերժ Սարգսյանը։

Պարգևներ

ԼՂՀ նախագահ Բակո Սահակյանի 2016 թ. N-32-Ա հրամանագրով Սասուն Մկրտչյանը հետմահու պարգևատրվել է «Մարտական ծառայության» մեդալով։

2016 թվականի մայիսի 4-ին ՀՀ նախագահ Սերժ Սարգսյանի հրամանագրով Սասուն Մկրտչյանը հետմահու պարգևատրվել է Հայաստանի Հանրապետության «Մարտական խաչ» I աստիճանի շքանշանով։

Խաղաղ ժամանակ Սասունն արժանացել է ՀՀ զինված ուժերի «Լավագույն զինվոր-մարտիկ» և «Մարտական պատրաստության գործում ունեցած բարձր ցուցանիշների համար» պատվոգրերի։

Հիշատակ

2016 թ. մայիսի 13-ի հրամանով Սասուն Մկրտչյանի անունը գրանցվել է ՀՀ ՊՆ 24923 զորամասի «Հավերժ զինվոր» ցուցակում։

2016 թ. հուլիսի 29-ին Արցախի Մարտակերտի շրջանի Թալիշի մարտական դիրքում տեղադրվեց Սասուն Մկրտչյանի հուշաքարը։

2016 թ. սեպտեմբերի 1-ին Երևանի Հ. Հայրապետյանի անվան №78 դպրոցում բացվեց Սասուն Մկրտչյանի անունը կրող դասասենյակ

2017 թ. մարտի 7-ին Արագածոտնի մարզի Կաքավաձոր գյուղի դպրոցում բացվեց Սասուն Մկրտչյանի անունը կրող դասասենյակ։

Ֆիլմեր

Սասուն Մկրտչյանի մասին նկարահանվել են «Ես, թե Հայրենիքս. Սասուն Մկրտչյան» և «Նվիրյալները. Սասուն Մկրտչյան» ֆիլմերը։

Տես նաև

• Քառօրյա պատերազմում զոհվածների ցանկ (2016)