Ռաֆայել Հարությունյան (մարզիչ)
Անվան այլ կիրառումների համար տե՛ս՝ Ռաֆայել Հարությունյան (այլ կիրառումներ)
| Ռաֆայել Հարությունյան | |
|---|---|
.JPG) | |
| Ծնվել է | հուլիսի 5, 1957 (66 տարեկան) |
| Ծննդավայր | Թբիլիսի, Վրացական ԽՍՀ, ԽՍՀՄ |
| Քաղաքացիություն |  Հայաստան |
| Ազգություն | հայ |
| Կրթություն | Ֆիզիկական կուլտուրայի հայկական պետական ինստիտուտ |
| Մասնագիտություն | գեղասահքի մարզիչ և գեղասահորդ |
 Rafael Arutyunyan Վիքիպահեստում | |
Ռաֆայել Վլադիմիրի Հարությունյան (հուլիսի 5, 1957, Թբիլիսի, Վրացական ԽՍՀ, ԽՍՀՄ), ԱՄՆ-ում աշխատող և բնակվող գեղասահքի հայ մարզիչ, նախկինում՝ գեղասահորդ։
Կենսագրություն[խմբագրել | խմբագրել կոդը]
Գեղասահքով սկսել է զբաղվել Թբիլիսիի խմբակում։ Սիրողական սպորտում մեծ նվաճումների չի հասել, եղել է ԽՍՀՄ սպորտի վարպետության թեկնածու։
Այնուհետև տեղափոխվել է Երևան, ավարտել Ֆիզիկական կուլտուրայի պետական ինստիտուտը։ 1976-1985 թթ. մարզիչ է աշխատել Երևանի գեղասահքի մանկապատանեկան դպրոցում։ Այնուհետև հրավեր է ստացել Մոսկվայից և 1983 թ.-ին տեղափոխվել է այնտեղ, քանի որ Երևանում չկար միջազգային չափանիշներին համապատասխանող սահադաշտ։ «Սոկոլնիկի» սպորտի պալատում աշխատել է կնոջ՝ Վերա Հարությունյանի հետ, որը ևս գեղասահքի խմբակ ուներ։
2000 թվականին տեղափոխվել է ԱՄՆ-ի Կալիֆոռնիա նահանգ և աշխատել Լեյք Էրոուհեդ քաղաքի «Ice Castle International Training Center» սահադաշտում[1][2]։ Այնուհետև, 2013 թվականի օգոստոսին նրան և կնոջը՝ նույնպես գեղասահքի մարզիչ Վերա Հարությունյանին, ինչպես նաև Նադեժդա Կանաևային հրավիրել են նույն նահանգի Արտիժա քաղաքի «East West Ice Palace»[3]։ Իսկ 2016 թվականի հունիսի 25-ից նա աշխատում է Լեյքվուդի «Lakewood ICE»-ում[4]։ 2019 թվականի հուլիսին ստացել է ամերիկյան քաղաքացիություն[5]։
Անվանի սաներ[խմբագրել | խմբագրել կոդը]
Հարությունյանի նախկին սաների թվում են Միշել Կվանը, Սաշա Քոենը, Ջեֆրի Բաթլը, Մաո Ասադան, Մայ Ասադան, Ալեքսանդր Աբտը, Սերգեյ Վորոնովը, Իվան Դինևը, Ալեքսանդր Շուբինը, Անտոն Կլիկովը։
2011 թվականին Հարությունյանը սկսել է համագործակցել պատանի Նեյթան Չենի, իսկ 2012-ին՝ ամերիկացի մեկ այլ գեղասահորդ Ադամ Ռիպոնի հետ։ 2013-2018 թվականներին մարզել է ամերիկացի գեղասահորդուհի Էշլի Վագներին, որպես նրա մարզիչ ներկա է եղել 2014 թվականի Սոչիի ձմեռային օլիմպիական խաղերին, որտեղ Վագները թիմային պայքարում դարձել է բրոնզե մեդալակիր, իսկ անհատական մրցումներում գրավել է 7-րդ տեղը։ 2016 թվականին նրա խումբ են տեղափոխվել մի քանի անվանի գեղասահորդներ՝ Մերայա Բելը, ֆրանսիացի Ռոմեն Պոնսարը և Միխալ Բրժեզինան։ Իսկ 2018 թվականին՝ ևս երկու տաղանդավոր պատանի մենասահորդուհիներ՝ ճապոնուհի Մարին Հոնդան և հարավկորեուհի Լիմ Ընսուն[6]։
Ռուսաստանում Ռաֆայել Հարությունյանը հայտնի է որպես գեղասահորդ Ալեքսանդր Աբտի, իսկ Արևմուտքում՝ աշխարհի հնգակի չեմպիոնուհի Միշել Կվանի վերջին մարզիչ[7]։
Հարությունյանի սան ամերիկացի Նեյթան Չենը 2018 թվականին դարձել է աշխարհի չեմպիոն՝ ազատ ծրագրում հաջող կատարելով վեց քառակի ցատկ[8]։ 2019 թվականին Չենը կրկին հաղթել է աշխարհի առաջնությունում՝ ազատ ծրագրում և երկու ծրագրերի հանրագումարով սահմանելով համաշխարհային ռեկորդ[9]։ 2022 թվականի ձմեռային օլիմպիական խաղերում նա դարձել է տղամարդկանց մենասահքի օլիմպիական չեմպիոն[10]։
Աղբյուրներ[խմբագրել | խմբագրել կոդը]
Ծանոթագրություններ[խմբագրել | խմբագրել կոդը]
- ↑ Հարությունյանը մարզում է Կվանին, Տարասովան` Արակավային
- ↑ Սերգեյ Վորոնով. Կարոտում եմ Մոսկվան(չաշխատող հղում)
- ↑ «Staff Coaches». East West Ice Palace. Արխիվացված օրիգինալից 2016 թ․ ապրիլի 14-ին.
- ↑ «Renowned Figure Skating Coach Rafael Arutyunyan to Make The Rinks – Lakewood Ice Main Training Facility Leading Into the 2018 Olympic Games». Anaheim Ducks / NHL. 2016 թ․ հունիսի 13. Արխիվացված օրիգինալից 2016 թ․ հունիսի 14-ին.
- ↑ Nick McCarvel (2019 թ․ օգոստոսի 5). «With Congrats from a Global Team of Skaters, Rafael Arutunian Becomes U.S. Citizen». usfigureskatingfanzone.com (անգլերեն).
- ↑ Хонда будет тренироваться под руководством Арутюняна.
- ↑ Ռ. Հարությունյան. Ասադան չի սահում միայն երբ քնած է
- ↑ «Рафаэл Арутюнян: кажется, Чен понял, что тренеру нужно доверять». rsport.ria.ru. Վերցված է 2018 թ․ մարտի 26-ին.
- ↑ «World Championships 2019». www.isuresults.com. Վերցված է 2019 թ․ հունիսի 12-ին.
- ↑ «Գեղասահորդ Նեյթան Չենը` Ռաֆայել Հարությունյանի սանը, դարձավ Օլիմպիական խաղերի չեմպիոն». Արխիվացված է օրիգինալից 2022 թ․ փետրվարի 10-ին. Վերցված է 2022 թ․ փետրվարի 10-ին.
 | Վիքիպահեստն ունի նյութեր, որոնք վերաբերում են «Ռաֆայել Հարությունյան (մարզիչ)» հոդվածին։ |
| ||||||
