Նիկոլայ Սկլիֆոսովսկի

Նիկոլայ Սկլիֆոսովսկի Николай Склифосовский
Ծնվել է	մարտի 25 (ապրիլի 6), 1836 Dzerjinscoe, Տիրասպոլսկի գավառ, Խերսոնի նահանգ, Ռուսական կայսրություն
Մահացել է	նոյեմբերի 30 (դեկտեմբերի 13), 1904 (68 տարեկան) Yakivtsi, Պոլտավա, Ռուսական կայսրություն բնական մահով
Գերեզման	Պոլտավա
Քաղաքացիություն	Ռուսական կայսրություն
Մասնագիտություն	վիրաբույժ, ֆիզիոլոգ և համալսարանի դասախոս
Հաստատություն(ներ)	Սուրբ Վլադիմիրի անվան կայսերական համալսարան, Կայսերական բժշկա-վիրաբուժական ակադեմիա, Մոսկվայի կայսերական համալսարան, Saint Petersburg Medical Academy of Postgraduate Education? և Մոսկվայի պետական համալսարան
Գործունեության ոլորտ	Վիրաբուժություն
Ալմա մատեր	Մոսկվայի համալսարանի բժշկական ֆակուլտետ և Մոսկվայի Ի. Սեչենովի անվան առաջին պետական բժշկական համալսարան
Գիտական աստիճան	գիտությունների դոկտոր (1863)
Հայտնի աշակերտներ	Konstantin Yankovsky?
Ինչով է հայտնի	Ռուսական բանակի ականավոր վիրաբույժ
Պարգևներ
Nikolai Sklifosovsky Վիքիպահեստում

Նիկոլայ Վասիլյևիչ Սկլիֆոսովսկի (ռուս.՝ Николай Васильевич Склифосовский, մարտի 25 (ապրիլի 6), 1836, Dzerjinscoe, Տիրասպոլսկի գավառ, Խերսոնի նահանգ, Ռուսական կայսրություն - նոյեմբերի 30 (դեկտեմբերի 13), 1904, Yakivtsi, Պոլտավա, Ռուսական կայսրություն), ռուս բժիշկ՝ վիրաբույժ և ֆիզիոլոգ, պրոֆեսոր։ Հեղինակել է բազմաթիվ աշխատություններ, որոնք վերաբերում են որովայնի խոռոչի ռազմադաշտային վիրաբուժությանը։ Եղել է Սանկտ-Պետերբուրգի Կայսերական կլինիկական ինստիտուտի տնօրենը։

Կենսագրություն

Մոլդովայի նամականիշ, 2006

Ծնվել է 1836 թվականի ապրիլի 6-ին Ռուսական կայսրության Խարկովի նահանգում՝ Դուբոսարի քաղաքի մոտ տեղակայված խուտորում (այժմ՝ չճանաչված Մերձդնեստրի Մոլդովական Հանրապետության կազմի մեջ)։ Միջնակարգ կրթությունը ստացել է Օդեսսայում՝ №2 գիմնազիայում, որն ավարտել է արծաթե մեդալով։ 1859 թվականին ավարտել է Մոսկվայի համալսարանի բժշկական ֆակուլտետը և անմիջապես ստանձնել Օդեսսայի քաղաքային հիվանդանոցի վիրաբուժական բաժանմունքի ղեկավարի պաշտոնը։

1863 թվականին, Խարկովում, ստացել է բժշկության դոկտորի գիտական աստիճան՝ «Հարարգանդային արյունային ուռուցքի մասին» դիսերտացիայի համար։ 1866-1867 թվականներին աշխատել է Գերմանիայում՝ պրուսական բանակում, ապա Ֆրանսիայում՝ Նելատոնի կլինիկայում, հետո՝ Անգլիայում։ Վերադառնալով Ռուսաստան թողարկել է բազմաթիվ աշխատություններ, ինչի շնորհիվ 1870 թվականի սկզբին հրավիրվել է Կիևի համալսարանի վիրաբուժության ամբիոն։

1878 թվականին տեղափոխվել է Մոսկվա, աշխատել մի քանի վիրաբուժական կլինիկաներում։ 1893-ին հրավիրվել է Սանկտ-Պետերբուրգ՝ զբաղեցնելու Կայսերական կլինիկական ինստիտւտի (այժմ՝ Հետբուհական կրթության բժշկական ակադեմիա) տնօրենի պաշտոնը։

Կյանքի վերջին տարիները ապրել է Յակովցիի իր կալվածքում (Պոլտավայի մոտ)։ Մահացել է 1904-ին՝ ինսուլտից։

Նշանակություն

Սկլիֆոսովսկին իր ռազմաբժշկական գործունեության ընթացքում մասնակցել է մի շարք պատերազմների․ ավստրո-պրուսական (1866-68), ֆրանս-պրուսական (1870-1871), Բալկանյան (1876) և ռուս-թուրքական (1877-1878)։ Ռազմական գործողությունների ժամանակ նա աշխատել է վիրակապական կետերում՝ որպես ռազմադաշտային վիրաբույժ, վիրաբույժ-կոնսուլտանտ, ռուսական բանակի առաջատար վիրաբույժ։

Օգտագործելով իր բժշկական մեծ հեղինակությունը՝ նա նախաձեռնել է կլինիկական ավանի ստեղծումը Դեվիչյե Պոլեում, որը բավականին մեծ ներդրում է ունեցել Ռուսաստանում վիրաբուժության զարգացման գործում։

Շարունակելով Ն․ Պիրոգովի գործը՝ Սկլիֆոսովսկին նպաստել է անտիսեպտիկայի զարգացմանն ու տարածմանը սկզբում Մոսկվայում, ապա՝ ողջ Ռուսաստանում։

Հեղինակ է ավելի քան 70 բժշկական աշխատությունների, որոնք հիմնականում վերաբերում են ռազմական բժշկությանը՝ հատկապես, ռազմադաշտային վիրաբուժությանը, ռազմասանիտարական գործին։

Հիշատակ

• Սկլիֆոսովսկու անունն է կրում Մոսկվայի շտապ օգնության քաղաքային գիտահետազոտական ինստիտուտը։
• 2006-ին Մոլդովայում թողարկվել է Նիկոլայ Սկլիֆոսովսկուն նվիրված նամականիշ։

Արտաքին հղումներ

• Սկլիֆոսովսկու կենսագրությունը(ռուս.)

Վիքիպահեստն ունի նյութեր, որոնք վերաբերում են «Նիկոլայ Սկլիֆոսովսկի» հոդվածին։