Հովհաննես Դիլանյան
- Վիքիպեդիայում կան հոդվածներ Դիլանյան ազգանունով այլ մարդկանց մասին։
Հովհաննես Դիլանյան | |
---|---|
Ծնվել է | 1916 |
Ծննդավայր | Շրվենանց, Հայաստան |
Մահացել է | անհայտ |
Քաղաքացիություն | Ռուսական կայսրություն և ԽՍՀՄ |
Մասնագիտություն | մանկավարժ |
Կուսակցություն | ԽՄԿԿ |
Պարգևներ և մրցանակներ |
Հովհաննես Մեսրոպի Դիլանյան (1916, Շրվենանց, Հայաստան - անհայտ), հայ մանկավարժ։ ԽՄԿԿ անդամ (1944): Երկրորդ համաշխարհային պատերազմի մասնակից։
Կենսագրություն
[խմբագրել | խմբագրել կոդը]Հովհաննես Դիլանյանը ծնվել է 1916 թվականին Ղափանի շրջանի Շրվենանց գյուղում։ 1935 թվականին ավարտել է հայրենի գյուղի միջնակարգ դպրոցի 9-րդ դասարանը, ուսուցչական աշխատանքի է անցել նախ՝ Վաչագանի, ապա՝ Նորաշենիկի տարրական դպրոցներում։ 1938-1941 թվականներին միաժամանակ հեռակայել և ավարտել է Երևանի մանկավարժական ուսումնարանը, այնուհետև սովորել է Երևանի հեռակա մանկավարժական ինստիտուտի ֆիզիկամաթեմատիկական ֆակուլտետում[1]։
1941 թվականին, երբ սկսվել է Գերմանա-խորհրդային պատերազմը, Դիլանյանը զորակոչվել է կարմիր բանակ։ 1941 թվականին ավարտել է հրետանային գնդի կրտսեր հրամանատարների դպրոցը, այնուհետև ընդունվել է Թբիլիսիի 26 կոմիսարների անվան հրետանային ուսումնարանը, որն ավարտել է 1942 թվականին և ստացել լեյտենանտի կոչում։ 1942 թվականի հունիսից մեկնել է Հյուսիսային Կովկասի ռազմաճակատ՝ որպես մարտկոցի հրամանատար։ 276-րդ հրաձգային դիվիզիայի հրետանային գնդում մարտնչել է Օրջոնիկիձեից մինչև Թամանի թերակղզին։ Նրա մարտկոցն աչքի է ընկել Բեսլանի մոտ թշնամու խմբավորումների ոչնչացմանը, ինչպես նաև Արդոն, Տիխորեցկ, Վորոշիլովսկ, Եյսկ քաղաքների ազատագրման մարտերին։ 1943 թվականի ապրիլին գործուղվել է Կոստրոմոյի 3-րդ լենինգրադյան հրետանային դպրոցը՝ վերապատրաստման, ավարտելուց հետո մեկնել է ռազմաճակատ, մարտնչել Կուրսկ-Օրյոլի աղեղում։ 1943 թվականին Վիտեբսկ քաղաքի ազատագրման կռիվներում ցուցաբերած խիզախության համար պարգևատրվել է Կարմիր աստղի շքանշանով։ Վիտեբսկի շրջանում հինգերորդ անգամ վիրավորվելուց և Իվանովի հոսպիտալում բուժվելուց հետո նշանակվել է Առաջին մերձբալթյան ռազմաճակատում գործող 156-րդ հրաձգային դիվիզիայի հրետանային գնդի շտաբի պետի տեղակալ։ 1944 թվականին կապիտան Դիլանյանը մասնակցել է թշնամու 33 դիվիզիաների շրջապատմանը և ջախջախմանը, որի համար պարգևատրվել է Հայրենական պատերազմի 2-րդ աստիճանի շքանշանով։ 1944 թվականի օգոստոսին Ռիգայի մատույցներում ծանր վիրավորվել է, ուղարկվել թիկունք բուժվելու[1]։
Դիլանյանը բուժվելուց հետո զորացրվել է և շարունակել մանկավարժական գործունեությունը։ Ուսմասվար և մաթեմատիկայի ուսուցիչ է աշխատել Շրվենանցի միջնակարգ դպրոցում, ապա՝ տնօրեն Խոտանանի դպրոցում[1]։
Դիլանյանը պարգևատրվել է Աշխատանքային կարմիր դրոշի շքանշանով, «Աշխատանքային գերազանցության համար» մեդալով և մի շարք պատվոգրերով։ 1944 թվականին Դիլանյանը ընդունվել է կուսակցության շարքերը[1]։
Պարգևներ
[խմբագրել | խմբագրել կոդը]- Կարմիր աստղի շքանշան
- Հայրենական պատերազմի 2-րդ աստիճանի շքանշան
- Աշխատանքային կարմիր դրոշի շքանշան
- «Աշխատանքային գերազանցության համար» մեդալ
Ծանոթագրություններ
[խմբագրել | խմբագրել կոդը]- 1916 ծնունդներ
- Հայաստանում ծնվածներ
- Մահվան ամսաթիվը չորոշված անձինք
- ԽՄԿԿ անդամներ
- Հայրենական պատերազմի 2-րդ աստիճանի շքանշանակիրներ
- Աշխատանքային կարմիր դրոշի շքանշանի ասպետներ
- Կարմիր աստղի շքանշանի ասպետներ
- Անձինք այբբենական կարգով
- «Աշխատանքային գերազանցության համար» մեդալով պարգևատրվածներ
- Դպրոցի տնօրեններ
- ՀՊՄՀ շրջանավարտներ
- Հայ մանկավարժներ
- Հայրենական մեծ պատերազմի հայ մասնակիցներ
- Շրվենանց գյուղում ծնվածներ