Թատերական հրապարակ (Դոնի Ռոստով)

ռուս.՝ Театральная площадь
Թատերական հրապարակ
Երկիր	Ռուսաստան
Տեղագրություն	Պրոլետարսկի շրջան
OpenStreetMap քարտեզին
Յանդեքս քարտեզին
Գուգլ քարտեզին

Թատերական հրապարակ (ռուս.՝ Театральная площадь), Ռուսաստանի Դոնի Ռոստով քաղաքի գլխավոր հրապարակը։ Գտնվում է Պրոլետարսկի շրջանում։ Քաղաքի բոլոր նշանակալի իրադարձությունները` Քաղաքի օրերը, համերգները, շքերթները, հրավառությունները անցկացվում են այս հրապարակում^[1]։

Նկարագրություն[խմբագրել | խմբագրել կոդը]

Հրապարակում են գտնվում Հյուսիսկովկասյան երկաթուղու գլխավոր վարչությունը, Ռոստովի Մաքսիմ Գորկու անվան դրամայի ակադեմիական թատրոնը, մի շարք հայտնի ընկերությունների (օրինակ, Ստելլա-բանկի) գրասենյակները^[2]։

Թատրոնի շենքը կառուցված է խորհրդային կոնստրուկտիվիզմի ոճով և ունի տրակտորի տեսք^[1]։

Հյուսիսկովկասյան երկաթուղու գլխավոր վարչության շենքը (նախկին Վլադիկավկազի երկաթուղու վարչություն) XX դարի հասարակական ճարտարապետության հուշարձան է։ Այն կառուցված է մոդեռն ոճի ռացիոնալիստական ուղղության ավանդույթներով^[2]։

Հրապարակում են նաև Հայրենական մեծ պատերազմում տարած հաղթանակի 40-ամյակի առթիվ տեղադրված «Գերմանաֆաշիստական զավթիչներից Դոնի Ռոստով քաղաքն ազատագրող զինվորներին» հուշարձանը։ Դա վրան-թիկնոցը հագին հունական Նիկե աստվածուհու ոճավորված ոսկեզօծ պատկերով 72 մետր բարձրությամբ ստելա է^[2]։

Թատրոնի հարևանությամբ է գտնվում շատրվանների խումբը, քանդակային կոմպոզիցիայի հեղինակն է Եվգենի Վուչետիչը։ Շատրվանը կենտրոնում պատվանդանի վրա չորս ատլանտներով արձանախմբով քառակուսի ավազան է։ Ատլանտները պահում են դեպի վեր ցայտող շիթերով գավաթը։ Խումբը շրջապատված է պատվանդանների վրա գորտերով և կրիաներով, որոնց բերաններից ցայտում են հորիզոնական շիթեր։ Քաղաքային լեգենդը վկայում է, որ երիտասարդ քանդակագործն այդ երկկենցաղների մռութներին տվել է քաղաքի որոշ պաշտոնյաների դիմագծեր։ Քանդակները պատրաստված են բետոնից^[2]։

Հրապարակի նոր տեսարժանիքը 2016 թվականին կառուցված «Մեկ երկինք» պտտվող անիվն է։ Հարմարավետ խցիկով կարելի է բարձրանալ մինչև 65 մետր և վերևից դիտել քաղաքի թաղամասերն ու Դոն գետի շրջակայքը։ Անիվը բարձրությամբ երկրորդն է Ռուսաստանում^[2]։