Արամ Սամվելյան

Վիքիպեդիայում կան հոդվածներ Սամվելյան ազգանունով այլ մարդկանց մասին։

Արամ Սամվելյան
Ի ծնե անուն	Արամ Հարությունի Սամուելյան
Ծնվել է	1908, սեպտեմբերի 28, Ախալցխա
Մահացել է	1991, հոկտեմբերի 1, Երևան
Ժանրեր	օպերա
Մասնագիտություն	օպերային երգիչ, դրամատիկ տենոր
Պարգևներ

Արամ Հարությունի Սամվելյան (Սամուելյան), (սեպտեմբերի 28, 1908(1908-09-28) - հոկտեմբերի 1, 1991(1991-10-01)), հայ օպերային երգիչ, դրամատիկ տենոր, ՀԽՍՀ վաստակավոր արտիստ (1956)։ Երևանի Հ․ Պարոնյանի անվան երաժշտական կոմեդիայի պետական թատրոնի հիմնադիրներից մեկը։

Կենսագրություն

Ծնվել է Ախալցխայում։ 1919 թվականին տեղափոխվել է Բաթում, որտեղ 1926-1931 թվականներին աշխատել է տեղի պետական թատրոնում՝ որպես դիմահարդարի օգնական, 1933-1939 թվականներին՝ հայկական և հունական թատերական ստուդիաներում՝ որպես դիմահարդար։ 1939 թվականին ավարտել է Աջարիայի պետական երաժշտական ուսումնարանի վոկալ բաժինը և տեղափոխվել Երևան։ 1939-1940 թվականներին եղել է Հայաստանի նորաստեղծ պետական ջազ նվագախմբի մենակատար։ 1939-1945 թվականներին սովորել է Երևանի կոնսերվատորիայի վոկալ-երգեցողության բաժնում։ 1941-1943 թվականներին աշխատել է որպես դիմահարդար։ 1942 թվականին հրավիրվել է նոր ստեղծվող Երևանի Հ․ Պարոնյանի անվան երաժշտական կոմեդիայի պետական թատրոն և եղել է հիմնադիրներից ու արտիստներից մեկը։ Եղել է թատրոնում բեմադրված դասական գրեթե բոլոր օպերետների հերոսների առաջին մարմնավորողը։

Ստեղծագործական գործունեություն

1944-1959 թվականներին աշխատել է Երևանի օպերայի և բալետի թատրոնում՝ որպես մեներգիչ (դրամատիկ տենոր)։ Հանդես է եկել հետևյալ օպերաներում՝

• Ջակոմո Պուչինիի «Չիո-Չիո-Սան» (Պինկերտոն)
• Պյոտր Չայկովսկիի «Մազեպա» (Անդրեյ)
• Պյոտր Չայկովսկիի «Պիկովայա դամա» (Գերման)
• Պյոտր Չայկովսկիի «Իոլանտա» (Վեդեմոն)
• Սեն Սանսի «Սամսոն և Դալիլա» (Սամսոն)
• Տիգրան Չուխաճյանի «Լեբլեբիջի» (Արմեն)
• Տիգրան Չուխաճյանի «Արշակ Երկրորդ» (Տիրիթ)
• Արմեն Տիգրանյանի «Անուշ» (Սարո)
• Ժորժ Բիզեի «Կարմեն» (Խոսե)
• Ջուզեպպե Վերդիի «Աիդա» (Ռադամես)
• Ջուզեպպե Վերդիի «Տրուբադուր» (Մանրիկո)

1959 թվականին կրկին վերադարձել է երաժշտական կոմեդիայի պետական թատրոն՝ որպես առաջատար մենակատար։ Հանդես է եկել հետևյալ ներկայացումներում՝

• Ռ.Նելսոնի «Թագավորը զվարճանում է» (Լեոնդ)
• Իմրե Կալմանի «Բայադերա» (Ռաջամ)
• Իմրե Կալմանի «Սիլվա» (Էդվին)
• Վալենտինովի «Հրո քրմուհի» (Լյուսիեն Բոմիե)
• Տիգրան Չուխաճյանի «Կարինե» (Արմեն)
• «Մարիցա» (Տասիլո)

Անձնավորել է հայ ժամանակակից օպերետների և երաժշտական կատակերգությունների հերոսներին, խաղացել բնութագրական դերեր։ Կատարել է նաև դասական և ազգային երգեր։

Մրցանակներ

• ՀԽՍՀ վաստակավոր արտիստ, 1956 թվական
• ԽՍՀՄ Պատվո շքանշան, 1956 թվական
• ԽՍՀՄ մշակույթի նախարարության մեդալ, 1967 թվական