«Plastic Hearts», ամերիկացի երգչուհի Մայլի Սայրուսի սպասվելիք յոթերորդ ստուդիական ալբոմ, որը պետք է թողարկվի 2020 թվականի նոյեմբերի 27-ին RCA Records լեյբլի կողմից։ Սայրուսը սկսել է աշխատել նախագծի վրա «Younger Now» (2017) ալբոմի թողարկումից կարճ ժամանակ առաջ։ «Midnight Sky» երգը թողարկվել է 2020 թվականի օգոստոսի 14-ին որպես ալբոմի գլխավոր սինգլ։
Նախապատմություն
«[Younger Now]-ն ակնհայտ ներշնչված էր քանթրիով, բայց ես դեռ իսկապես սիրում եմ փոփ երաժշտությունը և սիրում եմ այն երաժշտությունը, որը կարող է կատարվել ակումբում»։
— Սայրուսը՝ քննարկելով իր տեղաշարժը երաժշտական ուղղություններում «Younger Now» ալբոմից հետո (2017)[3]
Սայրուսը հեռացել է հիմնական հիփ հոփ մշակույթից, որի մեջ ներգրավված է եղել իր «Bangerz» (2013) և «Miley Cyrus & Her Dead Petz» (2015) ալբոմների վրա աշխատելու ընթացքում և թեքվել է դեպի քանթրի երաժշտության «արմատներին ավելի մոտ» տարրեր՝ ստեղծելով իր «Younger Now» (2017) վեցերորդ ստուդիական ալբոմը[4]: Այն թողարկվել է 2017 թվականի սեպտեմբերի 29-ին և արժանացել է քննադատների ջերմ գնահատականներին։ Metacritic-ում ալբոմը ստացել է 100-ից 58 միավոր[5] և զբաղեցրել է ամերիկյան Billboard 200 չարթի հինգերորդ հորիզոնականը՝ առաջին շաբաթվա ընթացքում վաճառվելով 33,000 օրինակով և ընդհանուր՝ 45,000 ալբոմին համարժեք միավորով[6]։ Դրա գլխավոր՝ «Malibu» սինգլը դարձել է երգչուհու իններորդ սինգլը, որն ընդգրկվել է ամերիկյան Billboard Hot 100 շքերթի լավագույն տասնյակում, մինչդեռ համանուն երգը զգաղեցրել է 79-րդ հորիզոնականը[7]։ Սայրուսը հաստատել է, որ այլևս սինգլներ չեն լինի ալբոմի թողարկումից մեկ ամիս անց, և որ նա չի շրջագայելու այդ ալբոմով[8]։
Արտադրություն
«Younger Now» ալբոմի թողարկումից երկու շաբաթ առաջ Սայրուսը հայտնել է, որ «ավարտել է [ալբոմը]»[9], սակայն ավելի ուշ նա ասել է, որ սկսել է աշխատել ալբոմի վրա 2018 թվականի սկզբին[10]։ 2018 թվականին արտադրության սկսվելուց ի վեր Սայրուսը բազմաթիվ արտիստների հետ աշխատել է նախագծի վրա, այդ թվում՝ Ալմայի, Մարկ Ռոնսոնի, Մաքս Մարտինի, Mike Will Made It-ի, Էնդրյու Ուայաթի, Բիլի Այդոլի, Ռայան Թեդերի, Էնդրյու Ուոթի և Ալի Թամփոսիի[11][12][13][14][15][16][17]: 2019 թվականի դեկտեմբերին Սայրուսն ասել է, որ «Younger Now» ալբոմի երաժշտական ուղղությունն «այնքան էլ տուն չէր [նրա համար]» և նշել է, որ Ռոնսոնն օգնել է «կտրել [իր] ձայնը, որով [նա] կարող է անել ամեն ինչ, ինչ ցանկանում է, և որն ավելի ժամանակակից է»[3]։