Պարսիֆալ (օպերա)

Վիքիպեդիայից՝ ազատ հանրագիտարանից
Պարսիֆալ
Parsifal
Parsifal-affisch.jpg
«Պարսիֆալ» օպերայի սկզբնախաղի պաստառ
Կոմպոզիտոր Ռիխարդ Վագներ
Լիբրետտոյի
հեղինակ(ներ)
Ռիխարդ Վագներ
Լիբրետտոյի
լեզու
գերմաներեն
Սյուժեի աղբյուր Վոլֆրամ ֆոն Էշենբախ. «Պարսիֆալ»
Ժանր Երաժշտական դրամա
Գործողությունների թիվ 3
Ստեղծման թիվ 1877-82 թթ.
Առաջնախաղ 1882 թ. հուլիսի 26
Առաջնախաղի վայր Բայրոյթ

Պարսիֆալ (գերմ.՝ Parsifal), Ռիխարդ Վագների օպերա (հանդիսավոր բեմական ներկայացում (Bühnenweihfestspiel)) երեք գործողությամբ։ Լիբրետտոն՝ հեղինակի։ «Պարսիֆալը» գերմանացի երգահանի վերջին ստեղծագործությունն է, գրվել է 1877-82 թթ. ընթացքում։ Առաջին անգամ բեմադրվել է Բայրոյթի թատրոնում՝ Բայրոյթի փառատոնի շրջանակներում 1882 թ. հուլիսի 26-ին։

Սեփական թատրոն ունենալուց հետո, Վագները ձեռնամուխ եղավ ստեղծագործական նոր աշխատանքի՝ «Պարսիֆալ» դրամա-միստերիայի ստեղծմանը, որը նրա ռեակցիոն գաղափարական վերասերման հանրագումարն էր: «Պարսիֆալն» առաջին անգամ բեմադրվեց Բայրոյթում 1882 թվականին: Վագների կտակի համաձայն՝ իր մահվանից հետո երեսուն տարվա ընթացքում «Պարսիֆալը» կարող էր կատարվել բացառապես Բայրոյթում: Նա համարում էր, որ դա միակ վայրն էր, որն արժանի էր այդ «սրբությանը»:

«Պարսիֆալի» գաղափարը կարելի է ձևակերպել որպես մարդու բարոյական ինքնակատարելագործում. մարդ, որը ճանաչել է իմաստությունը քրիստոնեական կարեկցության միջոցով: Այդպիսի գաղափարը համապատասխանում էր կոմպոզիտորի տվյալ շրջանի աշխարհայացքին, որն արտացոլվեց նաև 80-ական թվականների սկզբների նրա գրական գործերում:

Քրիստոնեության ջատագովությունն իր գեղարվեստական արտահայտությունը գտավ «Պարսիֆալում»: Այն, ըստ էության, ոչ այնքան օպերա էր, որքան քրիստոնեական միստերիա, որը փոխադրվել էր թատրոնի բեմ՝ ամբողջությամբ լցված լինելով միստիկայով և կրոնական սիմվոլիկայով: