Հայաստանի օդային տրանսպորտ
Հայաստանի օդային տրանսպորտ, Հայաստանում օդային առաջին կանոնավոր հաղորդակցությունն սկսվել է 1933 թվականի հուլիսի 21-ին՝ Երևանի և Թիֆլիսի միջև (ԴՕ-2 երկտեղ օդանավերով)։ Երևանն օդային ուղիով Մոսկվային միացել է 1945 թվականին (ԴՍՊ-47 18 ուղևորատեղով օդանավերով)։ 1986 թվականին գործել է միութենական նշանակության 30 օդային գիծ։ Օդային կարևորագույն երթուղիներն էին՝ Երևան-Մոսկվա (2000 կմ), Երևան-Միներալնիե-Վոդի-Լենինգրադ (այժմ՝ Սանկտ Պետերբուրգ, 2670 կմ), Երևան-Սվերդլովսկ (այժմ՝ Եկատերինբուրգ, 2610 կմ), Երևան-Նովոսիբիրսկ, ինչպես նաև Երևան-միութենական հանրապետությունների մայրաքաղաքներ [բացառությամբ Դուշանբեի և Ֆրունզեի (այժմ՝ Բիշքեկ)]։ Հանրապետական նշանակության երթուղիներով Երևանը կապված էր Թբիլիսիի, Բաքվի, Ստեփանակերտի, Նախիջևանի, իսկ տեղական նշանակության ավիագծերով՝ Գյումրիի, Վանաձորի, Կապանի, Գորիսի, Սիսիանի, Ջերմուկի, Բերդի և այլ բնակավայրերի հետ։ Երևանն օդային հաղորդակցությամբ կապված էր նաև Պրահայի, Բեռլինի, Դամասկոսի, Հալեպի հետ։ Երևանով էր անցնում նաև Մոսկվա-Երևան-Բեյրութ-Դամասկոս-Մոսկվա միջազգային երթուղին։ Գյումրին օդային ուղիներով կապված էր Մոսկվայի, Կիևի, Սանկտ Պետերբուրգի, Սիմֆերոպոլի, Սուխումի և Գորկու (այժմ՝ Նիժնի Նովգորոդ), իսկ Բերդն ու Գորիսը՝ Բաքվի հետ։ Հեռավոր երթուղիները սպասարկվել են ՏՈՒ-154 և ՏՈՒ-134, իսկ տեղական Երթուղիները՝ ՅԱԿ-40 օդանավերով։ Ներկայումս Երևանի «Զվարթնոց» միջազգային և Գյումրիի «Շիրակ» օդանավակայաններն օգտագործվում են քաղաքացիական ավիացիայի, «երերունին»՝ ռազմական նպատակներով։ «Զվարթնոց» և «Շիրակ» օդանավակայանները Հայաստանի Կառավարության և «Կորպորասիոն Ամերիկա» ընկերության (Արգենտինա) միջև 2002 թվականի հունիսին կնքված պայմանագրով՝ 30 տարի ժամկետով հավատարմագրային կառավարման են տրվել «Արմենիա միջազգային օդանավակայաններ» ընկերությանը։
2022 թվականի հայկական ավիաընկերությունները փոխադրել են 900 հազար մարդ, դա Հայաստանի ավիափոխադրումների շուկայի մոտ 25%-ն է[1]։
Ծանոթագրություններ[խմբագրել | խմբագրել կոդը]
- ↑ «Армянские авиакомпании перевезли более 900 тыс. человек в 2022 году – Пашинян» (ռուսերեն). Sputnik Армения — новость. Վերցված է 2023 թ․ ապրիլի 4-ին.
Այս հոդվածի կամ նրա բաժնի որոշակի հատվածի սկզբնական տարբերակը վերցված է Հայաստան հանրագիտարանից, որի նյութերը թողարկված են Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) թույլատրագրի ներքո։ 
|