Նիտու Սինգհ

Նիտու Սինգհ հինդի՝ नीतू सिंह
Ծնվել է	հուլիսի 8, 1958(1958-07-08) (66 տարեկան)
Ծննդավայր	Դելի, Դելիի ազգային մայրաքաղաքային տարածք, Հնդկաստան
Կրթություն	Hill Grange High School?
Քաղաքացիություն	Հնդկաստան
Մասնագիտություն	դերասանուհի
Ամուսին(ներ)	Ռիշի Կապուր
Երեխա(ներ)	Ռանբիր Կապուր և Ռիդդհիմա Կապուր Սահանի

Նիտու Սինգհ (հինդի` नीतू सिंह, իրական անունը` Սոնյա Սինգհ, հուլիսի 8, 1958(1958-07-08), Դելի, Դելիի ազգային մայրաքաղաքային տարածք, Հնդկաստան), հնդկական կինոյի դերասանուհի։ Իր ստեղծագործական կյանքի ընթացքում նկարահանվել է մոտ 60 ֆիլմերում։

Կենսագրություն

Նիտու Սինգհը ծնվել է սիկհերի ընտանիքում։ Մանկության տարիներին հաճախել է Վիջայանթհիմալայի պարային դպրոցը։ Վիջայանթհիմալայի հրավերով սկսել է նկարահանվել կինոյում։ Առաջին անգամ էկրանին հայտնվել է «Արքայադուստրը և ավազակը» (1966 թ.) կինոնկարում ` կատարելով էպիզոդիկ դեր։ Նրան հաջողություն բերեց 1968 թվականին նկարահանված «Երկու ծաղիկ» կինոնկարը, որտեղ նա կատարում էր երկվորյակ քույրերի երկակի դեր, ովքեր փորձում էին հաշտեցնել ծնողներին։ 1973 թվականին նկարահանված «Գտնել միմյանց» կինոնկարում Նիտու Սինգհը կրկին կատարել է էպիզոդիկ դեր, սակայն նրա պարային համարը գրավեց հասարակության ուշադրությունը, որը նրան թույլ տվեց կրկին վերադառնալ գլխավոր դերերի։ Ֆիլմերում նրա խաղընկերները եղել են իր ժամանակի առաջատար դերասանները։ Նրա հաջողված ֆիլմերից են «Անհետացում» (1975 թ.), «Սերը կյանք է» (1976 թ.), «Ամար, Աքբար, Անտոնի» (1977 թ.), «Սիրո հավերժական հեքիաթը» (1977 թ.), «Անցյալի ստվերում» (1977 թ.), «Երդումներ և խոստումներ» (1978 թ.), «Այսպիսի ստախոս» (1979 թ.), «Սև քարը» (1979 թ.) և այլ կինոնկարներ։ «Սև քարը» կինոնկարում կերտած կերպարի համար Նիտու Սինգհը ներկայացվել է Filmfare Awards մրցանակի՝ կանացի երկրորդ պլանի լավագույն դերի համար։

Իր ստեղծագործական կյանքի գագաթնակետին Նիտու Սինգհը լքեց կինոնկարահանման հրապարակը։ Այդ քայլը շատերը կապում էին այն բանի հետ, որ իբր Կապուրների ընտանիքում արգելված էր ամուսնացած կնոջը նկարահանվել կինոյում։ Սակայն Նիտու Սինգհը վստահեցնում էր, որ դա իր ընտրությունն է եղել։ Ըստ նրա խոսքերի, ինքն աշխատել է հինգ տարեկանից և ամուսնությունից հետո ցանկացել է հանգստանալ և իր ժամանակը տրամադրել երեխաներին։ 26 տարի անց Նիտու Սինգհը կրկին սկսել է նկարահանվել։ Վերջին տարիների նրա ֆիլմերից են «Սերը երեկ և այսօր» (2009 թ.), «Քանի դեռ ողջ եմ» (2012 թ.) և այլն։

Անձնական կյանքը

1980 թվականին Նիտու Սինգհը 21 տարեկանում ամուսնացել է Ռիշի Կապուրի հետ։ Վերջինիս հետ նա հանդիպել է 14 տարեկանից։ Նրանք ունեն երկու երեխա՝ մեկ դուստր և մեկ որդի։ Որդին՝ Ռանբիր Կապուրը, նույնպես դերասան է։

Մասնակի ֆիլմագրությունը

Թվական	Անվանում	Բնօրինակ անվանում	Կերպար
1966	Արքայադուստրը և ավազակը	Suraj	Գիտա Սինգհը մանուկ հասակում
1966	Միլիոն ռուփի	Dus Lakh	Ռուպա
1968	Երկու ծաղիկ	Do Kaliyaan	Գանգա, Ջամունա
1969	Հավատք	Waris	Մուննի
1970	Սուրբ մեղսագործը	Pavitra Paapi	Վիդյա
1973	Գտնել միմյանց	Yaadon Ki Baaraat	պարուհի
1974	Անբարոյական օձը	Zehreela Insaan	Մարգարետ
1974	Գիտակցություն	Hawas	Նիտու Սինգհ
1975	Անհետացում	Rafoo Chakkar	Ռիտու
1975	Ողբերգական զուգադիպություն	Khel Khel Mein	Նիշա
1975	Պատ	Deewaar	Լինա Նարանգ
1976	Սերը կյանք է	Kabhie Kabhie	Պինկի Կապուր
1976	Ռամ և Շանկար	Shankar Dada	Ռուպա Վերմա
1976	Մեծն խարդախը	Maha Chor	Նիտու
1976	Արդարադատություն	Aadalat	Գիտա Վերմա
1977	Ամար, Աքբար, Անտոնի	Amar Akbar Anthony	դոկ. Սալմա Ալի
1977	Անցյալի ստվերում	Doosara Aadmi	Տիմսի
1977	Դաստիարակություն	Parvarish	Նիտու
1977	Սիրո հավերժական հեքիաթը	Dharam Veer	Ռուպա
1977	Ինչ է հիմա լինելու	Ab Kya Hoga	Չիտրալեկհա
1978	Երդումներ և խոստումներ	Kasme Vaade	Նիտա
1978	Ամուսինը, կինը և...	Pati Patni Aur Woh	երգչուհի
1978	Ամուսնալուծություն	Priyatama	Դոլլի
1978	Հիրալալ և Պաննալալ	Heeralal Pannalal	Նիլամ
1979	Մեծ խաղ	The Great Gambler	Մալա
1979	Այսպիսի ստախոս	Jhoota Kahin Ka	Անիտա Վերմա, Շիտալ Կհաննա
1979	Ձևացնողը	Dhongee	Նիլիմա Կապուր
1979	Անհայտ թշնամին	Jaani Dushman	Գաուրի
1979	Սև քարը	Kaala Patthar	Շանո
1979	Բախտը քո ձեռքերում է	Duniya Meri Jeb Mein	Նիտա
1980	Հարստության ծարավ	Dhan Daulat	Շանտի
1980	Կանչ	Chunaoti	Ռոշնի
1980	Բոցավառվող գնացքը	The Burning Train	Մադհու
1981	Ամուր ընկերություն	Yaarana	Կոմալ
1981	Ժամանակն է վերացնել բոլոր խոչընդոտները	Waqt Ki Deewar	Սոնի
1982	Գողը	Chorni	Դիպա
1982	Բարին ու չարը	Teesri Aankh	Նիշա Մալհոտրա
1982	Մահառաջայի ապարանքը	Raj Mahal	-
1983	Մայրական վիշտ	Ganga Meri Maa	-
2009	Սերը երեկ և այսօր	Love Aaj Kal	Հարլին Կաուր
2012	Քանի դեռ ես ողջ եմ	Jab Tak Hai Jaan	Միրայի մայրը
2013	26 կողոպտիչներ	Special Chabbis	Վասիմ Խանի կինը
2013	Անամոթը	Besharam	Բուլբուլ Չաուտալա

Ծանոթագրություններ

Վիքիպահեստն ունի նյութեր, որոնք վերաբերում են «Նիտու Սինգհ» հոդվածին։