«Cockiness (Love It)», բարբադոսցի երգչուհի Ռիհաննայի երգն է իր «Talk That Talk» (2011) կոչվող վեցերորդ ստուդիական ալբոմից։ Երգը գրվել է Ռիհաննայի, Քենդիս Փիլեյի, Դի Աբերնեթի և Բանգլադեշի կողմից։ Այն 2 րոպե 58 վայրկյան տևողությամբ դենսհոլ և դաբստեպ ժանրերի երգ է, որի բառերում երգչուհին արտահայտում է իր սեռական ցանկությունները։
Երգը տարբեր արձագանքներ է ստացել երաժշտական քննադատների կողմից, որոնցից ոմանք բարձր են գնահատել երգի հիշվող լինելը և կոմպոզիցիոն կառուցվածը, իսկ մյուսները քննադատել են երգի բառերի բացահայտ սեքսուալ բովանդակությունը։
Երգի պաշտոնական ռեմիքս տարբերակում իր մասնակցությունն ունի ամերիկացի ռեփեր ASAP Rocky-ն։ Չնայած երգի ռեմիքս տարբերակը չի ընդգրկվել «Talk That Talk» ալբոմում, սակայն 2012 թվականի սեպտեմբերի 7-ին այն թողարկվել է որպես ալբոմի վեցերորդ սինգլը[2]։ Ռեմիքսի թողարկումից մեկ օր առաջ՝ սեպտեմբերի 6-ին, Ռիհաննան և ASAP Rocky-ն այն կատարել է MTV Video Music Awards 2012 մրցանակաբաշխությունում[3]։