Տիկնիկների հովիտը (վեպ)
Տիկնիկների հովիտը անգլ.՝ Valley of the Dolls | |
---|---|
Հեղինակ | Ժաքլին Սյուզան |
Տեսակ | գրավոր աշխատություն |
Ժանր | սիրավեպ |
Բնօրինակ լեզու | անգլերեն |
Հաջորդ | The Love Machine? |
Երկիր | ![]() |
Հրատարակման տարեթիվ | 1966 |
«Տիկնիկների հովիտը» (անգլ.՝ Valley of the Dolls), ամերիկացի գրող Ժաքլին Սյուզանի առաջին վեպը։ 1966 թվականին լույս տեսած տարվա ամենաշատ վաճառված վեպն է[1]։ 2016 թվականի դրությամբ այն վաճառվել է ավելի քան 31 միլիոն օրինակով[2]՝ համարվելով հրատարակչական պատմության բոլոր ժամանակների ամենավաճառվող գեղարվեստական գործերից մեկը[3]։
Սյուժե[խմբագրել | խմբագրել կոդը]
1945 թվականին գեղեցկուհի Աննա Ուելսը տեղափոխվում է Նյու Յորք՝ փախչելու Մասաչուսեթսի իր հայրենի քաղաքի միապաղաղությունից։ Նա որպես քարտուղարուհի աշխատանքի է անցնում իրավաբան Հենրի Բելամիի մոտ և ընկերանում է դերասանուհի Նիլի Օ'Հարայի հետ։ Հենրիի աշխատակից Լիոն Բերկը վերադառնում է գործակալություն Երկրորդ համաշխարհային պատերազմից հետո, և Աննան, չնայած Հենրիի նախազգուշացմանը, սիրահարվում է Լիոնին։ Միևնույն ժամանակ, Աննան մի քանի անգամ ժամադրության է գնում Ալեն Կուպեր անունով առևտրականի հետ։ Ալենը հանկարծ բացահայտում է, որ ինքն իրականում միլիոնատեր է և այսքան ժամանակ այդ տեղեկությունը գատնի է պահել, որպեսզի համոզվի, որ Աննայի զգացմունքներն անկեղծ են։ Նա Աննային ամուսնության առաջարկություն է անում, և նրանց սիրո պատմությունը դառնում է մեդիա սենսացիա։
Աննան ընկերանում է Հելեն Լոուսոնի՝ փայլուն, սակայն դժբախտ Բրոդվեյան լեգենդի հետ։ Նիլին աշխատանքի է ընդունվում Հելենի մոտ, բայց Հելենը չի սիրում Նիլին և նրան չնչին դեր է տալիս։ Աննան օգտագործում է Լիոնի հետ իր ծանոթությունը՝ Նիլիին ավելի մեծ դեր տալու համար, և Նիլին դառնում է աստղ։ Հելենն այնուհետև անկեղծանում է Աննայի հետ և ասում, որ այսքան ժամանակ նրա հետ շփվել է միայն Ալենի հոր հետ մտերմանալու նպատակով։ Աննան նաև ընկերանում է երիտասարդ դերասանուհի Ջենիֆեր Նորթի հետ։
Շոուի բացման գիշերը Աննան ու Լիոնը միմյանց խոստովանում են իրենց զգացմունքների մասին, և Աննան ու Ալենը բաժանվում են։ Շոուն մեծ հաջողություն է գրանցում և Նիլին տեղափոխվում է Կալիֆորնիա՝ կինոկարիերա սկսելու համար։ Աննայի մայրը մահանում է, և նա Լիոնի հետ վերադառնում է հայրենի քաղաք։ Լիոնը ցանկանում է հեռանալ գործակալությունից, ապրել Աննայի հայրենի տանը և վեպեր գրել։ Չնայած Աննան իսկապես սիրում է Լիոնին, սակայն հրաժարվում է վերադառնալ Մասաչուսեթս։ Լիոնը խզում է Աննայի հետ հարաբերությունները և տեղափոխվում Անգլիա՝ վեպեր գրելու։ Տարիներ անց Աննան ի վերջո դառնում է մոդել և սկսում է հանդիպել կոսմետիկ ընկերության սեփականատեր, տարեց, հարուստ Քևին Գիլմորի հետ։
Միևնույն ժամանակ Ջենիֆերը հարաբերություններ է սկսում երգիչ Թոնի Փոլարի հետ, սակայն Թոնիի ավագ քույր Միրիամը անընդհատ խանգարում է նրանց հարաբերություններին։ Ջենիֆերը ստիպում է Թոնիին ամուսնանալ իր հետ, իսկ հետո հղիանում է։ Ջենիֆերը կախվածության մեջ է ընկնում «տիկնիկներ»-ից (թմրամիջոցներից), որպեսզի հանգստացնի իր քայքայված նյարդերը։ Վերջապես Միրիամը բացահայտում է, թե ինչու էր խանգարում Ջենիֆերի և Թոնիի հարաբերություններին. Թոնին զարգացման խանգարումներ ունի, և երեխան, հավանական է,որ կժառանգի դրանք։ Ջենիֆերը աբորտ է անում և համաձայնում է բաժանվել Թոնիից։ Այնուհետև նա տեղափոխվում է Եվրոպա և աշխատանք գտնում Art House ֆիլմարտադրությունում։
Նիլին այդ ընթացքում դարձել էր հայտնի դերասանուհի և իր երկրորդ ամուսնուց ունեցել երկվորյակ որդիներ։ Երկար աշխատանքային օրերը և ամուսնու դավաճանությունները նրան կախվածության մեջ են գցում «տիկնիկներ»-ից, և նա աստիճանաբար կորցնում է իր փառքը։ Ստուդիան նրան հեռացնում է աշխատանքից։ Աննան նորից կապվում է Նիլիի հետ։ Քևինը առաջարկում է վերակենդանացնել Նիլիի կարիերան՝ նրան իր ապրանքանիշի հեռուստատեսային շոուում երգչի դերակատար դարձնելով։ Նիլին սկզբում հրաժարվում է, բայց հաջող ակումբային ելույթից և Հելենի հետ ընդհարումից հետո համաձայնում է։ Չկարողանալով հարմարվել ծանրաբեռնված գրաֆիկին՝ նա թմրանյութի մեծ չափաբաժին է ընդունում ելույթից խուսափելու համար, իսկ հետո հեռանում է Եվրոպա։
Եվրոպայում Ջենիֆերին ստիպում են պլաստիկ վիրահատություն կատարել, քանի որ նա միշտ ստել է իր իրական տարիքի մասին։ Եվրոպայում իր կարիերայից և ընկերոջից դժգոհ՝ նա վերադառնում է Միացյալ Նահանգներ։ Երեք տարի անց նշանվում է մի տարեց սենատորի հետ, և անհամբեր սպասում է, թե երբ է ամուսնանալու և երեխա ունենալու։ Սակայն բժշկական ստուգումների ժամանակ պարզվում է, որ Ջենիֆերը կրծքագեղձի քաղցկեղ ունի, և բուժումը, հավանաբար, նրան կզրկի երեխա ունենալու հնարավորությունից։ Այն բանից հետո, երբ նրա փեսացուն հայտնում է, որ երեխաներ չի ուզում և իրեն հետաքրքրում է միայն Ջենիֆերի մարմինը, նա համոզվում է, որ իրեն երբեք չեն սիրի այնպիսին, ինչպիսին որ կա և փախչելով հիվանդանոցից՝ ինքնասպանություն է գործում։
Նիլին կրկին հայտնվում է Ջենիֆերի հուղարկավորության ժամանակ։ Նա, ըստ երևույթին, հոգեբանական խնդիրների պատճառով կորցրել է ձայնը։ Ինքնավնասման փորձ անելուց հետո Նիլին հոսպիտալացնում են։ Միևնույն ժամանակ, Լիոնը վերադառնում է Նյու Յորք և նորից հանդիպում Աննայի հետ։ Աննան չի կարողանում հաղթահարել Լիոնի հանդեպ իր զգացմունքները, և նրանք սիրավեպ են սկսում։ Քևինը ի վերջո իմանում է այս մասին և բաժանվում է Աննայից։ Որոշ ժամանակ անց Նիլին վերականգնում է իր ձայնը Թոնի Պոլարի հետ հանպատրաստից ելույթից հետո։ Աննան ու Հենրին փորձում են համոզել Լիոնին թողնել գրողի կարիերան և դառնալ գործակալության բաժնետեր։ Հենրին պարտքով գումար է տալիս Լիոնին, որն իրականում իրեն Աննան էր տվել։
Լիոնը հաջողությամբ պլանավորում է Նիլիի կարիերայի վերադարձը։ Աննան և Լիոնն ամուսնանում են, և Աննան հղիանում է, բայց նրա երջանկությունը կարճ է տևում։ Լիոնը Նիլիից իմանում է, թե ինչպես է Աննան գաղտնի գումար տվել Հենրիին, և իրեն խաբված է զգում։ Լիոնը և Նիլին սիրավեպ են սկսում։ Հենրին համոզում է Աննային սպասել և ձևացնել, որ նա ոչինչ չգիտի, վստահեցնելով, որ Լիոնը կհոգնի Նիլիից և կվերադառնա իր մոտ։ Սիրավեպը տևում է տարիներ, Նիլին ստիպում է Լիոնին վերջ դնել իր ամուսնությանը։ Աննան նյարդային վիճակից կախվածության մեջ է ընկնում «տիկնիկներից», իսկ Լիոնը դժկամությամբ մնում է նրա հետ։ Որոշ ժամանակ անց նա խզում է հարաբերությունները, բայց շատ չանցած սկսում է հանդիպել դեռահաս երգչուհու հետ։ Աննան վերջապես հասկանում է, որ Լիոնը երբեք չի դադարի սիրավեպեր ունենալ, և ինքն ի վերջո հիասթափվելում է նրանից ու փորձում հաղթահարել բաժանումը առանց իր «տիկնիկների»։
Նախապատմություն[խմբագրել | խմբագրել կոդը]
Սյուզանն, ըստ երևույթին, երկար ժամանակ մտածել է վեպի մասին։ Դրանից մի քանի տարի առաջ նա իր ընկերուհու՝ դերասանուհի Բեատրիս Քոուլի հետ (մոտ 1910–1999)[4], սկսել էր «Նրբաբլիթի տակ» (անգլ.՝ Underneath the Pancake) շոու-բիզնեսյան վեպը։ Ավելի ուշ նա մտածել է շոու-բիզնեսում թմրանյութերի օգտագործման մասին վեպ գրել, որը կոչել է «Վարդագույն տիկնիկներ»[5]։
«Տիկնիկների հովիտը» համարվում է «բանալիով վեպ» (ֆր.՝ roman à clef), որի կերպարները հիմնված են հայտնի անձանց՝ ինչպես Ջուդի Գառլենդի, Քերոլ Լենդիսի, Դին Մարտինի և Էթել Մերմանի կյանքի հիման վրա[6]։ 1973 թվականին՝ իր երրորդ վեպի հրատարակումից հետո, Սյուզանը ասել է․ «Թող շարունակեն անվանել այն բանալիով վեպ։ Դա միայն կնպաստի իմ գրքերի վաճառքին։ Ինձ չի հետաքրքրում»[7]։
Սյուզանը գիրքը նվիրել է իր շանը՝ Ժոզեֆինին, և ամուսնուն՝ Իրվինգ Մենսֆիլդին[8]։
Արձագանքներ[խմբագրել | խմբագրել կոդը]
Գիրքը հրատարակել է Bernard Geis Associates-ը 1966 թվականի փետրվարի 10-ին[9]։
Գիրքը հիմնականում բացասական արձագանքներ է ստացել։ Publishers Weekly-ն, նախնական գրախոսության մեջ, այն անվանել է «փայլուն և սենսացիոն, սակայն վատ գրված վեպ»[10]։ Ֆեմինիստ Գլորիա Սթայնեմը քննադատել է գիրքը The New York Herald Tribune-ում[11]։ Time ամսագիրը այն անվանել է «Ամսվա սկանդալային գիրքը»[12]։
Չնայած բացասական արձագանքներին՝ գիրքը կոմերցիոն մեծ հաջողություն է ունեցել։ 1966 թվականի մայիսի 8-ին՝ ցուցակում ընդգրկվելու իններորդ շաբաթում, գիրքը հասել է New York Times բեսթսելերների ցուցակի առաջին հորիզոնական և պահպանել իր դիրքը 28 շաբաթ անընդմեջ[13]։ Ընդհանուր 65 շաբաթ ցուցակում գտնվելուց հետո, այն դարձել է 1966 թվականի ամենավաճառվող վեպը[1]։ 1974 թվականին՝ Սյուզանի մահվան տարում, այն մուտք է գործել Գինեսի ռեկորդների գիրք՝ որպես հրատարակության պատմության մեջ ամենավաճառվող վեպ՝ վաճառված ավելի քան 17 միլիոն օրինակով[14]։ 2016 թվականի դրությամբ գիրքը վաճառվել է ավելի քան 31 միլիոն օրինակով[2]։
Ծանոթագրություններ[խմբագրել | խմբագրել կոդը]
- ↑ 1,0 1,1 The 20th-Century American Bestsellers Database: 1960s. University of Virginia, via Publishers Weekly, 2016. Retrieved January 10, 2017.
- ↑ 2,0 2,1 Symonds, Alexandria. 'Valley of the Dolls', by the numbers. T: The New York Times Style Magazine. February 9, 2016. Retrieved January 10, 2017.
- ↑ Best Seller. Encyclopedia Britannica. February 23, 2011. Retrieved January 10, 2017.
- ↑ Seaman, Barbara. Lovely Me: The Life of Jacqueline Susann. 2nd ed. (New York: Seven Stories Press, 1996), p. 197.
- ↑ Seaman. Lovely Me, p. 251-252.
- ↑ Collins, Amy Fine. Once Was Never Enough. Vanity Fair, January 2000. Retrieved January 5, 2017.
- ↑ Kasindorf, Martin. Jackie Susann Picks Up the Marbles. The New York Times, August 12, 1973. Retrieved January 5, 2017.
- ↑ Susann, Jacqueline. Valley of the Dolls. New York: Bernard Geis Associates, 1966.
- ↑ Daniels, Mary. Susann's Best Love Story a Private Affair. Chicago Tribune. August 15, 1976. Retrieved January 10, 2017.
- ↑ Mansfield, Irving and Jean Libman Block. Life with Jackie. New York: Bantam Books, 1983, p. 132.
- ↑ Seaman, Lovely Me, p. 314.
- ↑ Books: Dirty Book of the Month. Time. April 22, 1966. Retrieved January 10, 2017.
- ↑ Adult New York Times Best Seller Lists for 1966. Hawes Publications. [n.d.] Retrieved January 10, 2017.
- ↑ Johnston, Laurie. Jacqueline Susann Dead at 53; Novelist Wrote 'Valley of Dolls'. The New York Times. September 23, 1974. Retrieved January 9, 2017.
Արտաքին հղումներ[խմբագրել | խմբագրել կոդը]
- Գրքեր այբբենական կարգով
- Ֆեմինիստական գրականություն
- 20-րդ դարի գրականություն
- Ամերիկյան վեպեր
- 1966 վեպեր
- 1966 թվականի ամերիկյան վեպեր
- ԱՄՆ-ի գրականություն
- Էկրանավորված ամերիկյան վեպեր
- Հեռուստասերիալների հիմք ծառայած ամերիկյան վեպեր
- Անգլերեն վեպեր
- Անգլերեն գրականություն
- Անգլերեն գրքեր
- Ամերիկյան ստեղծագործություններ
- Գրական ստեղծագործություններ այբբենական կարգով