Ռոբերտ Ներսիսյան
- Վիքիպեդիայում կան հոդվածներ Ներսիսյան ազգանունով այլ մարդկանց մասին։
| Ռոբերտ Ալբերտի Ներսիսյան | |
|---|---|
| Ընդհանուր տեղեկություններ | |
| Ծննդյան թվական | 20 հունվարի, 1958 |
| Ծննդավայր |  Երևան, Հայկական ԽՍՀ, ԽՍՀՄ |
| Մարզիչ | Ա. Կ. Աբրահամյան |
| Կարիերայի ավարտ | 1982 |
| Ակտիվ շրջան | 1975-1982 |
| Մեդալները | ||
|---|---|---|
| Տղամարդկանց հունահռոմեական ոճի ըմբշամարտ | ||
| Եվրոպայի առաջնություն | ||
| Ոսկի | Բուխարեստ 1979 | 52 կգ |
| ԽՍՀՄ առաջնություն | ||
| Ոսկի | Զապորոժիե 1978 | 52 կգ |
Ռոբերտ Ալբերտի Ներսիսյան (ծն. 20 հունվարի[1], 1958, Երևան, Հայկական ԽՍՀ), խորհրդային հունա-հռոմեական ոճի ըմբիշ, ԽՍՀՄ չեմպիոն (1978), Իվան Պոդուբնիի հիշատակին նվիրված միջազգային մրցաշարի հաղթող (1979), Եվրոպայի չեմպիոն (1979), ԽՍՀՄ միջազգային կարգի սպորտի վարպետ (1978), Հայաստանի վաստակավոր վարպետ (1994)։
Կենսագրություն[խմբագրել | խմբագրել կոդը]
Ռոբերտ Ներսիսյանը ծնվել է 1958 թվականի հունվարի 20-ին Երևանում։ Հունա-հռոմեական ոճի ըմբշամարտով սկսել է զբաղվել 1971 թվականին՝ Ա. Կ. Աբրահամյանի ղեկավարությամբ։ 1975 և 1977 թվականներին դարձել է ԽՍՀՄ չեմպիոն, իսկ 1978 թվականին՝ Եվրոպայի երիտասարդական առաջնության չեմպիոն։ 1978 թվականին հաղթել է նաև ԽՍՀՄ մեծահասակների առաջնությունում։ 1979 թվականին Իվան Պոդուբնիի հիշատակին նվիրված միջազգային մրցաշարում գրավել է առաջին տեղը և իրավունք է ստացել ԽՍՀՄ հավաքականի կազմում մասնակցելու Բուխարեստում անցկացված Եվրոպայի առաջնությանը։ Հաղթելով 4 մենամարտերում՝ Ռոբերտ Ներսիսյանը դուրս եկավ եզրափակիչ, որտեղ հաղթեց ռումինացի հայտնի ըմբշամարտիկ, աշխարհի երկակի չեմպիոն, Մոնրեալի Օլիմպիական խաղերի բրոնզե մեդալակիր Նիկ Ջինգին և նվաճեց Եվրոպայի չեմպիոնի տիտղոսը։ Այդ հաղթանակի շնորհիվ Ռոբերտ Ներսիսյանը դարձավ Հայաստանի առաջին ներկայացուցիչը, որ նվաճել է Եվրոպայի չեմպիոնի տիտղոսը հունա-հռոմեական ոճի ըմբշամարտում[2].։
1982 թվականին ավարտել է իր մարզական կարիերան և Մասիս քաղաքի Մանկապատանեկան մարզադպրոցում աշխատել որպես մարզիչ։ 1984-1989 թվականներին եղել է այդ դպրոցի տնօրեն։ 1989-1995 թվականներին Երևանում զբաղվել է մարզչական գործունեությամբ։ Պատրաստել է միջազգային մակարդակի մի շարք մարզիկներ։ Նրա հայտնի աշակերտներից են Օլիմպիական երկակի չեմպիոն Արմեն Նազարյանը[2], աշխարհի չեմպիոն Վաղինակ Գալստյանը, Եվրոպայի չեմպիոն Վարդան Աղաջանյանը։
1996 թվականից Ռոբերտ Ներսիսյանն բնակվում է Ռուսաստանի Տոլյատի քաղաքում։ 1998-2007 թվականներին եղել է Սամարայի մարզի ըմբշամարտի ֆեդերացիայի մարզիչ-խորհրդատուն։
Ծանոթագրություններ[խմբագրել | խմբագրել կոդը]
- ↑ Մի շարք աղբյուրներում Ռոբերտ Ներսիսյանի ծննդյան օրը սխալմամբ համարվում է հունվարի 10-ը։
- ↑ 2,0 2,1 Արմեն Նազարյան. «Երբեք չեմ մոռանա Ստամբուլում կայացած Եվրոպայի երիտասարդական առաջնությունը»
Աղբյուրներ[խմբագրել | խմբագրել կոդը]
- http://www.fila-official.com/index.php?option=com_database&act=ficheLutteur&act2=listeEvent&Itemid=&id_lutteur=4004469174EA45AD8EB687C896D5179D&filtre_pays=&lettre=&recherche_lutteur=&lang=en(չաշխատող հղում)
- Мягченков Н.И. Классическая и вольная борьба: Справочник. — М: Физкультура и спорт, 1984. — 240 с.