Հինգ տարեկան հասակում ընտանիքի հետ տեղափոխվել է Ավստրալիա և մեծացել է Սիդնեյում։ 1987 թվականին ավարտել է Նյուինգտոնի քոլեջը, այնուհետև ուսումը շարունակել է Ավստրալիայի Դրամատիկական արվեստի ազգային ինստիտուտում, որն ավարտել է 1995 թվականին՝ կատարողական արվեստի ոլորտի բակալավրի աստիճանով[1]։ Նույն թվականին տեղափոխվել է Նոր Զելանդիա, որտեղ էլ սկսել է դերասանական կարիերան։
Մեժերը սկսել է կարիերան մասնակցելով նորզելանդական «Սիրելի քաղաք» սերիալում, որտեղ նկարահանվել է 1996-1998 թվականներին։ 1998 թվականին առաջադրվել է Նոր Զելանդիայի հեռուստատեսային մրցանակին՝ «Փողոցային իրավունքներ» սերիալում իր դերի համար[2]։
Մեժերը 2004 թվականին տեղափոխվել է ԱՄՆ և սկսել է հանդես գալ կինոյում ու հեռուստատեսությունում։ Նա խաղացել է այնպիսի սերիալներում ինչպիսիք են «Կորուսյալները», «Ոսկորներ», «Ուրվականների հետ խոսողը» և «Լաս Վեգաս»։ 2005-2007 թվականներին նկարահանվել է նաև «Ջորդանի հետաքննությունը» սերիալում։ Մեժերը վերադարձել է Նոր Զելանդիա, որտեղ նկարահանվել է երկու կարճ սերիալներում՝ «Ֆորտունա» (2009) և «Սա իմ կյանքը չէ» (2010)։ Նա վերադարձել է ԱՄՆ, որտեղ նկարահանվել է «Այցելուները» (2010-2011) սերիալում, այնուհետև հրավիրվել է «Հուսահատ տնտեսուհիները» (2011-2012) սերիալի ութերորդ և վերջին եթերաշրջան՝ հիմնական դերով, որտեղ կատարել է Բեն Ֆոլկների դերը, կապալառու, որը սիրավեպ է սկսել Ռենե Փերիի հետ (Վանեսա Ուիլյամս)[3]։ 2014-2018 թվականներին նկարահանվել է «Once Upon a Time» սերիալի հինգ էպիզոդում՝ ծովահեն Սև Մորուքի դերում[4]։