Մարտուն Բադալյան (զինվորական)
| Մարտուն Օհանի Բադալյան | |
|---|---|
| մարտի 4, 1951- հունվարի 7, 1994 | |
| Ծննդավայր |  Նորաշենիկ Կապանի շրջան |
| Մահվան վայր |  Հորադիզ, անհետ կորած |
| Ծառայության տարիներ | 1992 ապրիլի 24 - 1994 հունվարի 7 |
Մարտուն Օհանի Բադալյան, (մարտի 4, 1951, Նորաշենիկ, Կապանի շրջան-հունվարի 7, 1994, Հորադիզ, Ֆիզուլի), զինվորական, 6-րդ մոտոհրաձգային գումարտակի հրամանատար, Արցախյան ազատամարտի մասնակից։
Կենսագրություն[խմբագրել | խմբագրել կոդը]
Մարտուն Բադալյանը ծնվել է 1951 թվականի մարտի 4-ին Կապանի շրջանի Նորաշենիկ գյուղում, բանվորի ընտանիքում։ 1958 թվականին հաճախել է Կապանի՝ Հունան Ավետիսյանի անվան միջնակարգ դպրոցը, ապա՝ 1962 թվականին, տեղափոխվել թիվ 27 գիշերօթիկ դպրոց։ Միջնակարգ կրթությունն ավարտելուց հետո 1969 թվականին ընդունվել է Քաջարանի շինարարական տեխնիկումը։ Վերջին կուրսից պարտադիր զինվորական ծառայության է կանչվել և ծառայել նախկին ԽՍՀՄ զինված ուժերում։ Ծառայությունից հետո՝ 1972 թվականին, ընդունվել է Երևանի գյուղատնտեսական ինստիտուտի մեխանիկական ֆակուլտետը, որն ավարտել է 1978 թվականին և աշխատանքի անցել Կապանի ավտոձեռնարկությունում։ 1979 թվականին տեղափոխվել է Կապանի ավտոդպրոց և աշխատել որպես դասավանդող։ Հետագայում աշխատել է Քաջարանի կոմունալ տնտեսությունում՝ որպես ինժեներ-մեխանիկ։
1992 թվականի ապրիլի 24-ին կամավոր անդամագրվել է Կապանի ինքնապաշտպանական գումարտակին։ Եղել է նույն գումարտակի հրամանատարի առաջին տեղակալ։ Գումարտակը լուրջ հաջողություններ ունեցավ 1992 թվականի դեկտեմբերի 10-ի օպերացիայի ժամանակ․ ազատագրվեցին Նոր Ղազանչի, Աղքենդ, Ջամբար գյուղերը։
Մարտուն Բադալյանը 1993 թվականի սկզբից իր ծառայությունը շարունակեց Կապանում ստեղծված ՀՀ ՊՆ թիվ 97-րդ ԱՄՀԲ-ում՝ որպես 3-րդ ՄՀԳՄ-ի փոխհրամանատար։ 1993 թվականի մայիսի 6-ին նշանակվել է նույն բրիգադի 6-րդ մոտոհրաձգային գումարտակի հրամանատար՝ ղեկավարելով Ճակատեն, Շիկահող, Սրաշեն, Ծավ գյուղերի պաշտպանական մարտերը։ Իր ղեկավարությամբ բրիգադն աչքի է ընկել նաև Կուբաթլուի, Զանգելանի, Հորադիզի տարածքների ազատագրման մարտական գործողություններին։
1994 թվականի հունվարի 7-ին Հորադիզ կայարանի մերձակայքում մարտական գործողությունների ժամանակ անհետ կորել է[1]։
Ընտանիք[խմբագրել | խմբագրել կոդը]
- Կինը՝ Անտոնյան Սիլվարդ (1952)
- Որդիները՝ Դավիթ (1978), Էդգար (1979)
- Դուստրը՝ Գոհար (1982)
Պարգևներ[խմբագրել | խմբագրել կոդը]
Մարտուն Օհանի Բադալյանը ՀՀ Նախագահի հրամանագրով հետմահու պարգևատրվել է «Արիություն» մեդալով։ Պարգևատրվել է նաև մի շարք գերատեսչական մեդալներով և պատվոգրերով։
Հիշատակ[խմբագրել | խմբագրել կոդը]
Մարտուն Բադալյանի և Կապանի 97-րդ բրիգադի 6-րդ մոտոհրաձգային գումարտակի անհետ կորած տղաների հիշատակը հավերժացնելու համար 2018 թվականի ամռանը Շիկահողում կանգնեցվել է հուշակոթող։
Ծանոթագրություններ[խմբագրել | խմբագրել կոդը]
- ↑ LLC, Ayb Solutions. «ԿԱՊԱՆԻ ԲՐԻԳԱԴԻ ՄԱՐՏԱԿԱՆ ՈՒՂԻՆ». Hay Zinvor (անգլերեն). Վերցված է 2019 թ․ փետրվարի 12-ին.