Երջանիկ Հովեյան
- Վիքիպեդիայում կան հոդվածներ Հովեյան ազգանունով այլ մարդկանց մասին։
Երջանիկ Հովեյան | |
---|---|
Ծնվել է | 1921 |
Ծննդավայր | Երանոս, Նոր Բայազետի գավառ, Հայկական ԽՍՀ |
Քաղաքացիություն | ԽՍՀՄ |
Կրթություն | Հայկական պետական մանկավարժական համալսարան |
Մասնագիտություն | մանկավարժ |
Կուսակցություն | ԽՄԿԿ |
Պարգևներ և մրցանակներ |
Երջանիկ Սարգսի Հովեյան (1921, Երանոս, Նոր Բայազետի գավառ, Հայկական ԽՍՀ), հայ մանկավարժ։ ԽՄԿԿ անդամ (1943): ՀԽՍՀ վաստակավոր ուսուցիչ (1969): Հայրենական մեծ պատերազմի մասնակից։
Կենսագրություն[խմբագրել | խմբագրել կոդը]
Երջանիկ Հովեյանը ծնվել է 1921 թվականին, Մարտունու շրջանի Երանոս գյուղում։ 1940 թվականին ավարտել է Կամո քաղաքի մանկավարժական ուսումնարանը և ուսուցչական աշխատանքի անցել Մարտունու շրջանում[1]։
1940 թվականի հոկտեմբերին զորակոչվել է կարմիր բանակ և ծառայել 141-րդ դիվիզիայի 745-րդ հրաձգային գնդում, որը գտնվել է Շեպետովկա քաղաքում։ 1941 թվականի հունիսի 22-ին նրանց զորամասը մարտի է բռնվել թշնամու մոտոհետևակային և տանկային ուժերի հետ։ Հունիսի 29-ին Երջանիկը վիրավորվել է, ապաքինվելուց հետո ծառայել է 3-րդ գվարդիական փառաբանված դիվիզիայի 22-րդ հրետանային գնդում։ Սեպտեմբերին Վոլխովի ռազմաճակատում կռվել է Լենինգրադի պաշտպանության համար։ 1942 թվականի ամառը նրանց զորամասը տեղափոխվել է Ռյազանի մարզ, համալրվել թարմ ուժերով և տեղափոխվել Ստալինգրադյան ռազմաճակատ։ Մարտերից մեկում Երջանիկը վիրավորվել է, ապաքինվելուց հետո վերադարձել է իր գունդը։ 1943-1944 թվականներին մասնակցել է Դոնբասի, Աջափնյա Ուկրաինայի, այնուհետև Ղրիմի ազատագրմանը։ 1944-1945 թվականներին 1-ին Մերձբալթյան և 3-րդ Բելոռուսական ռազմաճակատների կազմում մասնակցել է Բելոռուսիայի, Լիտվայի ազատագրմանը, Քյոնիգսբերգի գրավմանը[1]։
Հովեյանը պարգևատրվել է Կարմիր աստղի, Փառքի 3-րդ աստիճանի շքանշաններով, «Խիզախության համար», «Լենինգրադի պաշտպանության համար», «Ստալինգրադի պաշտպանության համար», Քյոնիգսբերգի գրավման համար մեդալներով։ 1943 թվականին ընդունվել է կուսակցության շարքերը[1]։
1945 թվականին զորացրվել է բանակից և շարունակել մանկավարժական աշխատանքը։ Ավարտել է հեռակա մանկավարժական ինստիտուտի աշխարհագրության ֆակուլտետը։ Երկար տարիներ եղել է Երանոս գյուղի միջնակարգ դպրոցի տնօրեն, այնուհետև՝ երեկոյան դպրոցի տնօրեն։ 1969 թվականին Հովեյանին շնորհվել է ՀԽՍՀ վաստակավոր ուսուցչի կոչում[1]։
Պարգևներ[խմբագրել | խմբագրել կոդը]
- ՀԽՍՀ վաստակավոր ուսուցիչ (1969)
- Կարմիր աստղի շքանշան
- Փառքի 3-րդ աստիճանի շքանշան
- «Խիզախության համար» մեդալ
- «Լենինգրադի պաշտպանության համար» մեդալ
- «Ստալինգրադի պաշտպանության համար» մեդալ
- Քյոնիքսբերգի գրավման համար մեդալ