Արփիկ Հասրաթյան
Արփիկ Հասրաթյան | |
|---|---|
 | |
| Ծնվել է | հունիսի 25, 1950 Երևան, Հայկական ԽՍՀ, ԽՍՀՄ |
| Մահացել է | մարտի 27, 2020[1] (69 տարեկանում) Մոսկվա, Ռուսաստան |
| Ազգություն | հայ |
| Մասնագիտություն | համաճարակաբան |
| Հաստատություն(ներ) | Մոսկվայի Ի. Սեչենովի անվան առաջին պետական բժշկական համալսարան և Gamalei Institute of Epidemiology and Microbiology? |
| Ալմա մատեր | Երևանի Մխիթար Հերացու անվան Պետական Բժշկական Համալսարան |
| Գիտական աստիճան | բժշկական գիտությունների դոկտոր (1997) և պրոֆեսոր (1998) |
| Ամուսին(ներ) | Միշիկ Ղազարյան |
| Arpik Asratyan Վիքիպահեստում | |
Արփիկ Աշոտի Հասրաթյան (հունիսի 25, 1950, Երևան, Հայկական ԽՍՀ, ԽՍՀՄ - մարտի 27, 2020[1], Մոսկվա, Ռուսաստան), հայ համաճարակաբան, իմունաբան: Բժշկական գիտությունների դոկտոր (1997), պրոֆեսոր (1998): ՌԴ բժշկատեխնիկայի ակադեմիայի անդամ (2003): Մոսկվայի Ի. Մ. Սեչենովի անվան առաջին բժշկական համալսարանի պրոֆեսոր, գիտական քարտուղար[2]:
Կենսագրություն[խմբագրել | խմբագրել կոդը]
Արփիկ Հասրաթյանը ծնվել է 1950 թվականին Երևանում՝ ինժեներ-շինարար Աշոտ Ասատուրի Հասրաթյանի և ինժեներ-տեխնոլոգ Սեդա Հովհաննեսի Աղավելյանի ընտանիքում: Սովորել է Երևանի Ա.Պ. Չեխովի անվ․ թիվ 42 միջնակարգ դպրոցում: 1973 թվականին գերազանցությամբ ավարտել է Երևանի բժշկական ինստիտուտը: 1973 թվականից աշխատում է ՌԴ ԲԳԱ Մոսկվայի համաճարակաբանության և միկրոկենսաբանության ԳՀԻ-ում, 1997 թվականից՝ առաջատար գիտաշխատող, միաժամանակ 1997 թվականից դասախոսում է Սեչենովի անվ․ Մոսկվայի Առաջին Պետական Բժշկական Համալսարանում: Պրոֆեսոր Հասրաթյանը պրոֆեսոր Վ.Վասիլևայի և ակադեմիկոս Հ.Բարոյանի ուսանողն էր: 1977 թ. պաշտպանել է բժշկական գիտությունների թեկնածուի թեզը, իսկ 1997-ին՝ դոկտորական ատենախոսությունը «Հեպատիտ A և B վիրուսների ժամանակակից համաճարակաբանական բնութագրերը» թեմայով[3]։ Աշխատանքները վերաբերում են համաճարակաբանության, վիրուսային և սեռական ճանապարհով փոխանցվող վարակների հարցերին[4]: 1998թ․-ից նաև պրոֆեսոր է: Արփիկ Հասրաթյանի հիմնական գիտական հետաքրքրությունները վիրուսային հեպատիտներն էին: Նա երկրի առաջատար մասնագետներից էր վիրուսային հեպատիտների բնագավառում: Հասրաթյանը նաև հայտնի է ցիտոմեգալովիրուս, միկոպլազմա հոմինիս, ՄԻԱՎ վարակների և տուբերկուլյոզի վերաբերյալ աշխատանքներով: Պրոֆեսոր Հասրաթյանի անմիջական մասնակցությամբ ստեղծվել են Ռուսաստանում առաջին դիագնոստիկումները: Ելքային նյութեր հավաքելու համար Հասրաթյանը իր գործընկերների հետ միասին աշխատել է նախկին ԽՍՀՄ շատ մասերում` Հեռավոր Արևելքում, Կենտրոնական Ասիայի հանրապետություններում, ինչպես նաև Ռուսաստանի շատ քաղաքներում: 1997-ին նա ակադեմիկոս Չերկասկիի կողմից հրավիրվել է Սեչենովի անվ․ Մոսկվայի Առաջին Պետական Բժշկական Համալսարանի մասնագիտական կրթության ինստիտուտի համաճարակաբանության ամբիոն։ Պրոֆեսոր Հասրաթյանը ավելի քան 20 տարի նվիրել է ամբիոնի կայացմանն ու զարգացմանը, գիտական և դասախոսական գործունեությանը: Հասրաթյանը գիտական հանդեսներում ավելի քան 200 հրապարակումների և մենագրությունների մի շարք գլուխների հեղինակ է[5]: Նրա ղեկավարությամբ գրվել են բազմաթիվ թեկնածուական ատենախոսություններ, պատրաստվել են գործնական համաճարակաբանության բարձր որակավորում ունեցող մասնագետներ: Արփիկ Հասրաթյանը մահացել է COVID-19 կորոնավիրուսային վարակից, ինչից 10 օր անց նույն ախտորոշմամբ մահացել է նաև նրա ամուսինը՝ Միշիկ Ղազարյանը:
Ընտանիքը[խմբագրել | խմբագրել կոդը]
Հասրաթյանը ամուսնացած էր, ուներ երկու զավակ։ Ամուսինը լազերային ֆիզիկայի և օպտիկայի բնագավառում ակնառու գիտնական, պրոֆեսոր Միշիկ Հայրազատի Ղազարյանն էր։ Հասրաթյանի դուստրը՝ Սերինե Ղազարյանը, մանկաբարձ-գինեկոլոգ է, բժշկական գիտությունների թեկնածու[6], որդին ՝ Հայրազատ Ղազարյանը վիրաբույժ է, բժշկական գիտությունների դոկտոր, պրոֆեսոր[7]: Արփիկ Հասրաթյանը բժիշկ-ֆիզիոլոգ Հասմիկ Հասրաթյանի քույրն էր:
Պարգևներ[խմբագրել | խմբագրել կոդը]
- ԺՏՆՑ արծաթե մեդալ
Երկեր[խմբագրել | խմբագրել կոդը]
- Профилактика внутрибольничных инфекций. Москва, 1993 (համահեղինակ).
- Частная эпидемиология, том 1-2, Москва, 2002.
Ծանոթագրություններ[խմբագրել | խմբագրել կոդը]
- ↑ 1,0 1,1 1,2 В больнице в Коммунарке скончалась профессор-эпидемиолог, госпитализированная с коронавирусом
- ↑ Օտարերկրյա պետությունների հայազգի գիտնականների ցուցակ՝ ըստ գիտական և գիտատեխնիկական գործունեության բնագավառների
- ↑ «А.А.Асратян, «Современная эпидемиологическая характеристика вирусных гепатитов А и В», автореферат диссертации доктора медицинских наук»։ Վերցված է May 22, 2020
- ↑ Ով ով է. Հայեր. Կենսագրական հանրագիտարան, հատոր առաջին, Երևան, 2005
- ↑ «Светлой памяти Асратян Арпик Ашотовны»։ Վերցված է May 21, 2020
- ↑ «С.М.Казарян,GMS Clinics»։ Վերցված է May 22, 2020
- ↑ «А.М.Казарян,Сеченовский Университет»։ Վերցված է May 22, 2020
- Հունիսի 25 ծնունդներ
- 1950 ծնունդներ
- Երևան քաղաքում ծնվածներ
- Մարտի 27 մահեր
- 2020 մահեր
- Մոսկվա քաղաքում մահացածներ
- Գիտնականներ այբբենական կարգով
- Անձինք այբբենական կարգով
- Հայ համաճարակաբաններ
- Հայ իմունաբաններ
- Բժշկական գիտությունների դոկտորներ
- Հայ պրոֆեսորներ
- Երևանի պետական բժշկական համալսարանի շրջանավարտներ
- 2019-2020 կորոնավիրուսի համավարակից մահացածներ