Արմինե Հովհաննիսյան
| Արմինե Հովհաննիսյան | |
|---|---|
| Ծնվել է | օգոստոսի 6, 1963 (61 տարեկան) |
| Ծննդավայր | Երևան, Հայկական ԽՍՀ, ԽՍՀՄ |
| Կրթություն | Օքսիդենթալ քոլեջ, Վաշինգտոնի ամերիկյան համալսարան և Լոս Անջելեսի կալիֆոռնյան համալսարան |
| Մասնագիտություն | հասարակական գործիչ, դիվանագետ և իրավաբան |
| Ամուսին | Րաֆֆի Հովհաննիսյան |
Արմինե (Արմենուհի) Գասպարի Հովաննիսյան (օգոստոսի 6, 1963, Երևան, Հայկական ԽՍՀ, ԽՍՀՄ), հայ հասարակական գործիչ, դիվանագետ, իրավաբան։
Կենսագրություն
[խմբագրել | խմբագրել կոդը]Արմինե Հովաննիսյանը ծնվել է 1963 թվականի օգոստոսի 6-ին, Երևանում։ Նրա արմատները սերում են Արևմտյան Հայաստանից։ 1915 թվականի Մեծ Եղեռնից փրկվելով՝ Արմինեի մեծ պապերը` Փանոս Փանոսյանը և Սուքիաս Խաչիկյանը հաստատվել են Լիբանանում, որտեղ էլ ծնվել են նրանց զավակները` Արմինեի ծնողները` Գասպարը և Թագուհին։ 1947 թվականին Փանոսյան և Խաչիկյան ընտանիքները հայրենադարձել են, և նրանց երեք դուստրերը՝ Ալվարդը, Կարինեն և Արմինեն ծնվել են Հայաստանում։ Երբ Արմինեն տասնմեկ տարեկան էր, Խաչիկյան ընտանիքը գաղթել է Միացյալ Նահանգներ։
Միջնակարգ դպրոցն ավարտելուց հետո, Արմինեն կրթություն է ստացել ԱՄՆ-ի ճանաչված համալսարաններում։ 1981-1985 թվականներին սովորել է Կալիֆոռնիա նահանգի Լոս Անջելեսի Արևմտյան քոլեջում (Occidental College)` հումանիտար գիտությունների բնագավառում ստանալով բակալավրի աստիճան դիվանագիտություն և միջազգային հարաբերություններ մասնագիտացմամբ։ Ուսումնառության ընթացքում մասնակցել է հատուկ ծրագրերի. 1982-1983 թվականներին սովորել է Վաշինգտոնի ամերիկյան համալսարանում (American University), անցել է կառավարման գործի հատուկ կուրսեր և գործնական աշխատանքներ կատարել կառավարման համակարգում։ 1984-1985 թվականներին Կալիֆոռնիայի համալսարանում (UCLA) հայոց պատմություն և քաղաքական գիտություններ է ուսանել պրոֆեսոր Ռիչարդ Հովհաննիսյանի մոտ։ 1985-1988 թվականներին սովորել է Կալիֆոռնիայի իրավաբանական դպրոցում` ստանալով իրավաբանության դոկտորի աստիճան։
Գործունեություն
[խմբագրել | խմբագրել կոդը]Աշխատանքային գործունեությունը Արմինե Հովաննիսյանը սկսել է Կալիֆոռնիայի Լոս Անջելես քաղաքում` որպես իրավաբան (1989-1992) Whitman and Ransom ընկերությունում։ Տեղափոխվելով Հայաստան` 1992-1993 թվականներին զբաղեցրել է Project Hope կազմակերպության տնօրենի պաշտոնը` ղեկավարելով բժիշկների և ֆիզիոթերապևտների վերապատրաստումը։ 1993 թվականից «Հայաստանի պատանեկան նվաճումներ» կազմակերպության գործադիր տնօրենն է։
Հայաստանի պատանեկան նվաճումներ
[խմբագրել | խմբագրել կոդը]Հայաստանի պատանեկան նվաճումները «Միջազգային պատանեկան նվաճումներ» (Junior Achievement) կազմակերպության մասնաճյուղն է։ Միջազգային այդ կառույցում ընդգրկված են աշխարհի 150 երկրներ։ Կազմակերպության կրթական ծրագրերն ուղղված են հանրակրթական դպրոցներում տնտեսագիտություն և քաղաքացիական կրթություն առարկաների դասավանդմանը, իսկ առաքելությունը հայ երիտասարդներին միջազգային ասպարեզում մրցունակ լինելու և հաջողության հասնելու նպատակով անհրաժեշտ գիտելիքներով և հմտություններով զինելն է։ Կազմակերպության ծրագրերի շնորհիվ աշակերտները գիտելիքներ են ստանում շուկայական համակարգի, գործարարության դերի, կառավարման սկզբունքների, հանրային և մասնավոր ձեռնարկությունների, ինչպես նաև ժողովրդավարության հենասյուների վերաբերյալ՝ ներառյալ մարդու իրավունքները, քաղաքացիական պարտականություններն ու հանրային պատասխանատվությունը[1]։ Այս գիտելիքների ձեռքբերման ճանապարհին աշակերտների համար ուղեցույց է հանդիսանում Արմինե Հովաննիսյանի կողմից հեղինակված «Քաղաքացիական կրթության» դասագիրքը` նախատեսված ավագ դպրոցների աշակերտների համար։
Օրրան
[խմբագրել | խմբագրել կոդը]2000 թվականին Արմինե Հովաննիսյանն ամուսնու` Րաֆֆի Հովհաննիսյանի հետ հիմնադրել է Օրրան հասարակական- բարեգործական կազմակերպությունը, որի նպատակներն ուղղված են Հայաստանի մանուկների ու տարեցների շրջանում մուրացկանության տարածման կանխմանը[2][3]։ Ամեն օր Օրրանի Երևանի և Վանաձորի կենտրոններում տաք սնունդ և սոցիալական տարբեր ծառայություններ են տրամադրվում շուրջ 300 երեխաների Երևանում և 100 միայնակ տարեցների։ Օրրանի բարեգործական ատամնաբուժարանն անվճար սպասարկում է 6-16 տարեկան կարիքավոր բոլոր երեխաներին։ Օրրանի առաքելությունը տնտեսական ճգնաժամի հետևանքով փողոցում հայտնված երեխաներին օգնության ձեռք մեկնելն է` նրանց կրթական, մշակութային և արտադասարանական միջոցառումներում ներգրավելու միջոցով, ինչպես նաև անապահով երեխաների ընտանիքներին և միայնակ ու կարիքավոր տարեցներին օգնություն ցուցաբերելը[4]։ Օրրանի բարեգործական ծրագրերից օգտվել են ավելի քան 30000 անապահով քաղաքացիներ։
Արմինե Հովաննիսյանը մշտապես արձագանքնել է հասարակության և հայ ժողովրդի ցավոտ խնդիրներին` հոդվածներով հանդես գալով այնպիսի օրաթերթերում, ինչպիսիք են «Առավոտը», Թուրքիայի Հուրիեթը։
Ընտանիք
[խմբագրել | խմբագրել կոդը]Արմինե Հովաննիսյանի ամուսինը` Րաֆֆի Հովհաննիսյանը[5], 1991 թվականին եղել է Հայաստանի երրորդ հանրապետության առաջին արտգործնախարարը։ 2006 թվականին նա հիմնել է Ժառանգություն կուսակցությունը և նախագահում է այն։ Կուսակցությունը 2007 թվականին մասնակցել է խորհրդարանական ընտրություններին և ներկայացվել ՀՀ Ազգային ժողովում։
Արմինե Հովաննիսյանն ունի հինգ զավակ` Կարինը, Տարոնը, Վանը, Շուշին և Արմենը։
Պարգևներ
[խմբագրել | խմբագրել կոդը]Արմինե Հովաննիսյանն իր աշխատանքային գործունեության ընթացքում արժանացել է բազմաթիվ պարգևների և շնորհակալագրերի։
- «Պլատինե նվաճումներ»՝ Միջազգային պատանեկան նվաճումների կողմից, 1999
- Հայ միջազգային կանանց միության «Կատարելություն» շնորհակալագիր, 1997
- Վազգեն I-ի անվան մեդալ, 1997
- Ֆրիտյոֆ Նանսենի ոսկե հուշամեդալ` հասարակական-քաղաքական, մարդասիրական սկզբունքների հաստատման և հայոց ցեղասպանության դատապարտման ուղղությամբ ծավալած գործունեության համար, 2006
- ՀՀ կրթության և գիտության նախարարության Ոսկե մեդալ, 2017
Ծանոթագրություններ
[խմբագրել | խմբագրել կոդը]- ↑ «Հայաստանի պատանեկան նվաճումներ» կազմակերպությունը պարտավորվում է՝ աջակցել Ձեռնարկատիրական կրթության հայեցակարգի մշակմանը
- ↑ Orran, Board of Directors and Founders
- ↑ Orran, Staff
- ↑ Արվեստի նմուշներ, երգ ու Թանկյանի կիթառը՝ Օրրանի 5-րդ բարեգործական ընթրիքին
- ↑ «Արմինե Հովհաննիսյան. «Բարեգործությամբ զբաղվելու համար պարտադիր չէ առաջին տիկին դառնալ»». Արխիվացված է օրիգինալից 2013 թ․ դեկտեմբերի 31-ին. Վերցված է 2019 թ․ մարտի 29-ին.