ԱրՔա (Արմենիան Քարդ)
ԱրՔա | |
|---|---|
| Տեսակ | բիզնես ձեռնարկություն |
| Հիմնադրված է | 2000 |
| Վայր | Երևան, Հայաստան |
| Երկիր |  Հայաստան |
| Արդյունաբերություն | economics of banking? |
| Կայք | arca.am(հայ.) |
Արմենիան Քարդ, (անգլ.՝ Armenian Card (ArCa)) հայկական ազգային, միջբանկային, դրամային հաշվարկային համակարգի պլաստիկ քարտ։
Պատմություն
[խմբագրել | խմբագրել կոդը]«Արմենիան Քարդ» ՓԲԸ-ն հիմնադրվել է 2000 թվականի մարտին, ՀՀ կենտրոնական բանկի և տասը առևտրային բանկերի կողմից, USAID-ի աջակցությամբ, Հայաստանի բանկային ոլորտում նոր վճարահաշվարկային համակարգի ներդրման և զարգացման նպատակով[1]։
Պրոցեսինգային ծառայություններ մատուցելու լիցենզիան տրվել է 2003 թվականի փետրվարի 12-ին ՀՀ Կենտրոնական բանկի խորհրդի կողմից։
2006 թվականի փետրվար ամսից ԱրՔա-ն, ՄԱԿ-ի Զարգացման ծրագրի հետ համատեղ (UNDP), ներդրեց ինտերնետի միջոցով կոմունալ վճարումների փոխանցման համակարգ, որը թույլ է տալիս քարտապաններին վճարել էլեկտրաէներգիայի, գազի, ջրի, կապի համար, ձեռք բերել ինտերնետ քարտեր ինչպես նաև կատարել բջջային հեռախոսների կանխավճարային քարտերի հաշիվների համալրում։
«Արմենիան Քարդ» ՓԲԸ-ի բաժնետերերն են Հայաստանի Հանրապետության կենտրոնական բանկը և հանրապետության 17 խոշորագույն առևտրային բանկերից 15-ը։ Մասնավորապես, մասնակից չեն հանդիսանում Մելլաթ Բանկը և Արմսվիսբանկը[2]։
- Արդշինբանկ
- Ամերիաբանկ
- Հայէկոնոմբանկ
- Արցախբանկ
- ԱյԴի Բանկ
- ԱԿԲԱ-Կրեդիտ Ագրիկոլ բանկ
- Կոնվերսբանկ
- Ինեկոբանկ
- Էյչ-Էս-Բի-Սի Բանկ Հայաստան
- Բիբլոս Բանկ Արմենիա
- Յունիբանկ
- Էվոկաբանկ
- ՎՏԲ-Հայաստան բանկ
- Արարատբանկ
- Հայբիզնեսբանկ
Ըստ ՀՀ Կենտրոնական բանկի տվյալների՝ 2017 թվականի հունվարի 1-ին Հայաստանում գործող ակտիվ քարտերի ընդհանուր թիվը կազմել է 1 570 758[2]։
Հայաստանի բանկերի միության գործադիր տնօրեն Սեյրան Սարգսյանն առցանց ասուլիսի ժամանակ ասել է, որ Հայաստանում գործող ակտիվ վճարային քարտերի ընդհանուր թիվը 2020թ.–ի առաջին եռամսյակի արդյունքում կազմել է 2 460 333, ինչը 2,9%–ով կամ 70 հազար քարտով ավել է` 2019թ.–ի համեմատ[3]։
Գործառույթներ
[խմբագրել | խմբագրել կոդը]ԱրՔա վճարային համակարգը տրամադրում է հետևյալ ծառայությունները՝ կանխիկ դրամական փոխանցումներ, ստացված ապրանքի կամ ծառայությունների համար առևտրային և սպասարկման կետերում վճարումներ, բանկոմատներում վճարումներ կոմունալ ծառայությունների համար, ինտերնետում էլեկտրոնային վճարումներ (ներառյալ կոմունալ վճարումները), քարտային հաշվի հաշվեկշռի վերաբերյալ տեղեկատվության տրամադրում, առցանց առևտուր, գումարի փոխանցում քարտից քարտ։
Ընկերությունը մատուցում է ծառայությունների փաթեթ, որը հնարավորություն է տալիս բանկերին թողարկել և սպասարկել ArCa, MasterCard, VISA, American Express և Diners Club International քարտեր՝ օգտվելով պրոցեսինգային կենտրոնի ժամանակակից տեխնիկական, տեխնոլոգիական և ծրագրային հնարավորություններից, ինչպես նաև Ընկերության մասնագիտական օժանդակությունից[1]։
Ինչպես նաև ԱրՔա-ն առաջարկում է համապարփակ ծառայություններ, որոնք թույլ են տալիս բանկերին թողարկել և սպասարկել հետևյալ տեսակի քարտեր.
- ArCa Debit - դեբետային քարտ, որը թույլ է տալիս կատարել վճարումներ կամ ստանալ կանխիկ գումար։ ArCa Debit-ը կարող է ծառայել նաև որպես աշխատավարձային քարտ։
- ArCa Classic - դեբետային քարտ, հնարավոր է օվերդրաֆտի թույլտվություն` կախված թողարկող բանկի կողմից սահմանված պայմաններից։ Օվերդրաֆտի թույլտվության դեպքում քարտապանին տրամադրվում է լրացուցիչ ֆինանսական միջոցներ վարկի տեսքով, որի միջոցով քարտապանը բանկային տոկոսը վճարում է միայն օգտագործված գումարի չափով։ ArCa Classic-ը կարող է ծառայել նաև որպես աշխատավարձային քարտ։
- ArCa Gold - վարկային քարտ, որը տրվում է բանկի հուսալի հաճախորդներին։ Քարտապաններին տրամադրվում են հետևյալ ծառայությունները` տրամադրված վարկի ցածր տոկոսադրույք, առևտրի և սպասարկման օբյեկտներում զեղչերի, բոնուսների կիրառում, ապահովագրություն և այլն։
- ArCa Business - վարկային քարտ, որը կարող են ձեռք բերել միայն կազմակերպությունները։ Կազմակերպության աշխատակիցը, ում անունով քարտը բացվում է, կարող է ստանալ կանխիկ գումար կամ կազմակերպության կողմից ձեռք բերված ապրանքի համար կանխիկ վճարումներ կատարելու և կազմակերպության կողմից նախկինում հաստատված գումարի չափով մատուցվող ծառայությունների համար։ Կազմակերպության աշխատողների անունով, բանկի անունից բացված քարտի հաշվին կարող են կցվել մի քանի քարտեր՝ նախապես սահմանված ծախսային սահմանափակումներով։
- ArCa Platinum - վարկային քարտը, որի սեփականատիրոջը թողարկող բանկը առաջարկում է ծառայությունների լայն տեսականի։
- ArCa Affinity - վստահելի հաճախորդներին կամ թողարկող բանկի կողմից սահմանված պահանջներին համապատասխանող հաճախորդներին տրվող վարկային քարտ։ ArCa Affinity-ն նախատեսված է բացառապես նմանատիպ օբյեկտների (գազալցակայաններ, ավիացիոն գործակալություններ, խանութներ և այլն) անկանխիկ վճարումների համար։ Քարտապանների համար կարող են տրամադրվել զեղչեր, բոնուսներ։
- ArCa Co-branded - վստահելի հաճախորդներին կամ թողարկող բանկի կողմից սահմանված պահանջներին համապատասխանող հաճախորդներին տրվող վարկային քարտ։ ArCa Co-branded-ը նախատեսված է տարբեր տեսակի և նմանատիպ օբյեկտներում անկանխիկ վճարումների համար (Sil Group, Multi Group և այլն)։ Քարտապանների համար կարող են տրամադրվել զեղչեր, բոնուսներ։
Ծանոթագրություններ
[խմբագրել | խմբագրել կոդը]- ↑ 1,0 1,1 «ԱրՔա | Արմենիան Քարդ | www.arca.am». www.arca.am. Վերցված է 2019 թ․ ապրիլի 6-ին.
- ↑ 2,0 2,1 «Հայկական և ռուսական ազգային վճարային համակարգերի` «Արմենիան Քարդ»-ի և «Միր»-ի համատեղելիության պիլոտային նախագիծը նախատեսվում է 2017-ի ամռանը | Finport.am». www.finport.am (անգլերեն). Արխիվացված է օրիգինալից 2019 թ․ ապրիլի 6-ին. Վերցված է 2019 թ․ ապրիլի 6-ին.
- ↑ «Հայաստանում առաջին անգամ անկանխիկ գործարքները գերազանցել են կանխիկին. քարտերով շրջանառությունը I եռամսյակում աճել է 22,9%,–ով». ArmBanks.am. Արխիվացված է օրիգինալից 2020 թ․ մայիսի 29-ին. Վերցված է 2020 թ․ մայիսի 30-ին.