Օսվալդո Ռիոս

Օսվալդո Ռիոս իսպ.՝ Osvaldo Ríos
Ծնվել է	հոկտեմբերի 25, 1960(1960-10-25) (63 տարեկան)
Ծննդավայր	Կարոլինա, Պուերտո-Ռիկո, Պուերտո Ռիկո, ԱՄՆ
Քաղաքացիություն	ԱՄՆ
Մասնագիտություն	դերասան, երգիչ, գործադիր պրոդյուսեր, հասարակական ակտիվիստ, միսիոներ և մոդել
osvaldorios.net

Օսվալդո Ռիոս (իսպ.` Osvaldo Ríos, ամբողջ անունը` Օսվալդո Ռիոս Ալոնսո (Osvaldo Ríos Alonso), ծնվ. հոկտեմբերի 25, 1960, Կարոլինա, Պուերտո-Ռիկո), պուերտոռիկացի դերասան, երաժիշտ և մոդել։

Կենսագրություն

Օսվալդո Ռիոսը իր կարիերան սկսել է որպես կիթառահար և երգիչ։ Հանդես է եկել Պուերտո-Ռիկոյի տարբեր երաժշտական խմբերում։ Ունի հոգեբանական կրթություն և աշխատել է որպես մանկական հոգեբան։ Այնուհետև հանդես է եկել որպես մոդել, որն էլ նրա համար ճանապարհ է բացել դեպի կինոաշխարհ։ 1990 թվականից նկարահանվում է լատինաամերիկյան հեռուստատեսային սերիալներում («Կասանդրա» (1992), «Երեք ճակատագրեր» (1993), «Բլանկոյի այրին» (1996), «Գրկիր ինձ ամուր» (2000) և այլն)։ Հիմնադրել է «Riverside Entertainment Company» պրոդյուսերական կազմակերպությունը, որը զբաղվում է մինի-սերիալների թողարկմամբ։

1992 թվականին ռեժիսոր Գրասիո Դ'Անջելոն Օսվալդո Ռիոսին հրավիրել է նկարահանվելու «Կասանդրա» հեռուստասերիալում, որտեղ նրա խաղընկերուհին վենեսուելացի դերասանուհի Կորայմա Թորեսն էր։ Նշված հեռուստասերիալը ցուցադրվել է աշխարհի 100 երկրներում (նաև՝ Հայաստանում) և թարգմանվել 32 լեզուներով։ «Կասանդրա»-ի հաջողությունը Օսվաալդո Ռիոսին հայտնի դարձրեց, որից հետո նա անընդհատ հրավերներ էր ստանում լատինաամերիկյան խոշորագույն ստուդիաներից։ 1993 թվականին Օսվալդոն նկարահանվեց Վենեսուելայում` «Երեք ճակատագրեր» սերիալում, իսկ 1994 թվականին արդեն նրան կարելի էր տեսնել կոլումբիական «Բլանկոյի այրին» սերիալում, որը մեծ հաջողությամբ ցուցադրվել է Իսպանիայում, Ինդոնեզիայում, Թուրքիայում, Թայվանում և այլ երկրներում։ Հետագա տարիներին Օսվալդո Ռիոսը խաղացել է թատրոնի բեմում` հանդես գալով «Գեղեցկուհին և հրեշը» մյուզիքլում։

1996 թվականին, շուրջ երեք ամիս դերասանն անց է կացրել Պուերտո-Ռիկոյի բանտում, քանի որ նրա նախկին ընկերուհին մեղադրել էր նրան` իր նկատմամբ բռնություն գործադրելու մեջ։ Օսվալդոյին ձերբակալել էին Մայամիում` «Ապստամբական հրեշտակը» հեռուստանովելի նկարահանման հրապարակում։

Օսվալդոյի հաջորդ աշխատանքը «Ռաուզան» սերիալում էր, որը քննադատների կողմից արժանացավ բարձր գնահատականի և տարբեր երկրներում ստացավ բազմաթիվ մրցանակներ։ Զուգահեռաբար նա նկարահանվում էր «Գրկիր ինձ ամուր» մեքսիկական հեռուստասերիալում։ 2000-ական թվականների սկզբին, նրա կողմից հիմնադրված «Riverside Entertainment Company» պրոդյուսերական ընկերության կողմից թողարկվել են «Հրաժեշտից հետո» մինի-սերիալը և «Դորիսի օրերը» ֆիլմը։ Հետագա տարիներին Օսվալդոն հրավիրվել է Իսպանիա և նկարահանվել «Երկու սիրելիների միջև» սերիալում, որտեղ նրա խաղընկերուհին հայտնի երգչուհի Իզաբել Պանտոխան էր։ 2006 թվականին Օսվալդո Ռիոսը Պուերտո-Ռիկոյում նկարահանվել է «Ճանապարհ» ֆիլմում, ինչպես նաև «Որոշում» հեռուստասերիալում, իսկ 2007 թվականին նա ստացավ գլխավոր հերոսի հոր դերը «Զորրո. Սուսեր և վարդ» սերիալում։ 2008 թվականին Նատալիա Ստրեյգնարդի հետ միասին նկարահանվել է «Երդում» հեռուստասերիալում, իսկ 2010 թվականին հեռուստաեթերում հաջողության հասավ «Սիրո հաղթհանդեսը» հեռուստասերիալը, որտեղ նա նկարահանվել էր Վիկտորյա Ռուֆֆոյի հետ։

Անձնական կյանքը

1986 թվականի փետրվարին Օսվալդո Ռիոսը ամուսնացել էր դերասանուհի Սալլի Դիասի հետ, սակայն նույն թվականի դեկտեմբերին նրանք բաժանվել են։ Օսվալդոյի երկրորդ կինը լրագրողուհի Կարմեն Դոմինիկսն էր։ 1990 թվականին ծնվել է նրանց որդին, սակայն շուտով նրանք ամուսնալուծվել են։

2000 թվականին Օսվալդոն ամուսնացել է երրորդ անգամ` դերասանուհի Ջերալդին Ֆերնանդեսի հետ։ 2001 թվականին ծնվել է նրա երկրորդ որդին։ 2004 թվականին փլուզվել է նաև այդ ամուսնությունը։

2006 թվականին լուրեր էին պտտվում Օսվալդոյի և «Որոշում» հեռուստասերիալից նրա խաղընկերուհի Իվելին Խիրոյի սիրավեպի մասին։ 2009 թվականին ծնվել է Օսվալդոյի երրորդ որդին, նրա նոր ընկերուհուց` մարզուհի Կասիանա Ռոսսոյից։ Օսվալդոն սիրավեպ է ունեցել նաև, այն ժամանակ դեռևս սկսնակ կոլումբիացի երգչուհի Շակիրայի հետ։

Մասնակի ֆիլմագրությունը

Թվական	Անվանում	Բնօրինակ անվանում	Կերպար
1990	Ոչ մեկի սերը	Amor de nadie	-
1992	Կասանդրա	Kassandra	Իգնասիո Կոնտրերաս
1993	Երեք ճակատագրեր	Tres destinos	Խուան Կառլոս
1996	Բլանկոյի այրին	La viuda de Blanco	Դիեգո Բլանկո Ալբարասին
1996	Ոչ մեկի երեխաները	Los hijos de nadie	-
2000	Ռաուզան	Rauzán	Սեբաստիան դե Մենդոզա
2000-2001	Գրկիր ինձ ամուր	Abrázame muy fuerte	Դիեգո Էռնանդես
2002-2003	Վայրի կատուն	Gata salvaje	Սիլվանո Սանտանա Կաստրո
2004	Ապստամբական հրեշտակը	Ángel rebelde	Ալեխանդրո Վալդերամա
2005-2008	Որոշում	Decisiones	-
2007	Զորրո. Սուսեր և վարդ	Zorro: La espada y la rosa	Ալեխանդրո դե լա Վեգա
2008	Երդում	El juramento	Սանտյագո դե Լանդերոս
2009	Վայրի սիրտը	Corazón salvaje	Խուան դե Դիոս Սան Ռոման
2010	Սիրո հաղթհանդեսը	Triunfo del amor	Օսվալդո Սանդովալ
2014	Էլզան և Ֆրեդը	Elsa & Fred	բժիշկ
2014	Գլորիա	Gloria	-