Ֆրեյա Ալանը ծնվել է Անգլիայի Օքսֆորդշիր քաղաքում և հաճախել է Օքսֆորդի Հեդինգթոնի դպրոց[2][3]։ Ալանն իր դերասանական կրթությունը շարունակել է Բիքոնսֆիլդի կինոյի և հեռուստատեսության ազգային դպրոցում, Բիքինգեմշիր կոմսությունում, որտեղ դերասանական վարպետության ուսուցման շրջանակներում նկարահանվել է «Կապույտ թռչուն» և «Սուրբ Ծննդյան տոնածառ» կարճամետրաժ ֆիլմերում։ Ալանը ուսումը շարունակել է Բորնմութի արվեստի համալսարանում, որտեղ նա մարմնավորել է Լինդայի դերը «Կատաղի կապիտան» կարճամետրաժ ֆիլմում[4]։
Ալանը խաղացել է երկրորդական դեր BBC-ի 2019 թվականին նկարահանված «Աշխարհների պատերազմը» դրամայի առաջին սերիայում։
Ներկա պահին Ալանը նկարահանվում է Նեթֆլիքս հեռուստաալիքի թողարկած «Կախարդը» սերիալում, Հենրի Քավիլի և Անյա Չալոտրայի հետ միասին։ Նա մարմնավորում է արքայադուստր Ցիրիի կերպարը։ Այն Լորեն Շմիդտի ստեղծած ֆանտաստիկ դրամատիկական սերիալն է, որը նկարահանվել է լեհ գրող Անջեյ Սապկովսկու «Կախարդը» գրքերի շարքի հիման վրա։ Սկզբում նա հրավիրվել է փոքրիկ դերի համար, սակայն հետագայում հրավիրվել էր որպես Ցիրիի դերակատար։ Ալանը սերիալի նկարահանումների մասնակցելու համար 8 ամիս ապրել է ՀունգարիայիԲուդապեշտ քաղաքում[5]։ Ալանը նկարահանվելու է «Կախարդը» հեռուստասերիալի երկրորդ եթերաշրջանում, որի նկարահանումները նախատեսված է 2020 թվականի սկզբին Լոնդոնում և հասանելի է լինելու 2021 թվականին[6]։