Լիգա (միավոր)

Անվան այլ կիրառումների համար տե՛ս՝ Լիգա (այլ կիրառումներ)

Իսպանիայում պահպանված նշացուցիչ սյուն, որը զանազան քաղաքների հեռավորությունը ցուցադրում է լիգաներով։

Լիգան երկարության միավոր էր Արևմտյան Եվրոպայի մի շարք երկրներում և այդ երկրների գաղութներում Լատինական Ամերիկայում։ Բառը լատիներենից է տարածվել տարբեր լեզուների մեջ, բայց բուն ծագումը կելտական է։ Հին հռոմեացիները փոխառել են այն գալլիացիներից, և մեկ լիգան Հին Հռոմում հավասար էր մոտավորապես 2 200 մետրի։

Լիգան երբեք չստացավ պաշտոնական կարգավիճակ որևէ երկրում, և նրա արժեքները տարբեր էին տարբեր երկրներում, երբեմն՝ նույնիսկ մեկ երկրում։ Միայն Ֆրանսիայում լիգան (լյո) համեմատաբար կայուն էր և երբեմն օգտագործվում էր որպես չափի պաշտոնական միավոր։ Այժմ լիգան պաշտոնական գործածությունից դուրս է եկել ամենուրեք։

Լիգան ուներ հետևյալ տարբերակները.

• անգլիական լիգա (league) - 4 800 - 5 600 մետր։
• արգենտինական լիգա (legua) - 5 572 մետր։
• գվատեմալական լիգա (legua) - մոտ 4 000 մետր։
• իսպանական լիգա (legua) - 4 200 մետր։
• հռոմեական լիգա (leuga) - 2 200 մետր։
• մեքսիկական լիգա (legua) - չափը անորոշ։
• պորտուգալական լիգա (légua) - 4 444 մետր։
• ֆրանսիական լիգա (lieue) - 3 250 - 4 680 մետր։