Թագուհի Շահնազարյան

Վիքիպեդիայում կան հոդվածներ Շահնազարյան ազգանունով այլ մարդկանց մասին։

Թագուհի Շահնազարյան
Ծնվել է	հոկտեմբերի 28, 1887(1887-10-28) Կոստանդնուպոլիս
Երկիր	Օսմանյան կայսրություն և  Իտալիա
Մահացել է	հունիսի 10, 1962(1962-06-10) (74 տարեկան) Հռոմ, Իտալիա
Մասնագիտություն	դաշնակահարուհի
Աշխատավայր	Երևանի Կոմիտասի անվան պետական կոնսերվատորիա
Կրթություն	Վենետիկի Բենեդետտո Մարչելլոյի անվան կոնսերվատորիա
Ամուսին	Կոստան Զարյան

Թագուհի Շահնազարյան (Թագուհի Շահնազարյան-Զարյան, հոկտեմբերի 28, 1887(1887-10-28), Կոստանդնուպոլիս - հունիսի 10, 1962(1962-06-10), Հռոմ, Իտալիա), հայ դաշնակահարուհի։

Կենսագրություն

Թագուհի Շահնազարյանը ծնվել է Կոստանդնուպոլսում՝ «Հայրենիք» օրաթերթի հիմնադիր, մտավորական և հանրային գործիչ Հովհաննես Շահնազարի եղբոր ընտանիքում։ Սովորել է Վենետիկի Բենեդետտո Մարչելլո երաժշտանոցում։ Վենետիկ գնալիս «Մոնտենեգրո» նավում ծանոթացել է Կոստան Զարյանի հետ, և նրանք ամուսնացել են 1912 թ.։ Վերադառնալով Կ. Պոլիս՝ դասավանդել է ամերիկյան քոլեջում, հանդես եկել համերգներով։ 1916-1921 թվականներին բնակվել է Իտալիայում։

1921-1922 Կ. Պոլիս վերադառնալուց հետո, 1922 թվականին ընտանիքի հետ հաստատվել է Հայաստանում։ Երևանի պետական կոնսերվատորիայում դասավանդել է դաշնամուր, հարմոնիա և երաժշտության տեսություն։ Հանդես է եկել նաև մենահամերգներով։ 1924 թվականին վերադարձել է Եվրոպա, ունեցել համերգներ։ 1929 թվականին Կ. Զարյանը հեռացել է Թագուհի Զարյանից և ամուսնացել ամերիկացի նկարչուհի Ֆրանսիս Բրուքսի (1900-1963 թվականներ) հետ։ Կյանքի վերջին տարիներին Թագուհի Զարյանը մանրամասն գրի է առել գրողի և իր համատեղ կյանքի հանգամանալից պատմությունը, ինչպես նաև գրողի կյանքի 1930 թվականից հետո ընկած ժամանակի դեպքերն ու իրադարձությունները։ 1936 թվականին հաստատվել է Հռոմում, որտեղ էլ մահացել է 1962 թվականի հունիսի 10-ին։

Ընտանիք

• Ամուսին՝ Կոստան Զարյան
• Որդիներ՝ Վահե, Արմեն Զարյաններ
• Դուստր՝ Նվարդ Զարյան