Միշա Բիչախչյան
| Միշա Բիչախչյան | |
|---|---|
| Ծնվել է | 1916 |
| Ծննդավայր | Ալեքսանդրապոլ, Երևանի նահանգ, Կովկասի փոխարքայություն, Ռուսական կայսրություն |
| Քաղաքացիություն |  Ռուսական կայսրություն և  ԽՍՀՄ |
| Կրթություն | Երևանի պետական համալսարան |
| Մասնագիտություն | մանկավարժ |
| Պարգևներ և մրցանակներ | |
Միշա Կարապետի Բիչախչյան (1916, Ալեքսանդրապոլ, Երևանի նահանգ, Կովկասի փոխարքայություն, Ռուսական կայսրություն), հայ մանկավարժ։ Հայկական ԽՍՀ վաստակավոր ուսուցիչ (1966): Երկրորդ համաշխարհային պատերազմի Արևելյան ռազմաճակատի («Հայրենական մեծ պատերազմ», 1941-1945) մասնակից։
Կենսագրություն[խմբագրել | խմբագրել կոդը]
Միշա Բիչախչյանը ծնվել է 1916 թվականին Լենինականում։ Ավարտել է երկաթուղային ֆաբգործուսը, աշխատել է որպես փականագործ, 1937 թվականին անցել է մանկավարժական աշխատանքի։ Արթիկ քաղաքի № 1 դպրոցում դասավանդել է մաթեմատիկա։ 1938 թվականին ընդունվել է Երևանի պետական համալսարանի ֆիզիկա-մաթեմատիկական ֆակուլտետը[1]։
1941 թվականին, համալսարանը չավարտած, կամավոր մեկնել է ռազմաճակատ։ Ավարտել է Վրացական ԽՍՀ Թելավիի ռազմական ուսումնարանը և լեյտենանտի կոչումով նշանակվել է վաշտի հրամանատարի տեղակալ։ 1942 թվականի օգոստոսին 89-րդ հայկական դիվիզիայի կազմում մասնակցել է Մոզդոկի շրջանում մղված մարտերին։ Այնուհետև դիվիզիան տեղափոխվել է Նալչիկի շրջան։ Մարտեր են մղվել Գիզելի շրջանում, այնուհետև մարտեր են մղել Արդոն բնակավայրի համար։ Դասակին հաջողվել է գրավել Օրջոնիկիձե-Պրոխլադնոյե երկաթգծի մի հատված։ Հարձակման ժամանակ Բիչախչյանը ծանր վիրավորվել է։ Այդ մարտերում ցուցաբերած խիզախության համար պարգևատրվել է Կարմիր աստղի շքանշանով։ Ծառայել է նաև 261-րդ դիվիզիայի 978-րդ գնդում[1]։
1945 թվականի նոյեմբերին զորացրվել է բանակից և բարձրագույն կրթությունը շարունակել Երևանի պետական համալսարանում։ 1948 թվականից Բիչախչյանը ֆիզիկա և աստղագիտություն է դասավանդել Լենինականի № 16 դպրոցում։ 1966 թվականին արժանացել է հանրապետության վաստակավոր ուսուցչի կոչման։ Պարգևատրվել է «Աշխատանքի վետերան» և այլ մեդալներով[1]։
Մահ[խմբագրել | խմբագրել կոդը]
Միշա Բիչախչյանը մահացել է 1991 թվականին, թաղված է Գյումրի քաղաքի գերեզմանատանը։
Պարգևներ[խմբագրել | խմբագրել կոդը]
- Հայկական ԽՍՀ վաստակավոր ուսուցիչ (1966)
- Կարմիր աստղի շքանշան
- «Աշխատանքի վետերան» մեդալ