Լևոն Թեմուրյան
- Վիքիպեդիայում կան հոդվածներ Թեմուրյան ազգանունով այլ մարդկանց մասին։
Լևոն Թեմուրյան | |
---|---|
Անձնական տեղեկություն | |
Սեռ՝ | արական |
Մասնագիտացում՝ | բռնցքամարտիկ |
Երկիր՝ | ԽՍՀՄ |
Ծննդյան ամսաթիվ՝ | հունվարի 12, 1908 |
Ծննդավայր՝ | Բաքու, Ռուսական կայսրություն |
Մահվան ամսաթիվ՝ | ապրիլի 12, 1942 (34 տարեկան) |
Մահվան վայր՝ | Կիև, Ուկրաինական ԽՍՀ, ԽՍՀՄ |
Լևոն Գրիգորի Թեմուրյան (հունվարի 12, 1908, Բաքու, Ռուսական կայսրություն - ապրիլի 12, 1942, Կիև, Ուկրաինական ԽՍՀ, ԽՍՀՄ), հայ բռնցքամարտիկ և մարզիչ, ԽՍՀՄ սպորտի վաստակավոր վարպետ (1937)։ 1930-ական թվականներին հանդես է եկել ԽՍՀՄ հավաքականի կազմում։ 1937 թվականին դարձել է բելգիական Անտվերպեն քաղաքում անցկացված բանվորական ամառային օլիմպիական խաղերի չեմպիոն։ Պարգևատրվել է «Պատվո նշան» շքանշանով։
Կենսագրություն[խմբագրել | խմբագրել կոդը]
Դպրոցն ավարտելուց հետո Լևոնն աշխատել է որպես փականագործ։ Բռնցքամարտով սկսել է ակտիվորեն զբաղվել քսան տարեկանից։ Հաղթանակի հսկայական տենչի, աննկուն կամքի, հարձակողական սուր մարտավարության համար ստացել է «Տանկ» մականունը։ 1932 թվականին Բաքվից տեղափոխվել է Մոսկվա, ընդունվել մարզչական բարձրագույն դպրոց, դարձել բռնցքամարտի խորհրդային դպրոցի հիմնադիրներից մեկի՝ Արկադի Խառլամպիևի սանը[1]։ Ավարտելուց հետո աշխատանքի է անցել ֆիզիկական կուլտուրայի, սպորտի և զբոսաշրջության պետական կենտրոնական ինստիտուտի բռնցքամարտի ամբիոնում՝ դասավանդելուն զուգընթաց շարունակելով մրցելույթները ռինգում։
Մարզական առաջին մեծ նվաճումը Լևոնը ձեռք է բերել 1935 թվականին, երբ թեթևագույն քաշային կատեգորիայում հռչակվել է Խորհրդային Միության չեմպիոն (հետագայում չորս տարի շարունակ պահպանել է այդ տիտղոսը՝ ԽՍՀՄ-ում չունենալով իրեն հավասար բռնցքամարտիկ)։ Իր վարած 61 մարտերից 58-ում հաղթանակներ է տարել, արժանացել ԽՍՀՄ սպորտի վաստակավոր վարպետի կոչման, ճանաչվել «ԽՍՀՄ ականավոր բռնցքամարտիկ», պարգևատրվել «Պատվո նշան» շքանշանով։
Երբ սկսվել է Հայրենական մեծ պատերազմը, Լևոն Թեմուրյանը կամավոր մեկնել է ռազմաճակատ, դարձել հրաձգային վաշտի քաղղեկ։ Զոհվել է 1942 թվականին։ Ըստ մի վարկածի՝ ընկել է իր վաշտը գրոհի տանելիս, ըստ մեկ այլ վարկածի՝ ծանր վիրավորվել է, գերի ընկել և որոշ ժամանակ անց գերմանական ճամբարում կախաղան է հանվել ապստամբություն բարձրացնելու նպատակով մարտական ընդհատակյա խումբ կազմավորելու և այդ խմբի գաղտնի գործողություններին մասնակից լինելու պատճառով[2]։
Ռուսաստանի Դաշնությունում 1952 թվականից ի վեր ամեն տարի անցկացվում է Լևոն Թեմուրյանի հիշատակին նվիրված բռնցքամարտի մրցաշար (1952)[3]։
Ծանոթագրություններ[խմբագրել | խմբագրել կոդը]
- ↑ Эдуард Хруцкий Этот неистовый русский. — Физкультура и спорт, 1970. — 128 с.
- ↑ «Темурян Леван Григорьевич (1908-1942)». Энциклопедия бокса. Վերցված է 2013 թ․ ապրիլի 7-ին.
- ↑ Ով ով է. Հայեր. Կենսագրական հանրագիտարան, հատոր առաջին, Երևան, 2005.
|