Իսահակ Իսահակյան (բժիշկ)

Անվան այլ կիրառումների համար տե՛ս՝ Իսահակ Իսահակյան (այլ կիրառումներ)

Վիքիպեդիայում կան հոդվածներ Իսահակյան ազգանունով այլ մարդկանց մասին։

Իսահակ Իսահակյան
Ծնվել է	սեպտեմբերի 10 (23), 1904
Ծննդավայր	Շենաթաղ, Հայաստան
Մահացել է	մարտի 11, 1985(1985-03-11) (80 տարեկան)
Մահվան վայր	Երևան, Հայկական ԽՍՀ, ԽՍՀՄ
Քաղաքացիություն	Ռուսական կայսրություն և  ԽՍՀՄ
Կրթություն	Մոսկվայի պետական համալսարան (1928)
Մասնագիտություն	վնասվածքաբան և վիրաբույժ օրթոպեդ
Գիտական աստիճան	բժշկական գիտությունների դոկտոր (1953) և պրոֆեսոր (1958)
Աշխատավայր	Երևանի Մխիթար Հերացու անվան Պետական Բժշկական Համալսարան
Պարգևներ	և Ն .Ի. Պիրոգովի անվան ոսկե մեծ մեդալ

Իսահակ Գրիգորի Իսահակյան (սեպտեմբերի 10 (23), 1904, Շենաթաղ, Հայաստան - մարտի 11, 1985(1985-03-11), Երևան, Հայկական ԽՍՀ, ԽՍՀՄ), հայ վնասվածքաբան-օրթոպեդ, բժշկական գիտությունների դոկտոր (1953), պրոֆեսոր (1958)։

Կենսագրություն

Իսահակ Իսահակյանը ծնվել է Սյունիքի մարզի Շենաթաղ գյուղում։ Պատանի հասակում հոր հետ տեղափոխվել է Բաքու, որտեղ ստացել է նախնական կրթություն, 1923 թվականին ընդունվել է տեղի համալսարանի բժշկական ֆակուլտետը։ 1928 թվականին ավարտել է Մոսկվայի պետական համալսարանի բժշկական ֆակուլտետը։ 1931-1938 թվականներին և 1967-1976 թվականներին աշխատել է ԵԲԻ օպերատիվ վիրաբուժության և տեղագրական անատոմիայի ամբիոնում։ 1938 թվականին զորակոչվել է բանակ և ծառայել բժշկական ծառայության տարբեր ստորաբաժանումներում։

1946 թվականից եղել է Ք. Հ. Պետրոսյանի հետ կազմակերպած Երևանի Օրթոպեդիայի և վերականգնողական վիրաբուժության ԳՀԻ մեծահասակների օրթոպեդիայի բաժանմունքի վարիչ, 1957-1967 թվականներին՝ Երևանի Օրթոպեդիայի և վերականգնողական վիրաբուժության ԳՀԻ մեծահասակների օրթոպեդիայի բաժանմունքի տնօրեն։ 1967-1985 թվականներին աշխատել է ԵԲԻ վնասվածքաբանության, օրթոպեդիայի և ռազմադաշտային վիրաբուժության ամբիոնում, 1957-1967 թվականներին՝ ՀԽՍՀ օրթոպեդների և վնասվածքաբանների ընկերության նախագահ, 1958-1967 թվականներին՝ ՀԽՍՀ առողջապահության նախարարաության գլխավոր վնասվածքաբան-օրթոպեդ։

Ստեղծագործական ուղի

Իսահակյանը 1946 թվականին պաշտպանել է «Ձեռքի և մատների հրազենային վնասվածքների բուժումը» թեմայով թեկնածուական ատենախոսությունը։ Հետագայում, շարունակելով իր գիտահետազոտական աշխատանքները, նա ուշադրությունը կենտրոնացրել է սրունքի ծայրատման հարցերի վրա, մշակել սրունքի ծայրատման և կրկնակի ծայրատման յուրատեսակ ու ուշագրավ եղանակ, որի շնորհիվ կանխվել է մաշկային սպիի սերտաճումն ստորադիր հյուսվածքների հետ, դրանով ապահովվել ծայրատի սպիի շարժունակությունը՝ միաժամանակ ստեղծելով ֆունկցիայի ու հենման տեսակետից պիտանի ծայրատ։ Գիտնականն առաջարկել է նյարդի մշակման նոր եղանակ։ Ամփոփելով իր կատարած աշխատանքները՝ 1952 թվականին պաշտպանել է «Սրունքի ֆունկցիոնալ-պլաստիկ ծայրատում և կրկնածայրատում» թեմայով դոկտորական ատենախոսությունը։

Աշխատանքները վերաբերում են պատերազմի հաշմանդամների բուժման և սոցիալական վերականգման, փակեղապատվաստումային ծայրատումների, մանկական տրավմատիզմի և կանխարգելման, կմախքի համակարգային հիվանդությունների ուսումնասիրություններին։

15 տարի անընդմեջ եղել է Վիրաբույժների ընկերության վարչության, Վնասվածքաբանների և օրթոպեդների համամիութենական գիտական ընկերության վարչության, ինչպես նաև «Օրթոպեդիա, վնասվածքաբանություն և պրոթեզավորում» ամսագրի խմբագրական խորհրդի անդամ։

Հեղինակ է 3 մենագրությունների, 78 գիտական աշխատությունների՝

• «Մանկական վնասվածքները և դրանց նախականխումը»
• «Տրավմատոլոգիայի և օրթոպեդիայի համառոտ ձեռնարկ»

Նա երկու տասնյակ ատենախոսական թեզերի գիտական ղեկավար է եղել, մասնակցել է օրթոպեդիայի վերաբերյալ միջազգային կոնգրեսների (ԱՄՆ, Հունգարիա)։

Անդամակցություն

• Վիրաբուժական օրթոպեդիայի և վնասվածքաբանության միջազգային ընկերության անդամ (1961-1967)։

Պարգևներ

• Պատվո շքանշան
• Կարմիր աստղի շքանշան
• Ն. Ի. Պիրոգովի անվան մեդալ

Երկեր

• Մանկական տրավմատիզմ, Երևան, 1950։
• Транспортный травматизм. Ер., 1953.
• Фасциально-пластическая ампутация и реампутация голени. Ер., 1959.
• Մանկական տրավմատիզմը և նրա կանխումը։ Իսահակյան Իսահակ Գրիգորի, ՀՍՍՌ առողջապահության մինիստրություն, Երևան, Հայպետհրատ, 1962։
• Երեխաների ազդրի բնածին հոդախախտի վաղ դիագնոստիկան և բուժումը։ Մեթոդ. ցուցում։ Պետրոսյան Ռ. Խ, Իսահակյան Իսահակ Գրիգորի, ՀՍՍՌ Առողջապահության մինիստրության Երևանի Խ. Ա. Պետրոսյանի անվան տրավմատոլոգիայի և օրթոպեդիայի գիտա-հետազոտական ինստիտուտ, Երևան, «Հայաստան», 1965։
• Տրավմատոլոգիայի ձեռնարկ։ Իսահակյան Իսահակ Գրիգորի, Առողջապահության մինիստրություն, Երևան, ՀԽՍՀ ԳԱ հրատարակչություն, 1967։
• Բնածին ծռաթաթությունը և նրա բուժումը։ Մեթոդական ցուցումներ միջին բուժաշխատողների և ծնողների համար։ Բեկզադյան Արամայիս Հակոբի, Գրիգորյան Լևոն Միքայելի, Իսահակյան Իսահակ Գրիգորի, ՀՍՍՌ Առողջապահության մինիստրություն, Հանրապետական սանլուստուն, Երևան, «Հայաստան», 1968։
• Տրավմատոլոգիայի և օրթոպեդիայի համառոտ ձեռնարկ։ Իսահակյան Իսահակ Գրիգորի, Երևան, «Հայաստան», 1973։
• Տրավմատոլոգիայի և օրթոպեդիայի համառոտ ձեռնարկ։ Իսահակյան Իսահակ Գրիգորի, Երևան, «Հայաստան», 1984։
• Краткий справочник ортопедии и травматологии. Ер., 1984.

Ծանոթագրություններ

Վիքիդարանն ունի նյութեր, որոնք վերաբերում են «Իսահակ Իսահակյան (բժիշկ)» հոդվածին։