Առնոլդ Նիկողոսյան

Առնոլդ Նիկողոսյան
Ծնվել է	դեկտեմբերի 10, 1936(1936-12-10) (87 տարեկան) Դնեպր, Ուկրաինական ԽՍՀ, ԽՍՀՄ
Բնակության վայր(եր)	ԱՄՆ
Մասնագիտություն	Տիեզերական բժշկություն, կենսաբանություն
Ալմա մատեր	Թեհրանի և Օհայոյի պետական համալսարաններ
Գիտական աստիճան	բժշկական գիտությունների դոկտոր (1972)
Ինչով է հայտնի	Հիմնական աշխատությունները վերաբերում են պրոֆիլակտիկ և ավիացիոն-տիեզերական բժշկագիտությանը, հեռաբժշկությանը, բժշկական ինֆորմատիկային, արտակարգ միջավայրի ֆիզիոլոգիային, միջազգային առողջապահության, գիտական և առողջապահական քաղաքականության հարցերին

Առնոլդ Նիկողոսյան (դեկտեմբերի 10, 1936(1936-12-10), Դնեպր, Ուկրաինական ԽՍՀ, ԽՍՀՄ), տիեզերական բժշկության բնագավառի մասնագետ։ Բժշկական գիտությունների դոկտոր (1972), ՀՀ ԳԱԱ արտասահմանյան անդամ (1998)։

Կենսագրություն

1956 թվականին ավարտել է Թեհրանի իրանա-ֆրանսիական լիցեյը, 1964 թվականին՝ Թեհրանի և 1972 թվականին Օհայոյի պետական (Կոլումբուս, ԱՄՆ) համալսարանները։ ՀՀ ԳԱԱ արտասահմանյան անդամ է 1998 թվականից։ Տիեզերագնացության միջազգային ակադեմիայի (1978), ամերիկյան և միջազգային գիտական ու բժշկական բազմաթիվ կազմակերպությունների անդամ է։ 1989 թվականին կազմակերպել է բժշկական հեռուստակամուրջ Երևանի և Ուֆայի միջև։ 1972 թվականից հաստատվել է ԱՄՆ-ում։

Գործունեություն

1957-1970 թվականներին աշխատել է Թեհրանի համալսարանում, 1970-1972 թվականներին` Օհայոյի, 1972-1974 թվականներին` Նյու Յորքի, 1974-1975 թվականներին` Տեխասի համալսարաններում, Ջոնսոնի անվան տիեզերական կենտրոնում եղել է «Սոյուզ-Ապոլոն» թռիչքի բժիշկը, ապա՝ տիեզերական հետազոտությունների ամերիկյան ազգային կենտրոնի բնական և միկրոգրավիտացիոն գիտնականների և տիեզերական թռիչքների ապահովման բաժինների ղեկավար, միաժամանակ՝ կենտրոնի գլխավոր տեղակալ։ Եղել է «Ավիացիա, տիեզերք և էկոլոգիական բժշկություն» հանդեսի խմբագիրը։ 1972–2003 թվականներին վարել է տարբեր պաշտոններ ՆԱՍԱ-ի համակարգում, 2000–2001 թվականներին եղել է Տիեզերագնացների և սպասարկող անձնակազմի առողջության և անվտանգության ապահովման բաժանմունքի տնօրեն, 2001–2003 թվականներին` NASA-ի տնօրենի՝ առողջության գծով ավագ խորհրդական, 1994–1996 թվականներին` Ամերիկյան տիեզերագնացության ընկերության և մի շարք այլ կազմակերպությունների նախագահ։ 2003 թվականից Ջորջ Մեյսոն համալսարանի (Վիրջինիա) ականավոր հետազոտող պրոֆեսոր է։

Պարգևներ

• NASA-ի Գերազանց ծառայության մեդալ (1993, 2001)
• Ռուսաստանի տիեզերագնացության ֆեդերացիայի Յու. Գագարինի մեդալ (1987)
• Ս. Կորոլյովի անվան ոսկե մեդալ (1993)