Անատոլ Ֆրանսի դիմանկարը (նկար)

Անատոլ Ֆրանսի դիմանկարը
տեսակ	դիմապատկեր և փորագրություն
նկարիչ	Էդգար Շահին
տարի	1925 թվական
բարձրություն	18,5 սանտիմետր և 23 սանտիմետր
լայնություն	13,5 սանտիմետր և 15,2 սանտիմետր
ժանր	դիմապատկեր
նյութ	չոր ասեղ
գտնվում է	Հայաստանի պետական պատկերասրահ
հավաքածու	Հայաստանի ազգային պատկերասրահ
պատկերված են Անատոլ Ֆրանս
Ծանոթագրություններ

Անատոլ Ֆրանսի դիմանկարը, Էդգար Շահինի հոգեբանական դիմանկարներից է, որը պատկանում է մեծ մարդասեր Անատոլ Ֆրանսին։

Մտահղացում

Գրողի հետ ունեցած մոտ փոխհարաբերությունը նպաստել էր, որ Շահինը լավ ճանաչի նրան խոր ծերության տարիներին։ Նա նրան լավ գիտեր որպես առաջադիմական գրողի, որն իր վեպերով մերկացնում էր կապիտալիստական կեղծ դեմոկրատիան, նրա քաղաքական անսկզբունքայնությունը, կղերականության հետադիմական գործունեությունը։ Շահինին հայտնի էին նաև Ա.Ֆրանսի մարդասիրական նկրտումները հայկական եղեռնի կապակցությամբ, երբ նա ի լուր աշխարհի հանդես էր եկել` դատապարտելով թուրքական իշխանությունների բարբարոսությունները։

Նկարագրություն

Ծերունի գրողի հայացքը խորն է, իմաստուն, արտահայտությունը` բարի, մարդկային, ազնիվ բարեմասնություններով օժտված։ Սակայն ծերունական խաղաղ արտահայտության (հավանաբար չիրականացված մտահղացումների հետ կապված) ետևում կա ինչ-որ մտահոգություն։

Անատոլ Ֆրանսը պատկերված է դիմացից։ Նա կրում է ցածր գդակ։ Նրա լայն ճակատը և մինչև կուրծքը իջած սպիտակ մորուքը պատկառելի տեսք են տալիս նրա դեմքին։

Նյութ

Անատոլ Ֆրանսի դիմանկարը կատարված է չոր ասեղի տեխնիկայով, ինչպես Պոլ Վերլենինը, բայց դրանց մեջ տարբերություն կա, որը պայմանավորված է յուրաքանչյուրի ֆիզիկական տվյալներով։ Վերլենը գրաֆիկական է, Ֆրանսը` փափուկ գեղանկարչական։

Արձագանքներ

Հայտնի է, որ Անատոլ Ֆրանսը իր դիմանկարից գոհ է մնացել և մի օրինակի վրա հետևյալ մակագրությունն է արել. «Առ Էդգար Շահին` շնորհակալ ըլլալով իրեն, որ զիս այսքան շնորհքով ու բարյացակամությամբ պատկերացուց և հիացումս հայտնելով իր այսքան խորունկ տաղանդին համար»։

Մալուլի հաղորդումով` Ֆրանսի դիմանկարը գնահատման է արժանացել Ֆրանսիայում, Անգլիայում, Գերմանիայում, Ամերիկայում Ռուսաստանում` հրատարակվելով գծեր։

«Հայերը արվեստի մեջ» հոդվածում Ս.Գ. Կարա-Մուրզան Շահինի մասին գրել է. «Զարմանալի է պորտրետային նմանությունը որսալու Շահինի կարողությունը։ Նկարի կատարելությամբ Շահինը կարողանում է բացահայտել մոդելի ներքին, հոգեբանական դեմքը։ Անատոլ Ֆրանսի պորտրեն, որ կատարել է Շահինը, ֆրանսիացիների կողմից իրավամբ համարվում է պորտրետային արվեստի գլուխգործոց»։