Այբ դպրոց

Վիքիպեդիայից՝ ազատ հանրագիտարանից
(Վերահղված է Այբ ավագ դպրոցից)
Այբ դպրոց
Ayb High School.jpg
Երկիր Հայաստան
Կարգախոս Իմա և արա (գրաբար՝ Իմացիր և արարիր)
Հիմնադրված 2011
Տնօրեն Արամ Փախչանյան
Աշակերտներ 195
Հասցե Թբիլիսյան խճ. 11/11, Երևան, Հայաստան
Կայք www.aybschool.am
Դասարաններ 1 – 12

Այբ դպրոց, Երևանում գործող մասնավոր դպրոց, որտեղ դասավանդումը իրականցվում է սեփական ուսումնական ծրագրի և մեթոդների հիմման վրա։ Ստեղծվել է Այբ կրթական հիմնադրամի կողմից։ Ներառում է տարրական, միջին և ավագ դպրոց։ Առաջինը, 2011 թ․-ին սկսեց գործել ավագ դպրոցը։[1]

2013 թվականին Դիլիջանում, «Այբ» կրթական հիմնադրամի և Հայաստանի Կենտրոնական բանկի համագործակցության շնորհիվ ստեղծվել է «Այբ» դպրոցների ընտանիքին պատկանող Դիլիջանի կենտրոնական դպրոցը։[2]

Պատմություն[խմբագրել | խմբագրել կոդը]

2010 թվականի հունվարին Հայաստանի կառավարությունը տարվա իր առաջին նիստին որոշում կայացրեց Այբ կրթական հիմնադրամին հատկացնել Երևանի Արաբկիր վարչական շրջանում Թբիլիսյան խճուղուն հարող 6,5 հա հողատարածք՝ «Այբ կրթական հանգույց» («Այբ» դպրոց) ծրագրի իրականացման համար։ 2011 թվականին բացվեց «Այբ կրթական հանգույցի» առաջին բաղադրիչը՝ «Այբ» ավագ դպրոցը, որը նախագծել է «Ստորակետ» ճարտարապետական արվեստանոցը։[1]

Ուսումնական ծրագիր[խմբագրել | խմբագրել կոդը]

«Այբ» դպրոցն ունի սեփական ուսումնական ծրագիրը՝ հարմարեցված ՀՀ ԿԳՆ կողմից հաստատված ավագ դպրոցների ուսումնական ծրագրին։ «Այբ» դպրոցում գնահատումը տեղի է ունենում հիմնականում հետադարձ կապի միջոցով, երբեմն՝ 100 բալանոց համակարգով։ Դպրոցում գործում է նաև առցանց մատյան՝ ազատ Մուդլ (անգլ.՝ Moodle) համակարգի շնորհիվ։

Դպրոցի յուրաքանչյուր աշակերտ ունի իր անհատական ուսումնական ծրագիրը, որը կազմված է հիմնական և ընտրովի առարկաներից։

Արտադասարանական միջոցառումներ[խմբագրել | խմբագրել կոդը]

«Անկեղծության պահեր» ծրագրի շրջանակներում աշակերտները հնարավորություն են ունենում հարցեր ուղղել դպրոցի հյուրերին ու ստանալ անկեղծ պատասխաններ։[3] Մեկ այլ նախագծի շրջանակներում, տարբեր ոլորտների մասնագետ հանդիսացող հրավիրյալ դասախոսները դպրոցական ծրագրից դուրս դասախոսություններ ու զրույցներ են անցկացնում աշակերտների հետ։[4] Իրականացվում է նաև այլ դպրոցների և կազմակերպությունների հետ աշակերտների կարճատև փոխանակման և փոխադարձ այցերի «Այբապատում» ծրագիր։ [5]

Դպրոցն աշակերտների համար կազմակերպում է նաև մի շարք միջոցառումներ՝ ուխտագնացություններ, աշխարհայացքային զրույցներ ու քննարկումներ, էկոլոգիայի և բնապահպանության միջոցառումներ և այլն։ Դպրոցում կարևորվում է սպորտը և արվեստը։ Գործում են տարբեր խմբակներ։ Աշակերտները ստեղծում են տարբեր ուղղվածության թիմեր՝ դպրոցի առօրյան լուսաբանող մեդիա թիմ, հյուրերին դպրոցի հետ ծանոթացնող թիմ, տեխնիկակական աջակցության թիմ։[6] «Այբ» ավագ դպրոցը ունի նաև իր աշակերտական խորհուրդը։[7]

Տես նաև[խմբագրել | խմբագրել կոդը]

Ծանոթագրություններ[խմբագրել | խմբագրել կոդը]

  1. 1,0 1,1 Aybschool.am - «Այբ»-ի պատմությունը
  2. «Դիլիջանի կենտրոնական դպրոց»։ Վերցված է 2016 թ․ հունիսի 14 
  3. «Անկեղծության պահեր»։ Այբ Դպրոց։ Վերցված է 2016 թ․ հունիսի 14 
  4. «Միջօրեի դասախոսություններ»։ Այբ Դպրոց։ Վերցված է 2016 թ․ հունիսի 14 
  5. «Այբապատում նախագիծ»։ Այբ Դպրոց։ 2012 թ․ ապրիլի 8։ Վերցված է 2016 թ․ հունիսի 14 
  6. - «Այբ»-ի աշակերտները
  7. - «Այբ»-ի աշակերտական խորհուրդը

Արտաքին հղումներ[խմբագրել | խմբագրել կոդը]