Խորեն Մարտիրոսյան
- Վիքիպեդիայում կան հոդվածներ Մարտիրոսյան ազգանունով այլ մարդկանց մասին։
Խորեն Մարտիրոսյան | |
---|---|
Ծնվել է | 1914 |
Ծննդավայր | Բաքու, Ռուսական կայսրություն |
Մահացել է | անհայտ |
Քաղաքացիություն | Ռուսական կայսրություն և ԽՍՀՄ |
Կրթություն | Հայկական պետական մանկավարժական համալսարան (1941) |
Մասնագիտություն | մանկավարժ |
Պարգևներ և մրցանակներ |
Խորեն Բախշիի Մարտիրոսյան (1914, Բաքու, Ռուսական կայսրություն - անհայտ), հայ մանկավարժ։ ՀԽՍՀ վաստակավոր մանկավարժ (1972): Հայրենական մեծ պատերազմի մասնակից։
Կենսագրություն[խմբագրել | խմբագրել կոդը]
Խորեն Մարտիրոսյանը ծնվել է 1914 թվականին Բաքվում, նավթագործ բանվորի ընտանիքում։ 1919 թվականին ընտանիքով տեղափոխվել են Գորիսի շրջանի Շինուհայր գյուղը։ 1938 թվականին ավարտել է Գորիսի գյուղատնտեսական տեխնիկումը, աշխատանքի անցել Շինուհայրի դպրոցում, դասավանդել է պատմություն։ 1938-1941 թվականներին սովորել է Երևանի հեռակա մանկավարժական ինստիտուտի պատմության ֆակուլտետում[1]։
Հայրենական պատերազմի տարիներին Մարտիրոսյանը ծառայել է 224-րդ դիվիզիայում, որպես հրետանային մարտկոցի քաղղեկի տեղակալ։ 1941 թվականի դեկտեմբերին մասնակցել է Ղրիմի պաշտպանության մարտերին։ 1942 թվականի հոկտեմբերին Ստալինգրադի մատույցներում Մարտիրոսյանի դիվիզիան առաջադրանք ստանալով պաշտպանել է «Բարիկադ» գործարանը, իսկ մեր զորամասերն ավարտին են հասցրել գերմանաֆաշիստական զորքերի շրջափակումն ու ջախջախումը։ Այնուհետև Մարտիրոսյանը մասնակցել է Կուրսկ-Օրյոլի աղեղի անցման, Կարպատների ազատագրման մարտերին, որպես դասակի հրամանատար։ Կուրսկ-Օրյոլի ուղղությամբ մեր զորքերի տարած փայլուն հաղթանակի համար Մարտիրոսյանը պարգևատրվել է «Խիզախության համար» մեդալով։ Դնեստրի անցման մարտական գործողությունների համար արժանացել է Կարմիր աստղի շքանշանի, Լվովի և Յասիի ուղղությամբ մղված մարտերում (1944) ստացել է Փառքի երրորդ աստիճանի, իսկ Կարպատներում՝ Հայրենական պատերազմի 2-րդ աստիճանի շքանշաններ[1]։
1945 թվականին Մարտիրոսյանը վերադարձել է հայրենի Շինուհայր և երկար տարիներ գլխավորել տեղի միջնակարգ դպրոցի մանկավարժական կոլեկտիվի աշխատանքը, դասավանդել պատմություն և աշխարհագրություն։ 1972 թվականին նրան շնորհվել է հանրապետության վաստակավոր ուսուցչի պատվավոր կոչում[1]։
Պարգևներ[խմբագրել | խմբագրել կոդը]
- ՀԽՍՀ վաստակավոր մանկավարժ (1972)
- «Խիզախության համար» մեդալ
- Կարմիր աստղի շքանշան
- Փառքի երրորդ աստիճանի շքանշան
- Հայրենական պատերազմի 2-րդ աստիճանի շքանշան
Ծանոթագրություններ[խմբագրել | խմբագրել կոդը]
- 1914 ծնունդներ
- Բաքու քաղաքում ծնվածներ
- Մահվան ամսաթիվը չորոշված անձինք
- ՀՊՄՀ շրջանավարտներ
- Հայրենական պատերազմի 2-րդ աստիճանի շքանշանակիրներ
- Կարմիր աստղի շքանշանի ասպետներ
- «Խիզախության համար» մեդալով պարգևատրվածներ (ԽՍՀՄ)
- Անձինք այբբենական կարգով
- ՀԽՍՀ վաստակավոր մանկավարժներ
- Հայ մանկավարժներ
- Ստալինգրադի ճակատամարտի հայ մասնակիցներ