Վարդկակաչ երկծաղկավոր (լատին․՝ Tulipa biflira), շուշանազգիների ընտանիքին պատկանող բազմամյա սոխուկավոր բույս, որն աճում է մշտապես արևի լույսով առատորեն լուսավորված վայրերում։ Լուսասեր է և պահանջկոտ խոնավության նկատմամբ։
Ծաղկապատի թերթիկները հասնում են մինչև 3 սմ երկարության, սպիտակ են, հիմքում՝ դեղին։ Առէջների թերթիկները դեղին են։ Սոխուկները ունեն 1,5-2 սմ տրամագիծ։ Ցողունը հասնում է 10-20 սմ բարձրության, կրում է 1-2 ծաղիկ։
Ծաղկում է ապրիլ֊մայիս ամիսներին (դա կախված է ձմռան տևողությունից և ծովի մակերևույթից աճման վայրի ունեցած բացարձակ բարձրությունից)։ Ծաղկումից 25-30 օր հետո տերևները չորանում են և վեգետացիոն շրջանը ավարտվում է, սոխուկները մտնում են հարաբերական հանգստի շրջան։ Երբ տերևների բացման ժամկետը համընկնում է արևադարձային շրջանի հետ, ապա ծաղկակիր ցուղունը երկար է լինում, իսկ ծաղիկը՝ խոշոր։
Գերադասում է սննդանյութերով հարուստ, ջրաթափանց և օդաթափանց, փուխր ավազակավային հողերը։ Տարածված են Երանոսում, Վեդիում, Դաշտաքարում, Արարատում, Խոր Վիրապում և Ուրցի լեռնաշղթայում։
Երկծաղկավոր վարդկակաչը մշակության մեջ մտցնելը մեծ նշանակություն ունի ոչ միայն ծաղկային բույսերի տեսակաշարը հարստացնելու, այլև բնապահպանական տեսակետից, քանի որ այս տեսակի տարածման սահմանները աստիճանաբար կրճատվում են[1]։
