Էքսուբունտու

Էքսուբունտու
Տեսակ	Լինուքսի տեղաբաշխում և ազատ օպերացիոն համակարգ
Ստեղծող	Կանոնիկալ և Ուբունտու Հիմնադրամ
Ընտանիք	ԳՆՈւ/Լինուքս
Հիմք են ծառայել	Ուբունտու
Ծրագրային կոդ	ազատ ծրագրաշար
Առաջին թողարկում	հունիսի 23, 2006
Վերջին տարբերակ	12.10 18 հոկտեմբերի 2012 թ․
Առկա է	բազմալեզու
Միջուկի տեսակ	մոնոլիտային
Ինտերֆեյս	XFCE
Արտոնագիր	ԳՊԼ և այլ
Անվանված է	Ուբունտու և Xfce
Կայք	xubuntu.org(անգլ.)
ելակոդ	ծրագրաշար
	Xubuntu Վիքիպահեստում

Էքսուբունտու (Xubuntu), Ուբունտուից ածանցված օպերացիոն համակարգ, որն հիմնված է XFCE աշխատանքային միջավայրի վրա։ Էքսուբունտուն ավելի քիչ ռեսուրսներ է օգտագործում և ավելի քիչ ստանդարտ ծրագրեր է պարունակում, քան Ուբունտուն։ Եթե վերջինս, օրինակ, պարունակում է ամբողջական օֆիսային փաթեթ (ԼիբրեՕֆիս), ապա Էքսուբունտուն ունի միայն ԱբիՎորդ տեքստային խմբագրիչը, իսկ այլ օֆիսային ծրագրեր կարող են բեռնվել Ուբունտու ծրագրաշարերի կենտրոնից։ Էքսուբունտուի ստանդարտ աշխատանքայի միջավայրը՝ XFCE-ն համակարգչից ավելի քիչ ռեսուրսներ է պահանջում, քան ԳՆՕՄ-ը, որն Ուբունտուի ստանդարտ աշխատանքային միջավայրն էր մինչև 10.10 տարբերակը, կամ Յունիթին, որը 11.04 տարբերակից Ուբունտուի լռելյայն աշխատանքային միջավայրն է։

Քիչ ռեսուրսների պահանջի շնորհիվ Էքսուբունտուն համարվում է «թեթև-արագաշարժ» օպերացիոն համակարգ։ Այն զգալիորեն ավելի արագ է աշխատում, քան Ուբունտուն։ Հատկապես փոքր աշխատանքային հիշողություն ունեցող կամ հին համակարգիչների համար այն ամենահարմար օպերացիոն համակարգերից է համարվում։

Պատմական ակնարկ

Առաջին պաշտոնական թողարկումը կայացել է 2006 թ․ հունիսի 1-ին՝ որպես Ուբունտու 6.06-ի մաս։ Այս տարբերակն օգտագործում էր Լինուքս կերնել 2.6.15.7-ը և XFCE 4.4 բետա 1-ը։ Մինչև այսօր օպերացիոն համակարգը վերաթողարկվում է տարին երկու անգամ։

Վերջին՝ Էքսուբունտու 12.10 տարբերակը թողարկվել է 2012 թ․ հոկտեմբերի 18-ին։