Էյդեն Չեմբերս

Էյդեն Չեմբերս անգլ.՝ Aidan Chambers
Ծնվել է	դեկտեմբերի 27, 1934(1934-12-27) (89 տարեկան)
Ծննդավայր	Chester-le-Street, Դարեմ քաունթի, Դարհեմ, Անգլիա, Միացյալ Թագավորություն
Մասնագիտություն	դրամատուրգ, գրող և մանկագիր
Լեզու	անգլերեն
Քաղաքացիություն	Միացյալ Թագավորություն
Ժանրեր	մանկական գրականություն
Անդամակցություն	Թագավորական գրական ընկերություն
Պարգևներ	Արծաթե ստիլոս Քարնեգիի մեդալ Մայքլ Լ. Փրինցի պարգև Թագավորական գրական միության անդամ և Eleanor Farjeon Award?
Կայք	aidanchambers.co.uk
Aidan Chambers Վիքիպահեստում

Էյդեն Չեմբերս (անգլ.՝ Aidan Chambers, դեկտեմբերի 27, 1934(1934-12-27), Chester-le-Street, Դարեմ քաունթի, Դարհեմ, Անգլիա, Միացյալ Թագավորություն), բրիտանացի գրող, մանկական և պատանեկան ստեղծագործությունների հեղինակ։

Կենսագրություն

Էյդեն Չեմբերսը ծնվել է 1934 թվականին Դարեմ կոմսության Չեսթեր լը Սթրիթ քաղաքում, եղել է ընտանիքի միակ երեխան։ Չեմբերսների տանը եղել է ընդամենը հինգ գիրք, որոնց թվում են Աստվածաշունչը և Եզոպոսի առակները։ Տարրական դպրոցում սովորել է դժվարությամբ, մինչև 6 տարեկանը չի կարողացել սահուն կարդալ։

Ավարտել է Լոնդոնի «Բորո Ռոուդ» քոլեջը, որից հետո երկու տարի ծառայել է Թագավորական նավատորմում, այնուհետև տարբեր դպրոցներում դասավանդել է անգլերեն և դրամա։ 1960 թվականին ընդունվել է Գլոստերշիր կոմսության Սթրաուդ անգլիական վանական համալիրը՝ շարունակելով դասավանդել։ Չեմբերսի առաջին ստեղծագործությունները, այդ թվում՝ Johnny Salter (1966), The Car և The Chicken Run (1968), հրատարակվել են այն ժամանակ, երբ նա Սթրաուդի «Archway School» դպրոցի ուսուցիչ էր։ Նրա Now I Know («Հիմա ես գիտեմ», 1987) վեպը մասամբ հիմնված է նրա անձնական ճգնավորական փորձի վրա։

1967 թվականին Չեմբերսը դուրս է եկել վանքից, 1968 թվականին ամուսնացել է և դադարել զբաղվել դասավանդելով՝ դառնալով ֆրիլանսեր գրող։ Մեկ տարի անց Չեմբերսը կնոջ՝ Նենսիի հետ հիմնել է «Թրիմբլ Պրես» հրատարակչությունը և սկսել հրատարակել «Սիգնալ» ամսագիրը, որտեղ տպագրվել են մանկական գրականության մասին քննադատական հոդվածներ։ 1982 թվականին Չեմբերս ամուսիններն արժանացել են Էլինոր Ֆարջոնի մրցանակին՝ մանկական գրականության զարգացման մեջ մեծ դեր ունենալու համար։ 2003-2006 թվականներին Էյդեն Չեմբերսը եղել է Մեծ Բրիտանիայի Դպրոցական գրադարանային ասոցիացիայի նախագահը։

1978-2005 թվականներին Չեմբերսը գրել է վեց վեպից բաղկացած շարք, որոնց միավորում է մեկ թեմա՝ «Ի՞նչ բան է սերը»։ Այդ շարքում ներառված են այնպիսի ստեղծագործություններ, ինչպիսիք են Breaktime («Ընդմիջում»), Dance on My Grave («Պարիր իմ գերեզմանի վրա»), Now I Know («Հիմա ես գիտեմ»), The Toll Bridge («Վճարովի ուղանցմամբ կամուրջը»), Postcards from No Man’s Land («Նամակներ անմարդաբնակ երկրից») և This is All: The Pillow Book of Cordelia Kenn («Այս ամենը։ Քորդելիա Քենի սեղանի գիրքը»)։

Չեմբերսը նորարար է ոճով և բովանդակությամբ, իր՝ երիտասարդությանն ուղղված վեպերում նա փորձարկում է լեզուն, ձևը և բովանդակությունը։

Էկրանավորումներ

Չեմբերսի «Պարիր իմ գերեզմանի վրա» վեպը հիմք է դարձել «Ամառ 85» ֆիլմի (ռեժիսոր՝ Ֆրանսուա Օզոն) սցենարի համար, որը էկրան է բարձրացել 2020 թվականի հուլիսին։

Մատենագիտություն

Ստեղծագործություններ երիտասարդների համար

• Cycle Smash (1967)
• Marle (1968)
• Snake River (1975)
• Breaktime (1978)
• Dance on My Grave (1982)
• Now I Know (1987)
• The Toll Bridge (1992)
• Postcards from No Man's Land (1999)
• This is All: The Pillow Book of Cordelia Kenn (2005)
• «Dying to Know You» (2012)

Ստեղծագործություններ երեխաների համար

• Seal Secret (1980)
• The Present Takers (1984).

Կարճ պատմվածքներ

• The Kissing Game: Short Stories of Defiance and Flash Fictions (2011)

Քննադատական և կրթական հրատարակումներ

• The Reluctant Reader (1969)
• Introducing Books to Children (1973, 1983)
• Booktalk: occasional writing on literature and children (1985)
• The Reading Environment (1991)
• Tell Me: Children, Reading and Talk (1993)
• Reading Talk (2001)
• Tell Me: Children, Reading and Talk with The Reading Environment (2011)

Արտաքին հղումներ

• Aidan Chambers at British Council: Literature

Վիքիպահեստն ունի նյութեր, որոնք վերաբերում են «Էյդեն Չեմբերս» հոդվածին։