Ասլամազյան քույրերի պատկերասրահ

Ասլամազյան քույրերի պատկերասրահ
Տեսակ	պատկերասրահ և հուշային թանգարան
Երկիր	Հայաստան
Տեղագրություն	Գյումրի
Մասն է	Արգելոց «Կումայրի»
Հասցե	Հայաստան, Գյումրի, Աբովյան փողոց 242
Հիմնադրվել է	1987

Ասլամազյան քույրերի պատկերասրահ, բացվել է 1987 թվականի նոյեմբերի 6-ին, Լենինականի «Կումայրի» պատմաճարտարապետական արգելոցի համակարգում՝ Ասլամազյան քույրերի՝ Լենինական քաղաքին իրենց աշխատանքները նվիրաբերելու առիթով։

Ընդգրկված է Գյումրիի պատմության և մշակույթի անշարժ հուշարձանների ցանկում։

Պատմություն[խմբագրել | խմբագրել կոդը]

«Մարիամ և Երանուհի Ասլամազյան քույրերի պատկերասրահում» պահվում են քույրերի գեղանկարչական, գրաֆիկական, խեցեգործական աշխատանքների ամբողջական հավաքածուն։ Պատկերասրահը գործում է 1987 թվականից և այստեղ պահպանվում են քույրերի կողմից նվիրատված մոտ 620 բնօրինակ աշխատանքներ։ Պատկերասրահի շենքը 1988 թվականի Գյումրու երկրաշարժից հետո տրամադրվել էր անօթևաններին և վերաբացվել է 2004 թվականին։

Պատկերասրահը գտնվում է Գյումրու կենտրոնական հրապարակում, այն կառուցվել է 1880 թվականին մեծահարուստ վաճառականներ, հայտնի գյումրեցի ընտանիքի Քեշիշովների կողմից՝ որպես իրենց բնակարան։ Պատկերասրահի շենքը 19 –րդ դարի Ալեքսանդրապոլյան քաղաքաշինության ճարտարապետության վառ օրինակ է, իր մեջ ներառելով այն ժամանակվա եվրոպական և ավանդական հայկական ճարտարապետության տարրերը, ձևավորել է Գյումրուն բնորոշ սև տուֆով շարվածք ունեցող քաղաքի յուրահատուկ դիմագիծը՝ ներքին շքեղ բակով և փայտյա պատշգամբով։ 19-րդ դարի ճարտարապետության վառ օրինակ հանդիսացող այդ կառույցը 1980 թվականին ներառվել է «Կումայրի արգելոց թանգարան»-ի մեջ՝ անցնելով պետության կողմից պահպանվող պատմամշակութային ժառանգության կառույցների ցանկը։

Պատկերասրահի շենքը իր 136 տարիների ընթացքում երկու անգամ ենթարկվել է հզոր փորձությունների՝ Գյումրիում տեղի ունեցող աղետալի երկրաշարժերի (1926,1988), որոնցից հետո այն վերականգնվել է և վերաբացվել։

«Մարիամ և Երանուհի Ասլամազյան քույրերի պատկերասրահն» իրականացնում է կրթական ծրագրերի կազմակերպում` դասընթաց-վարժանքների միջոցով, արվեստային թերապիաներ, որոնց նպատակներն են պատկերասրահի տարածքում ստեղծել արվեստի դաշտ,որի ակտիվ մասնակիցն է հանդիսանալու հասարակությունը՝ անկախ տարիքային սահմանափակումից և սեռային պատկանելիությունից։ Պատկերասրահը հնարավորություն է ստեղծում արվեստ-հասարակություն կապի ամրապնդման զարգացման համար^[2]։

Մարիամ Ասլամազյանի 80-ամյակի կապակցությամբ Մարիամ և Երանուհի Ասլամազյան քույրերը Գյումրի քաղաքին են նվիրել իրենց աշխատանքներից մոտ 620 բնօրինակ։

Ցուցադրություն[խմբագրել | խմբագրել կոդը]

Ցուցանմուշները (մոտ 619 կտավ, դեկորատիվ-կիրառական արվեստի առարկաներ) նվիրել են Մարիամ և Երանուհի Ասլամազյան քույրերը։ Պատկերասրահը, որպես գեղարվեստական թանգարան, պահպանում և ցուցադրում է Ասլամազյան քույրերի գեղանկարչական, գրաֆիկական և խեցեգործական աշխատանքները։

Պատկերսարահում ցուցադրվում են ՀԽՍՀ ժողովրդական նկարչուհիների (գեղանկար, գրաֆիկա), նկարազարդ թասեր, սպասք, մոմակալներ։

Միջոցառումներ[խմբագրել | խմբագրել կոդը]

Թանգարանում իրականացվող հիմնական միջոցառումներն են՝

Թանգարանների գիշեր (մայիս)
Եվրոպական ժառանգության օրեր (սեպտեմբեր)
Մարիամ և Երանուհի Ասլամազյանների ծննդյան օրեր (ապրիլ և հոկտեմբեր)
Ժամանակավոր ցուցադրություններ քաղաքային տարբեր միջոցառումների շրջանակներում
Տարբեր արվեստագետների ցուցահանդեսներ

Հասցե[խմբագրել | խմբագրել կոդը]

Թանգարանը գտնվում է Գյումրու կենտրոնական հրապարակին կից՝ Աբովյան 232 հասցեում։

Պատկերասրահ[խմբագրել | խմբագրել կոդը]

Ծանոթագրություններ[խմբագրել | խմբագրել կոդը]

↑ ^1,0 ^1,1 Wiki Loves Monuments monuments database — 2017.
↑ «Արխիվացված պատճենը». Մարիամ և Երանուհի Ասլամազյան քույրերի պատկերասրահի պաշտոնական էջ. Արխիվացված է օրիգինալից 2020 թ․ փետրվարի 15-ին. Վերցված է 2020 թ․ փետրվարի 15-ին.

Արտաքին հղումներ[խմբագրել | խմբագրել կոդը]

Վիքիպահեստ նախագծում կարող եք այս նյութի վերաբերյալ հավելյալ պատկերազարդում գտնել Ասլամազյան քույրերի պատկերասրահ կատեգորիայում։

[_3651b91d2349fa37-1] 1,0 ^1,1 Wiki Loves Monuments monuments database — 2017.

[Պատկերասրահի_մասին-2] «Արխիվացված պատճենը». Մարիամ և Երանուհի Ասլամազյան քույրերի պատկերասրահի պաշտոնական էջ. Արխիվացված է օրիգինալից 2020 թ․ փետրվարի 15-ին. Վերցված է 2020 թ․ փետրվարի 15-ին.

[1]

[2]