«Սեփական ցանկությամբ» (ռուս.՝ По собственному желанию), խորհրդային մուլտիպլիկացիոն ֆիլմ, որ ստեղծվել է «Սոյուզմուլտֆիլմ» ստուդիայում 1986 թվականին[1]։ Մուլտֆիլմի շարունակությունն է 1982 թվականին ստեղծված «Չարաճճիներ» («Бедокуры») մուլտֆիլմը։
Խոհարարին բառացիորեն վտարում են ճաշարանից՝ «սեփական ցանկությամբ» պաշտոնական ձևակերպմամբ։ Նա իր հետ տանում է իր ուղեպայուսակը, «Լավագույն խոհարարին» դիպլոմը և իր սիրելի շիկամազ կատվի հետ գնում նոր աշխատանք փնտրելու։ Նրանք տեսնում են, որ հայտարարությունների տախտակին փակցված թղթին գրված է, որ «Նեպտուն» նավին պետք է կոկ։ Խոհարարն ու կատուն ուրախանում են և վազում դեպի նավը։ Միչմանն ընդունում է խոհարարին, բայց կատվին վռնդում է։ Հնարամիտ կատուն, չցանկանալով բաժանվել իր ընկեր խոհարարից, փորձում է ամեն գնով հայտնվել նավում՝ հաղթահարելով միչմանի ստեղծած խոչընդոտները։ Նրան օգնում են խոհարարն ու մկնիկը։ Արդյունքում քիչ է մնում, որ նրանք բոլորը խորտակվեին նավի հետ միասին։ Սակայն նրանք փրկվում են, որովհետև օգնում են մեկը մյուսին։