Ռաֆայել Նահապետյան

Ռաֆայել Նահապետյան
Ծնվել է	հունիսի 8, 1946(1946-06-08)
Ծննդավայր	Երևան, Հայկական ԽՍՀ, ԽՍՀՄ
Վախճանվել է	հուլիսի 19, 2010(2010-07-19) (64 տարեկան)
Մասնագիտություն	արձակագիր
Քաղաքացիություն	Հայաստան
Կրթություն	Երևանի պետական համալսարան (1971)
Անդամակցություն	ԽՍՀՄ Գրողների միություն
Աշխատավայր	Կոմպլեքսային էլեկտրասարքավորման ինստիտուտ
Ռաֆայել Նահապետյան Վիքիդարանում

Ռաֆայել Նահապետյան (հունիսի 8, 1946(1946-06-08), Երևան, Հայկական ԽՍՀ, ԽՍՀՄ - հուլիսի 19, 2010(2010-07-19)), հայ ժամանակակից գրող, արձակագիր։ ԽՍՀՄ գրողների միության անդամ (1985)։

Կենսագրություն

Ռաֆայել Նահապետյանը ծնվել է 1946 թվականի հունիսի 8-ին Երևան քաղաքում։

1965 թվականին ավարտել է Երևանի էլեկտրամեխանիկական տեխնիկումը, ապա աշխատել է որպես ավագ լաբորանտ էլեկտրամեխանիկայի համամիութենական գիտահետազոտական ինստիտուտի հայկական մասնաճյուղում։ 1971 թվականին ավարտել է Երևանի պետական համալսարանի բանասիրական ֆակուլտետը։ 1971-1973 թվականներին ծառայել է ԽՍՀՄ բանակում որպես սպա։ 1974-1983 թվականներին աշխատել է Հայաստանի հեռուստատեսային և ռադիոհաղորդումների պետական կոմիտեում, որպես գրական հաղորդումների գլխավոր խմբագրության խմբագիր, ապա՝ ավագ խմբագիր։ 1985 թվականին դարձել է ԽՍՀՄ գրողների միության անդամ։ Հայաստանի անկախության հռչակումից հետո զբաղեցրել է ԳԽ լրատվական հարցերի մշտական հանձնաժողովի փորձագետի պաշտոնը։ Հայաստանի գրողների միությունում վարել է Գրական հինգշաբթի ամենշաբաթյա միջոցառումը։

Տպագրվել է 1970 թվականից։ Առաջին հրապարակումը՝ «Հայրենիքի ժամանակը» պատրաստել է համակուրսեցի Արա Մնացականյանի հետ և հրատարակել Գարուն հանդեսում։ Հոդվածը սփյուռքահայերի՝ դեպի Խորհրդային Հայաստան ներգաղթի թեմայով էր։ Հեղինակել է պատմվածքներ, ռադիոպիեսներ, վիպակներ, հեռուստատեսային ներկայացումներ։ 60-ականների վերջերին Ռաֆայել Նահապետյանը և Արա Մնացականյանը փոքր խմբակով իրականացրել են ազգայնական բնույթի գործունեություն, ծավալել ազգայնական քարոզչություն։ Խմբակի աշխատանքը կասեցվել է ԽՍՀՄ Պետանվտանգության մարմինների կողմից։ Ռաֆայել Նահապետյանը և Արա Մնացականյանը կարճաժամկետ ազատազրկվել են։

Ռաֆայել Նահապետյանի ստեղծագործությունները թարգմանվել են ռուսերեն, ուկրաիներեն, լիտվերեն, լատիշերեն, չեխերեն, ռումիներեն և այլ լեզուներով։ Հեղինակել է նաև Անջո հեծանիվը, Անջո ֆուտբոլի գնդակը, Անջո ոստիկանության սերժանտը մանկական վիպակները։ Ռաֆայել Նահապետյանի Մթի մեջ արևի ցոլքերում վեպը մնացել է անավարտ։ Արժանացել է մի շարք մրցանակների։

Տպագրված գրքեր

• Հրաշեկ նժույգներ (1983)
• Հրաձգարանի մեծ մրցանակը (1989)
• Մեղեդի երևակայական ջութակի համար (1994)
• Ագռավի աղջիկը (2000)
• ...Եվ ծագեց խավարը (2003)

Թարգմանություններ

Այս հեղինակի կատարած թարգմանությունների ցանկը կարող եք որոնել «Թարգմանչաց արվեստ» շտեմարանի «Թարգմանիչներ» բաժնում

• Տաջիկական գրականության անթոլոգիա.- Երևան։ ՀԳՄ հրատ., 2009.- 231 էջ.- Բովանդ-ից՝ Որոշ ստեղծագործություններ։

Արտաքին հղումներ

• Ռաֆայել Նահապետյան Արխիվացված 2022-09-30 Wayback Machine
• Ռաֆայել Նահապետյանի վերջին հարցազրույցը

Աղբյուրներ

Վիքիդարանն ունի նյութեր, որոնք վերաբերում են «Ռաֆայել Նահապետյան» հոդվածին։