Ուիլյամ Մոնտգոմերի Թոմսոն
Ուիլյամ Մոնտգոմերի Թոմսոն | |
---|---|
անգլ.՝ William Montgomery Thomson | |
դեկտեմբերի 2, 1877 - հուլիսի 23, 1963 (85 տարեկան) | |
Քաղաքացիություն | Միացյալ Թագավորություն |
Կոչում | գեներալ-լեյտենանտ |
Հրամանատարն էր | Seaforth Highlanders? |
Մարտեր/ պատերազմներ | Առաջին համաշխարհային պատերազմ |
Կրթություն | Բեդֆորդ դպրոց |
Պարգևներ |
Սըր Ուիլյամ Մոնտգոմերի Թոմսոն (անգլերեն` William Montgomery Thomson, 1877–1963)` բրիտանական բանակի գեներալ-լեյտենանտ, որը 1918 թվականին եղել է Բաքվի ռազմական ղեկավար և կարևոր դեր խաղացել 1918-1919 թվականներին Հարավային Կովկասում ծավալված իրադարձություններում։
Կենսագրություն[խմբագրել | խմբագրել կոդը]
Ծնվել է 1877 թվականի դեկտեմբերի 2-ին։ Ուիլյամ Թոմսոնը 78-րդ լեռնային գնդի կապիտան Ուիլյամ Թոմսոնի չորրորդ տղան էր։ Նրա ավագ եղբայր Հենրի Բրոթոն Թոմսոնը կանադական բիզնեսմեն և քաղաքական գործիչ էր։ Մյուս եղբայրը` Թոմաս Ուելդոն Թոմսոնը ամուսինն էր Գվինեթ Բեբբի, որը Մեծ Բրիտանիայում առաջին կին իրավաբաններից մեկն էր[1]։
Ուիլյամ Թոմսոնը կրթությունը ստացել է Անգլիայի Բեդֆորդ քաղաքի դպրոցում։ 1897 թվականից միացել է Սիֆորթի լեռնային գնդին (անգլ.` Seaforth Highlanders), 1898-ին ծառայել Սուդանում[1]։
Առաջին համաշխարհային պատերազմի ժամանակ եղել է Ֆրանսիայում և Միջագետքում Սիֆորթի լեռնային 1-ին գնդի, 1916-1917 թվականներին` 35-րդ հնդկական բրիգադի, 1917-1918 թվականներին` 14-րդ հնդկական դիվիզիայի հրամանատար։ 1918 թվականի սեպտեմբերից եղել է հյուսիսային Պարսկաստանում, 1919 թվականի մարտից մինչև մայիսը` Հարավային Կովկասում բրիտանական զորքերի հրամանատար[1]։
1918 թվականի նոյեմբերին 2000 բրիտանական զինվորների և ռուս գեներալ Նիկոլայ Բարաթովի զորաջոկատի հետ Թոմսոնը մտել է Բաքու։ Գտնվելով Բաքվում և ապա Թիֆլիսում` ակտիվ մասնակցություն է ունեցել նորաստեղծ Հայաստանի, Վրաստանի և Ադրբեջանի հանրապետությունների միջև վիճելի հարցերի լուծման բրիտանական փորձերում[2]։
1920 թվականի ապրիլին դարձել է 154-րդ հետևակային բրիգադի հրամանատար, 1924 թվականի նոյեմբերին` Հնդկաստանի Ասսամ նահանգի զորքերի հրամանատար, իսկ 1925 թվականի հունիսից` 51-րդ լեռնային դիվիզիայի հրամանատար[1]։
Թոշակի է անցել 1934 թվականին, մահացել` 1963 թվականի հուլիսի 23-ին։ Թաղված է հյուսիսային Շոտլանդիայում գտնվող Քինլոսի աբբայության տարածքում[1]։